પ્રધાનમંત્રી શ્રી નરેન્દ્ર મોદીએ આજે 80મા સ્વાતંત્ર્ય દિવસ પર લાલ કિલ્લાની પ્રાચીર પરથી દેશને સંબોધિત કર્યો હતો અને 2047 સુધીમાં "વિકસિત ભારત" ના નિર્માણ તરફની યાત્રામાં રમતગમત અને યુવાનોની કેન્દ્રીય ભૂમિકા પર ભાર મૂક્યો હતો.

રમતગમત ક્ષેત્રે થયેલી પ્રગતિ તરફ નિર્દેશ કરતા પ્રધાનમંત્રીએ કહ્યું: "TOPS સ્કીમે પ્રચંડ સફળતા મેળવી છે. ખેલો ઇન્ડિયા ગેમ્સ, યુનિવર્સિટી ગેમ્સ, વિન્ટર ગેમ્સ, બીચ ગેમ્સ, સ્પોર્ટ્સ ઇન્ફ્રાસ્ટ્રક્ચર, રમતગમત માટે કોચિંગ, સ્પોર્ટ્સ મેડિસિન અને સ્પોર્ટ્સ ન્યુટ્રિશન — ભારત આ તમામ ક્ષેત્રોમાં ઉત્કૃષ્ટતા પ્રાપ્ત કરવા તરફ આગળ વધી રહ્યું છે. જો યુવાનો પોતે અગ્રેસર એથ્લેટ ન બની શકે તો પણ, રમતગમત સાથે જોડાયેલી વિવિધ તકોનું એક વિશાળ ક્ષેત્ર તેમના માટે ખુલી રહ્યું છે."

રોજગાર તરફ વળતા, પ્રધાનમંત્રીએ પ્રધાનમંત્રી વિકસિત ભારત રોજગાર યોજના શરૂ કરવાની જાહેરાત કરી હતી. તેમણે કહ્યું કે આ યોજનાથી આગામી વર્ષો સુધી યુવાનોને લાભ થશે: "આજે, 15મી ઓગસ્ટે, અમે મારા દેશના યુવાનો માટે ₹1 લાખ કરોડની યોજના લાગુ કરવા જઈ રહ્યા છીએ. પ્રધાનમંત્રી વિકસિત ભારત રોજગાર યોજના આજે 15મી ઓગસ્ટે લાગુ કરવામાં આવી રહી છે. આ યોજના હેઠળ, ખાનગી ક્ષેત્રમાં નોકરી મેળવનાર દરેક યુવક કે યુવતીને સરકાર દ્વારા ₹15,000 આપવામાં આવશે. જે કંપનીઓ નવી રોજગારીની વધુ તકો ઊભી કરશે તેમને પણ પ્રોત્સાહન આપવામાં આવશે. પ્રધાનમંત્રી વિકસિત ભારત રોજગાર યોજના દ્વારા આશરે 3.5 કરોડ યુવાનો માટે રોજગારીની નવી તકો ઊભી થશે."

પ્રધાનમંત્રીએ વૈશ્વિક મંચ પર ભારતની વધતી રમતગમતની આકાંક્ષાઓની પણ રૂપરેખા આપી: "રમતગમતની દુનિયામાં ભારતનું પ્રદર્શન સતત સુધરી રહ્યું છે, અને આપણે 2036 ઓલિમ્પિક્સની મેજબાની કરવા માટે મજબૂત દાવેદાર તરીકે આગળ વધી રહ્યા છીએ. ભારત 2030 માં કોમનવેલ્થ ગેમ્સની મેજબાની કરવા માટે પણ તૈયાર છે."

તેમણે નોંધ્યું કે ઓલિમ્પિક રમતોમાં આશરે 40 રમતો અને 325-350 ઇવેન્ટ્સનો સમાવેશ થાય છે, અને ભારતે પોતાની ભાગીદારી વિસ્તારવાની જરૂરિયાત પર ભાર મૂક્યો: "આ 325 ઇવેન્ટ્સમાંથી લગભગ બે-તૃતીયાંશમાં ભારત ભાગ પણ લેતું નથી. આપણે ત્યાં ગેરહાજર છીએ; આપણે ક્વોલિફાય થતા નથી. અમે નિર્ણય લીધો છે કે અમે 2036 ની ઓલિમ્પિક્સ ભારતમાં યોજાય તેમ ઈચ્છીએ છીએ. ભારતે આ ક્ષેત્રો પર ધ્યાન કેન્દ્રિત કરવું જ જોઈએ. અમે એક ટેલેન્ટ-હન્ટ અભિયાન પણ શરૂ કરવા માંગીએ છીએ."

