بھارت-نامیبیا مشترکہ تجارتی کمیٹی (جے ٹی سی) کا چوتھا اجلاس 10 اور 11 اگست 2026 کو نئی دہلی میں منعقد ہوا۔ بھارتی وفد کی قیادت وزارت تجارت و صنعت کے محکمہ تجارت کے جوائنٹ سکریٹری جناب امت کمار نے کی، جبکہ جمہوریہ نامیبیا کی حکومت کی وزارت برائے بین الاقوامی تعلقات و تجارت کی ایگزیکٹو ڈائریکٹر محترمہ ندیتا نگھی پونڈوکا-روبیاتی نے نامیبیا کے وفد کی قیادت کی۔ اجلاس کی متفقہ کارروائی کی دستاویز پر دونوں شریک صدور نے 11 اگست 2026 کو دستخط کیے۔ افتتاحی خطاب محکمہ تجارت کے ایڈیشنل سکریٹری جناب یشویر سنگھ نے کیا۔

دونوں فریقوں نے اس ضرورت پر زور دیا کہ دوطرفہ تجارت کو صرف خام مال پر مبنی تجارت تک محدود رکھنے کے بجائے نامیبیا میں قدر افزائی کے عمل کو فروغ دیا جائے۔ دونوں جانب اس بات پر بھی اتفاق کیا گیا کہ مذاکرات کو متعین مدت اور واضح ذمہ داریوں کے ساتھ ٹھوس اور قابلِ عمل طریقۂ کار میں تبدیل کیا جائے۔

