સંરક્ષણ મંત્રી શ્રી રાજનાથ સિંહ 20 ઓગસ્ટ, 2026ના રોજ નવી દિલ્હીમાં જાપાનના સંરક્ષણ મંત્રી શ્રી શિંજિરો કોઇઝુમી સાથે દ્વિપક્ષીય બેઠક યોજશે. આ બેઠકથી દ્વિપક્ષીય સંરક્ષણ સંબંધો વધુ મજબૂત બનશે, વ્યુહાત્મક વિશ્વાસ અને સહયોગ વધશે, ઇન્ડો-પેસિફિક ક્ષેત્રમાં સ્થિરતા અને સુરક્ષાને પ્રોત્સાહન મળશે અને સહયોગના નવા ક્ષેત્રોની ઓળખ થશે તેવી અપેક્ષા છે.

સંરક્ષણ સાધનો અને ટેકનોલોજીના ટ્રાન્સફર પરના ત્રણ સિદ્ધાંતોમાં જાપાનના સુધારા પછી, બંને મંત્રીઓ 'મેક-ઇન-ઇન્ડિયા' ફ્રેમવર્ક હેઠળ વધુ ઊંડા દરિયાઈ સુરક્ષા સહયોગ અને સંરક્ષણ સાધનો તથા ટેકનોલોજીના વધુ નજીકના સહયોગ પર વિચારોનું આદાન-પ્રદાન કરશે. આ બેઠક દ્વિપક્ષીય સંરક્ષણ અને સુરક્ષા સહયોગને વધુ આગળ ધપાવવા માટે રોડમેપ બનાવવા માટેની એક તક પૂરી પાડે છે.

તેમની ભારતની પ્રથમ મુલાકાતે શ્રી શિંજિરો કોઇઝુમીએ 19 ઓગસ્ટ, 2026ના રોજ મુંબઈમાં વેસ્ટર્ન નેવલ કમાન્ડની મુલાકાત લીધી હતી, જ્યાં તેમણે નૌસેના પ્રમુખ એડમિરલ ક્રિષ્ના સ્વામીનાથન અને ફ્લેગ ઓફિસર કમાન્ડિંગ ઇન ચીફ, વેસ્ટર્ન નેવલ કમાન્ડ વાઇસ એડમિરલ સંજય વાત્સ્યાયન સાથે ચર્ચા કરી હતી. ડેલિગેશનને ભારતીય નૌકાદળની ભૂમિકાઓ અને જવાબદારીઓ તથા ઓપરેશનલ ક્ષમતાઓ વિશે માહિતી આપવામાં આવી હતી.

તેમના આગમન પર, મુલાકાતી મહાનુભાવે વેસ્ટર્ન નેવલ કમાન્ડ ખાતે ગાર્ડ ઓફ ઓનરનું નિરીક્ષણ કર્યું હતું. તેમણે અગાઉ નેવલ ડોકયાર્ડ ખાતે ગૌરવ સ્તંભ પર પુષ્પચક્ર અર્પણ કર્યું હતું. તેમણે સ્વદેશી જહાજ INS ચેન્નઈની પણ મુલાકાત લીધી હતી.

ભારત અને જાપાન મુક્ત, ખુલ્લા, સ્થિતિસ્થાપક અને સમૃદ્ધ ઇન્ડો-પેસિફિક ક્ષેત્રના નિર્માણનો સમાન દ્રષ્ટિકોણ ધરાવે છે. જાપાનના સંરક્ષણ મંત્રીની આ બે દિવસીય મુલાકાત દ્વિપક્ષીય સંરક્ષણ સહયોગમાં વધી રહેલી ગતિને રેખાંકિત કરે છે અને ભાગીદારીને વધુ વિસ્તૃત કરવા માટે બંને પક્ષોની પ્રતિબદ્ધતા દર્શાવે છે. આ મુલાકાત જાપાનના પ્રધાનમંત્રી શ્રીમતી સનાઈ તાકાઈચી પ્રધાનમંત્રી શ્રી નરેન્દ્ર મોદી સાથે વાર્ષિક સમિટ માટે દિલ્હીમાં હતા તેના અઠવાડિયા પછી થઈ રહી છે જેમાં બંને પક્ષો સંરક્ષણ અને સુરક્ષા સહયોગને ગાઢ બનાવવા માટે સંમત થયા હતા.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad