تجارت اور صنعت کے مرکزی وزیر جناب پیوش گوئل نے 20 اگست 2026 کو سنگاپور میں اعلیٰ سطح کی کئی دوطرفہ اور کاروباری میٹنگیں کیں، جس کے ذریعے بھارت اور سنگاپور کے درمیان دیرینہ اقتصادی شراکت داری کو مزید مضبوط بنانے اور تجارت، سرمایہ کاری، ٹیکنالوجی اور کاروبار کے شعبوں میں تعاون کو آگے بڑھانے پر زور دیا گیا۔

جناب گوئل نے دن کا آغاز سنگاپور کے وزیر اعظم جناب لارنس وونگ سے اِستانہ میں ملاقات سے کیا۔ اس کے بعد انہوں نے شنگریلا ہوٹل میں منعقدہ چوتھی بھارت-سنگاپور وزارتی گول میز کانفرنس (آئی ایس ایم آر)اور چوتھی بھارت-سنگاپور کاروباری گول میز کانفرنس (آئی ایس بی آر) میں شرکت کی۔ ان گول میز کانفرنسوں میں دوطرفہ اقتصادی تعاون کو مزید مضبوط بنانے کے طور طریقوں اور باہمی فائدے پر مبنی تعاون کے نئے امکانات تلاش کرنے پر تبادلۂ خیال کیا گیا۔ گول میز کانفرنسوں کے بعد مفاہمت  نامے پر دستخط کی تقریب بھی منعقد ہوئی۔

دوپہر کے وقت جناب گوئل نے عالمی کاروباری اور ادارہ جاتی برادری کے سرکردہ نمائندوں، جن میں گلوبل فنانس اینڈ ٹیکنالوجی نیٹ ورک (جی ایف ٹی این) اور کیپل انفراسٹرکچر شامل ہیں، کے ساتھ کئی گورنمنٹ ٹوبزنس میٹنگیں کیں۔ ان میٹنگوں میں زرعی فصلوں کی برآمدات، جی سی سی پر مبنی تجارتی پارکس، مالیاتی ٹیکنالوجی اور پائیدار بنیادی ڈھانچے سمیت مختلف شعبوں میں بھارت-سنگاپور تعاون کو مضبوط بنانے پر توجہ مرکوز کی گئی۔

جناب گوئل نے سنگاپور کی امور خارجہ اور تجارت و صنعت کی  وزیرِ مملکت محترمہ گن سیو ہوانگ کے ساتھ سٹی اسکوائر مال میں اے پی ای ڈی اے-منصفانہ قیمت کے مشترکہ اقدام کا بھی دورہ کیا۔ اس موقع پر بھارت اور سنگاپور کے درمیان بڑھتی ہوئی زرعی تجارت اور وسیع ہوتے ہوئے بازار کے  روابط کو اجاگر کیا گیا۔

شام کے وقت جناب گوئل نے آئی این ایس ای اے ڈی کیمپس میں فیڈریشن آف انڈین چیمبرز آف کامرس اینڈ انڈسٹری (فکی) کے زیر اہتمام بھارت-سنگاپورکاروباری فورم میں شرکت کی۔ انہوں نے ‘‘نئی عالمی ترقی میں بھارت:ایشیا اور دنیا کے کاروبار کے لیے ترقی اور مواقع’’ کے موضوع پر ایک خصوصی تبادلۂ خیال میں بھی حصہ لیا، جس کے بعد کاروباری برادری کے اراکین کے ساتھ سوال و جواب کا ایک سیشن  بھی منعقد ہوا۔

ان میٹنگوں اور سرگرمیوں سے بھارت-سنگاپور اقتصادی شراکت داری میں موجود مضبوط رفتار کی ایک بار پھر توثیق ہوئی۔ اس کے ساتھ ہی تجارت، سرمایہ کاری، ٹیکنالوجی اور کاروباری اداروں کے درمیان روابط کو مزید گہرا کرنے کے بھارت کے عزم کا اظہار ہوا، جبکہ باہمی فائدے پر مبنی ترقی کے لیے نئے مواقع پیدا کرنے پر بھی زور دیا گیا۔

چوتھی بھارت-سنگاپور وزارتی گول میز کانفرنس میں بھارتی وفد میں مرکزی وزیر خزانہ و کارپوریٹ امور محترمہ نرملا سیتا رمن، مرکزی وزیر خارجہ ڈاکٹر ایس جے شنکر، مرکزی وزیر تجارت و صنعت جناب پیوش گوئل اورتجارت کے وزیر مملکت جناب جتن پرساد شامل تھے۔سنگاپور کی جانب سے نائب وزیر اعظم اور تجارت و صنعت کے وزیر جناب گن کم یونگ، سینئر وزیر، قومی سلامتی کے رابطہ کار وزیر اور وزیر داخلہ جناب کے۔ شنموگم، وزیر خارجہ ڈاکٹر ویویئن بالاکرشنن، ڈیجیٹل ترقی اور اطلاعات  کی وزیر محترمہ جوزفین ٹیو اورٹرانسپورٹ کے وزیر نیز خزانہ کے وزیر مملکت جناب جیفری سیو نے شرکت کی۔

******

ش ح۔م ع۔اش ق

U. No. 2381