اہم نکات

• تجارتی کارکردگی: دوطرفہ تجارتی مال کی تجارت 2024-25 میں 568.40 ملین امریکی ڈالر سے بڑھ کر 2025-26 میں 592.94 ملین امریکی ڈالر ہوگئی۔ اس میں بھارت کی برآمدات 349.09 ملین امریکی ڈالر اور درآمدات 243.85 ملین امریکی ڈالر رہیں۔ سال 2024 میں خدمات کی تجارت 7.34 فیصد اضافے کے ساتھ 380 ملین امریکی ڈالر تک پہنچ گئی۔
• شعبہ جاتی ترقی: بھارت کی انجینئرنگ مصنوعات کی برآمدات 124.06 فیصد اضافے کے ساتھ 30.24 ملین امریکی ڈالر ہوگئیں، جس میں موٹر گاڑیوں اور ان کے پرزوں کا نمایاں کردار رہا۔ ادویہ اور طبی آلات کی برآمدات 36.50 ملین امریکی ڈالر تک پہنچ گئیں۔ بھارت نامیبیا کو ادویہ فراہم کرنے والا دوسرا سب سے بڑا ملک ہے، جس کا حصہ 16.4 فیصد ہے۔
• سرمایہ کاری کے لیے رابطہ مراکز: انویسٹ انڈیا اور نامیبیا انویسٹمنٹ پروموشن اینڈ ڈیولپمنٹ بورڈ کو مشترکہ تجارتی کمیٹی کے سرمایہ کاری سے متعلق رابطہ مراکز مقرر کیے گئے ہیں، جبکہ دونوں جانب سے ایک ایک نامزد افسر بھی مقرر کیا گیا۔
• خدمات سے متعلق ورکنگ گروپ: خدمات کے شعبے کے لیے ایک مخصوص ورکنگ گروپ تشکیل دیا جائے گا، جس کا اجلاس فروری 2027 سے پہلے منعقد ہوگا اور یہ گروپ اپنی کارروائی کا منصوبہ مشترکہ تجارتی کمیٹی کو پیش کرے گا۔
• صحت اور دوا سازی: صحت اور طریقۂ علاج کے شعبے میں تعاون سے متعلق مفاہمت کی یادداشت کے تحت پہلا مشترکہ ورکنگ گروپ دسمبر 2026 تک منعقد کیا جائے گا۔ جَن اوشدھی کے شعبے میں ایچ ایل ایل لائف کیئر لمیٹڈ کے ساتھ تعاون کے معاہدے کو حتمی شکل دینے کا عمل بھی آخری مراحل میں ہے۔
• اہم معدنیات: لیتھیم، گریفائٹ، تانبہ، کوبالٹ اور نایاب ارضی عناصر کے شعبوں میں معدنیات کی تلاش، خریداری کے معاہدوں، پروسیسنگ اور مزید قدر افزائی کے حوالے سے منظم تعاون کی نشاندہی کی گئی ہے۔ یہ تعاون نامیبیا کی مقامی قدر افزائی اور روزگار کے مواقع پیدا کرنے کی ترجیحات کے عین مطابق ہوگا۔
• جواہرات اور زیورات: نامیبیا کو سورت اور ممبئی میں بھارت کے خصوصی طور پر نامزد زونز اور بھارت کے خام جواہرات کی خریداری کے شو میں شرکت کی دعوت دی گئی ہے۔ اس کے ساتھ ہیرے تراشنے، پالش کرنے اور زیورات کے ڈیزائن کے شعبوں میں تربیتی تعاون بھی فراہم کیا جائے گا۔
• ڈیجیٹل تعاون: بھارت کے یونیفائیڈ پیمنٹس انٹرفیس پر مبنی فوری ادائیگی کے نظام کے نفاذ کا سلسلہ جاری رکھنے پر اتفاق کیا گیا۔ یہ نظام 15 جون 2026 کو نامیبیا میں ‘‘وایامی’’ کے نام سے متعارف کرایا گیا تھا۔ اس کے علاوہ بھارتی ریزرو بینک اور بینک آف نامیبیا کے درمیان فن ٹیک تعاون کے لیے ایک فریم ورک تشکیل دینے کی تجاویز بھی پیش کی گئی ہیں۔
• توانائی اور بنیادی ڈھانچہ: ریلوے اور ریل گاڑیوں، شمسی اور ہوائی توانائی، بیٹری اسٹوریج، بجلی کی ترسیل، گرین ہائیڈروجن، حیاتیاتی ایندھن اور پانی کو صاف کرنے کے شعبوں میں تعاون کے امکانات کی نشاندہی کی گئی ہے۔
• بھارت-ساکو ترجیحی تجارتی معاہدہ: بھارت اور جنوبی افریقی کسٹمز یونین (ساکو) کے ترجیحی تجارتی معاہدے کے لیے مذاکرات کے دائرۂ کار کی شرائط کو حتمی شکل دے دی گئی ہے اور ان پر 12 اگست 2026 کو دستخط کیے جانے ہیں۔ مذاکرات دستخط کے ایک ماہ کے اندر شروع ہوں گے اور ایک سال کے اندر مکمل کیے جائیں گے۔

مشترکہ تجارتی کمیٹی دونوں ممالک کے درمیان تجارت، سرمایہ کاری اور اقتصادی تعاون کا جائزہ لینے کے لیے قائم اہم دوطرفہ ادارہ جاتی طریقۂ کار ہے۔ اجلاس کے دوران زراعت اور خوراک کی یقینی فراہمی، چھوٹی، درمیانی اور بہت چھوٹی صنعتیں، ٹیکسٹائل، سیاحت اور کھیلوں کے شعبوں میں بھی تعاون کو آگے بڑھایا گیا۔ بات چیت دوستانہ اور خوشگوار ماحول میں ہوئی، جو دونوں ممالک کے درمیان دیرینہ دوستانہ تعلقات کی عکاسی کرتی ہے۔

مشترکہ تجارتی کمیٹی کا پانچواں اجلاس 2028 میں نامیبیا میں منعقد ہوگا، جس کی تاریخیں سفارتی ذرائع کے ذریعے باہمی رضامندی سے طے کی جائیں گی۔

*****

 ش ح۔ ک ح۔ ج ا

U.No-2238