4 اگست 2026 کو ایئر انڈیا کے ایئربس A320 طیارے، رجسٹریشن نمبر VT-EXO، نے فوکیٹ سے دہلی کے لیے مقررہ پرواز AI 2379 کے دوران پرواز کی بلندی میں اچانک تقریباً 300 فٹ کی تبدیلی کا سامنا کیا۔ اس کے بعد طیارہ مستحکم ہو گیا اور بحفاظت دہلی میں اتر گیا۔

اس واقعے کے دوران 20 مسافروں اور عملے کے چار ارکان کے زخمی ہونے کی اطلاع ملی۔ طیارے میں 137 مسافر، جن میں تین شیر خوار بچے شامل تھے، اور عملے کے آٹھ ارکان سوار تھے۔ عملے میں دو پائلٹ اور کیبن عملے کے چھ ارکان شامل تھے۔

ڈی جی سی اے سے موصولہ معلومات اور واقعے کی نوعیت کی بنیاد پر ایئرکرافٹ ایکسیڈنٹ انویسٹی گیشن بیورو (اے اے آئی بی) نے قابل اطلاق دفعات اور آئی سی اے او کے پروٹوکول کے مطابق تحقیقات اپنے ذمے لے لی ہیں۔ اس سلسلے میں آئی سی اے او اور متعلقہ ممالک کو ضروری اطلاعات فراہم کر دی گئی ہیں۔

اس نوعیت کے طیارہ حادثے/ واقعے کی تحقیقات میں طیارے کے ڈیزائن کے ریاستی ملک اور تیاری کے ریاستی ملک کی شرکت، آئی سی اے او کے پروٹوکول کے تحت مقرر کردہ بین الاقوامی تحقیقاتی نظام کا ایک تسلیم شدہ حصہ ہے۔

اسی کے مطابق فرانس کی متعلقہ ریاست کی تحقیقاتی اتھارٹی بیورو ڈانکیٹ ای دانالیز پور لا سیکوریٹے دے لاویاسیوں سیویل (بی ای اے)، ایئربس کے تکنیکی نمائندوں کے ساتھ، اے اے آئی بی کو ضروری تکنیکی معاونت فراہم کر رہی ہے۔ اس میں قابلِ اطلاق آئی سی اے او فریم ورک کے مطابق متعلقہ تکنیکی معلومات اور ڈیزائن سے متعلق دستاویزات کی فراہمی بھی شامل ہے۔

اے اے آئی بی اس وقت تمام متعلقہ تکنیکی، آپریشنل، طبی اور انسانی عوامل سے متعلق شواہد کو منظم انداز میں جمع کرنے، محفوظ کرنے اور ان کا جائزہ لینے میں مصروف ہے۔ اس میں طیارے اور اس کے نظام کا معائنہ، ریکارڈ شدہ پرواز کا ڈیٹا، متعلقہ آپریشنل اور دیکھ بھال کے ریکارڈ، طبی معلومات اور متعلقہ افراد کے بیانات شامل ہیں۔ کسی بھی نتیجے پر پہنچنے سے پہلے تمام مادی شواہد کا مکمل طور پر جائزہ لیا جائے گا۔

تحقیقات کا واحد مقصد اس واقعے سے متعلق حالات اور معاون عوامل کا تعین کرنا اور آئندہ ایسے واقعات کی روک تھام کے لیے مناسب حفاظتی اقدامات کی نشاندہی کرنا ہے۔ تحقیقات آزادانہ، شواہد پر مبنی اور جامع ہیں، اور تحقیقات جاری رہنے کے دوران کسی ایک الگ تھلگ اطلاع کی بنیاد پر واقعے کی وجہ سے متعلق کوئی نتیجہ اخذ نہیں کیا جانا چاہیے۔

تحقیقات کے دوران جمع کیے گئے بعض ریکارڈ، بیانات، طبی معلومات اور دیگر مواد قابل اطلاق تحقیقاتی فریم ورک کے مطابق محفوظ اور خفیہ ہیں۔ تحقیقات کے عمل کی سالمیت اور رازداری برقرار رکھنا حقائق کے منصفانہ، غیر جانب دارانہ اور تکنیکی طور پر مستند تعین کے لیے ضروری ہے۔ لہٰذا اے اے آئی بی تمام متعلقہ افراد، بشمول میڈیا اور عوام، سے درخواست کرتا ہے کہ وہ تحقیقاتی عمل کا احترام کریں اور نامکمل، غیر مصدقہ یا منتخب طور پر دستیاب معلومات کی بنیاد پر نتائج اخذ کرنے سے گریز کریں۔

اے اے آئی بی تمام اہم حقائق اور متعلقہ شواہد کا احاطہ کرتے ہوئے مکمل تحقیقات کرے گا اور قابل اطلاق دفعات اور آئی سی اے او پروٹوکول کے مطابق مقررہ مدت کے اندر ابتدائی نتائج جاری کرے گا۔ تحقیقات کے مناسب مرحلے پر مزید معلومات عوام کے لیے دستیاب کرائی جائیں گی۔

اے اے آئی بی آزادانہ، شفاف اور پیشہ ورانہ تحقیقات کے عزم پر قائم ہے، جس کا بنیادی مقصد ہوابازی کی سلامتی کو یقینی بنانا ہے۔

                                               **************

ش ح۔ ف ش ع

                                                                                                                                       U: 1870