પ્રધાનમંત્રી મોદીએ આ આકાંક્ષાને લાંબા ગાળાના ટેલેન્ટ-હન્ટ અભિયાન સાથે જોડી હતી: "જો આપણને 2036 માટે એથ્લેટ્સ જોઈતા હોય, તો આપણે આજે 5, 10 કે 15 વર્ષના આ નાના બાળકો પર ધ્યાન કેન્દ્રિત કરવું પડશે. આપણે આપણી દીકરીઓ પર પણ એટલું જ ધ્યાન આપવું પડશે. દેશભરના ગામડાઓ, શહેરો અને શાળાઓમાં 5 થી 15 વર્ષની વયના બાળકોમાં રમતગમતની પ્રતિભા ઓળખવા માટે એક ટેલેન્ટ-હન્ટ અભિયાન ચલાવવામાં આવશે."

આ અભિયાન દ્વારા ઓળખાયેલા બાળકોની ક્ષમતાઓનું મૂલ્યાંકન કરવામાં આવશે અને દેશનું પ્રતિનિધિત્વ કરી શકે તેવા એથ્લેટ્સ તરીકે વિકસાવવા માટે તેમને વિશિષ્ટ તાલીમ આપવામાં આવશે, તેમ તેમણે જણાવ્યું હતું.

પ્રધાનમંત્રીએ યુવાનોમાં વધી રહેલા નશાના દૂષણના પડકાર પર પણ વાત કરી હતી અને રાષ્ટ્રીય સ્તરે એકજૂથ થઈને જવાબ આપવા આહ્વાન કર્યું હતું: "નશાનું દૂષણ દેશ અને તેના યુવાનો માટે એક મોટો પડકાર બની રહ્યું છે. 'નશા મુક્ત ભારત' એ આપણા સૌની સામૂહિક જવાબદારી હોવી જોઈએ. આપણા ઉજ્જવળ ભવિષ્ય માટે આપણી યુવા પેઢી સક્ષમ અને મજબૂત હોવી જોઈએ, અને આપણી યુવા શક્તિનો ઉપયોગ દેશની પ્રગતિ માટે થવો જોઈએ."

ભારતના વિકાસમાં યુવાનોના મહત્વ પર ભાર મૂકતા પ્રધાનમંત્રીએ કહ્યું: "વિકસિત ભારત તરફની યાત્રામાં દેશની યુવા શક્તિની ખૂબ જ મહત્વપૂર્ણ ભૂમિકા છે. યુવાનો આપણી પ્રાથમિકતા છે."

તેમણે ઉમેર્યું: "તેથી, આપણે આપણા યુવાનોની આકાંક્ષાઓ અને ભાગીદારી સાથે જોડીને 'વિકસિત ભારત'ના લક્ષ્યને આગળ ધપાવવું જોઈએ. આપણે આપણા યુવાનોને સર્વોચ્ચ પ્રાથમિકતા આપીને આગળ વધવું જોઈએ."

ભારતના સાહસિક લેન્ડસ્કેપના વિસ્તાર પર પ્રકાશ પાડતા પ્રધાનમંત્રીએ કહ્યું: "સ્ટાર્ટઅપ ઇન્ડિયા પહેલ હેઠળ હવે દેશભરમાં 2.5 લાખથી વધુ નોંધાયેલા સ્ટાર્ટ-અપ્સ છે." સરકારના ₹1 લાખ કરોડના ઇનોવેશન ફંડ તરફ ઈશારો કરતા તેમણે યુવા સાહસિકોને પ્રોત્સાહિત કર્યા: "તમારા સપના સાથે આગળ આવો; અમે સુનિશ્ચિત કરીશું કે સંસાધનોની કોઈ કમી ન રહે."

કોચિંગ વર્ગોના કારણે પરિવારો પર પડતા આર્થિક બોજને સ્વીકારીને, પ્રધાનમંત્રીએ વિવિધ સ્પર્ધાત્મક પરીક્ષાઓની તૈયારી કરતા વિદ્યાર્થીઓ માટે મફત ઓનલાઇન કોચિંગ આપવાની નવી પહેલની જાહેરાત કરી: "કોચિંગ વર્ગોનું દબાણ આપણા મધ્યમ વર્ગના પરિવારો માટે મોટો બોજ બની ગયું છે." તેમણે ઉમેર્યું: "તેથી, અમે વિવિધ પરીક્ષાઓની તૈયારી કરતા યુવાનો માટે મફત ઓનલાઇન કોચિંગ આપવાનો નિર્ણય લીધો છે."

આ યોજના કેવી રીતે અમલમાં મૂકવામાં આવશે તેની સમજ આપતા તેમણે કહ્યું: "આપણી પાસે ડિજિટલ પબ્લિક ઇન્ફ્રાસ્ટ્રક્ચર છે, આપણી પાસે ઉત્કૃષ્ટ પ્રતિભા છે, અને આપણી પાસે શિક્ષકો છે. આ સંસાધનોને એકસાથે લાવીને, અમે દેશના યુવાનોને મફત કોચિંગ પૂરું પાડવા માટે એક વ્યાપક નેટવર્ક સ્થાપિત કરવા જઈ રહ્યા છીએ."

SM/DK/JD