ପର୍ଯ୍ୟଟନ ମନ୍ତ୍ରଣାଳୟ
ଜୟପୁରରେ ୨ୟ ବ୍ରିକ୍ସ ପର୍ଯ୍ୟଟନ କାର୍ଯ୍ୟଗୋଷ୍ଠୀ ବୈଠକ ଅନୁଷ୍ଠିତ
ପର୍ଯ୍ୟଟନ କ୍ଷେତ୍ରରେ ନିରନ୍ତରତା, ଦକ୍ଷତା ଏବଂ ଯାତ୍ରାରେ ସହଜତାରେ ସହଯୋଗକୁ ଆଗକୁ ବଢାଇବା ଉପରେ ଗୁରୁତ୍ୱ
प्रविष्टि तिथि:
19 AUG 2026 6:57PM by PIB Bhubaneswar
ଭାରତ ସରକାରଙ୍କ ପର୍ଯ୍ୟଟନ ମନ୍ତ୍ରଣାଳୟ ଆଜି ରାଜସ୍ଥାନର ଜୟପୁରରେ ଭାରତର ବ୍ରିକ୍ସ ଅଧ୍ୟକ୍ଷତାରେ ଦ୍ୱିତୀୟ ବ୍ରିକ୍ସ ୨୦୨୬ ପର୍ଯ୍ୟଟନ କାର୍ଯ୍ୟଗୋଷ୍ଠୀ (ଟିଡବଲ୍ୟୁଜି) ବୈଠକ ଆୟୋଜନ କରିଥିଲା। ଏହି ବୈଠକ ଭାରତ ସରକାରଙ୍କ ପର୍ଯ୍ୟଟନ ମନ୍ତ୍ରଣାଳୟର ସଚିବ ଶ୍ରୀ ଭୁବନେଶ କୁମାରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା।
ଏହି ବୈଠକ ୨୫ ମେ’ ୨୦୨୬ରେ ଆଭାଷୀ ଭାବରେ ଅନୁଷ୍ଠିତ ପ୍ରଥମ ବ୍ରିକ୍ସ ୨୦୨୬ ପର୍ଯ୍ୟଟନ କାର୍ଯ୍ୟଗୋଷ୍ଠୀ ବୈଠକ ପରେ ଅନୁଷ୍ଠିତ ହୋଇଥିଲା। ବ୍ରିକ୍ସ ସଦସ୍ୟ ରାଷ୍ଟ୍ରର ପ୍ରତିନିଧିମାନେ ଏକାଠି ହୋଇ ଭାରତର ପ୍ରମୁଖ ପ୍ରାଥମିକତା : କୃତ୍ରିମ ବୁଦ୍ଧିମତ୍ତା ଏବଂ ପର୍ଯ୍ୟଟନ, ନିରନ୍ତର ଏବଂ ଦାୟିତ୍ୱପୂର୍ଣ୍ଣ ପର୍ଯ୍ୟଟନ, ପର୍ଯ୍ୟଟନ ଦକ୍ଷତା ବିକାଶ ଏବଂ କ୍ଷମତା ନିର୍ମାଣ, ଏବଂ ପର୍ଯ୍ୟଟନ ଆଦାନପ୍ରଦାନ ଏବଂ ଯାତ୍ରାର ସହଜତା ଉପରେ ସହଯୋଗକୁ ଆଗକୁ ବଢ଼ାଇବା ବିଷୟରେ ଆଲୋଚନା କରିଥିଲେ।
"ସ୍ଥାୟୀତ୍ୱ, ନବସୃଜନ, ସହଯୋଗ ଏବଂ ନିରନ୍ତରତା ପାଇଁ ନିର୍ମାଣ" ଶୀର୍ଷକ ବିଷୟବସ୍ତୁ ଉପରେ ଅନୁଷ୍ଠିତ ଦ୍ୱିତୀୟ ପର୍ଯ୍ୟଟନ କାର୍ଯ୍ୟଗୋଷ୍ଠୀ ବୈଠକ ବ୍ରିକ୍ସ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ପର୍ଯ୍ୟଟନ ସହଯୋଗକୁ ଗଭୀର କରିବା ପାଇଁ ଏକ ସହଭାଗୀ ପ୍ରତିବଦ୍ଧତାକୁ ପ୍ରତିଫଳିତ କରିଥିଲା। କାର୍ଯ୍ୟ ଗୋଷ୍ଠୀ ପର୍ଯ୍ୟଟନକୁ ଆର୍ଥିକ ଅଭିବୃଦ୍ଧି, ନିଯୁକ୍ତି, ନିରନ୍ତର ବିକାଶ ଏବଂ ଲୋକମାନଙ୍କ ମଧ୍ୟରେ ପାରସ୍ପରିକ ଆଦାନପ୍ରଦାନର ଏକ ଗୁରୁତ୍ୱପୂର୍ଣ୍ଣ ବାହକ ଭାବରେ ସ୍ୱୀକାର କରିଥିଲା। ଏହା ସହିତ ପ୍ରଯୁକ୍ତିବିଦ୍ୟା ପରିବର୍ତ୍ତନ, ପରିବର୍ତ୍ତିତ ଯାତ୍ରୀ ଆକାଂକ୍ଷା ଏବଂ ନିରନ୍ତରତାର ଆବଶ୍ୟକତା ଦ୍ୱାରା ଆକୃତିପ୍ରାପ୍ତ ବିକଶିତ ବିଶ୍ୱ ପର୍ଯ୍ୟଟନ ଦୃଶ୍ୟପଟ ପ୍ରତି ମଧ୍ୟ ଧ୍ୟାନ ଦିଆଯାଇଥିଲା।
ଏହି ଆଲୋଚନାରେ ଭାରତର ଅଧ୍ୟକ୍ଷତାରେ ଚିହ୍ନଟ ହୋଇଥିବା ଚାରୋଟି ପ୍ରମୁଖ ପ୍ରାଥମିକତାକୁ ଆଗକୁ ବଢ଼ାଯାଇଥିଲା ଏବଂ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ସହଯୋଗ ବୃଦ୍ଧି ପାଇଁ କ୍ଷେତ୍ରଗୁଡ଼ିକର ରୂପରେଖ ଦିଆଯାଇଥିଲା । ଏଥିରେ ଉଦୀୟମାନ ପ୍ରଯୁକ୍ତିବିଦ୍ୟାର ଦାୟିତ୍ୱପୂର୍ଣ୍ଣ ବ୍ୟବହାର, ସ୍ଥାୟୀ ଏବଂ ସମୁଦାୟ-କେନ୍ଦ୍ରିକ ପର୍ଯ୍ୟଟନ, ମାନବ ପୁଞ୍ଜି ବିକାଶ, ପର୍ଯ୍ୟଟନ ଆଦାନପ୍ରଦାନ ଏବଂ ଦୃଢ଼ ସଂଯୋଗ ଅନ୍ତର୍ଭୁକ୍ତ।
ବୈଠକରେ ଶ୍ରୀ ଭୁବନେଶ କୁମାର କହିଥିଲେ ଯେ, ପ୍ରଥମ ପର୍ଯ୍ୟଟନ କାର୍ଯ୍ୟଗୋଷ୍ଠୀ ବୈଠକ ଏବଂ ପରବର୍ତ୍ତୀ ଆଲୋଚନା ଭାରତର ବ୍ରିକ୍ସ ପର୍ଯ୍ୟଟନ ଏଜେଣ୍ଡାକୁ ଆଗକୁ ବଢ଼ାଇବାରେ ଗୁରୁତ୍ୱପୂର୍ଣ୍ଣ ଅଗ୍ରଗତି କରିଛି। ଭାରତର ଅଧ୍ୟକ୍ଷତାରେ ପର୍ଯ୍ୟଟନ କ୍ଷେତ୍ରରେ ନିରନ୍ତରତା, ଦକ୍ଷତା ବିକାଶ, ଯାତ୍ରାର ସହଜତା ଏବଂ ସ୍ମାର୍ଟ ପର୍ଯ୍ୟଟନ କ୍ଷେତ୍ରରେ ସହଯୋଗକୁ ପ୍ରୋତ୍ସାହିତ କରିବାକୁ ଚେଷ୍ଟା କରାଯାଇଛି ବୋଲି ସେ ଗୁରୁତ୍ୱାରୋପ କରିଥିଲେ।
ସେ କହିଥିଲେ ଯେ କାର୍ଯ୍ୟଗୋଷ୍ଠୀ ଆଲୋଚନାର ଫଳାଫଳ ଅଗଷ୍ଟ ୨୧ରେ ହେବାକୁ ଥିବା ବ୍ରିକ୍ସ ପର୍ଯ୍ୟଟନ ମନ୍ତ୍ରୀଙ୍କ ବୈଠକ ପାଇଁ ଏକ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରଦାନ କରିବ।
ଏହି କାର୍ଯ୍ୟକ୍ରମର ଏକ ଅଂଶ ସ୍ୱରୂପ, ବ୍ରିକ୍ସ ପ୍ରତିନିଧିମାନେ ଅଗଷ୍ଟ ୨୦, ୨୦୨୬ ରେ ଜୟପୁରର ପ୍ରମୁଖ ପର୍ଯ୍ୟଟନ ଏବଂ ଐତିହ୍ୟ ସ୍ଥଳୀ, ହାୱା ମହଲ, ସିଟି ପ୍ୟାଲେସ୍ ଏବଂ ଆମେର ପ୍ୟାଲେସକୁ ଏକ ବୈଷୟିକ ପରିଦର୍ଶନ କରିବେ। ଏହା ସେମାନଙ୍କୁ ରାଜସ୍ଥାନର ସମୃଦ୍ଧ ସାଂସ୍କୃତିକ ଏବଂ ସ୍ଥାପତ୍ୟ ଐତିହ୍ୟକୁ ଅନୁଭବ କରିବାର ସୁଯୋଗ ପ୍ରଦାନ କରିବ।
*****
SSP
(रिलीज़ आईडी: 2301411)
आगंतुक पटल : 5