وزیر اعظم جناب نریندر مودی کی اپیل پر شروع کی گئی ملک گیر ’نشہ مکت یوا – وکست بھارت‘ مہم کو وسیع پیمانے پر عوامی تحریک کی شکل دینے کے مقصد سے آج جلگاؤں کے کلکٹر دفتر میں واقع ضلع منصوبہ بندی بھون میں روحانی اداروں، سنتوں اور سادھوؤں، عوامی نمائندوں، انتظامیہ، رضاکار تنظیموں اور سماجی اداروں کے نمائندوں کا ایک خصوصی اجلاس منعقد ہوا۔

نوجوانوں کے امور اور کھیلوں کی مرکزی وزیر مملکت محترمہ رکشا کھڈسے نے ویڈیو کانفرنسنگ کے ذریعے اجلاس سے خطاب کیا اور رہنمائی کی۔

اس موقع پر وزیر جناب سنجے ساوکرے، رکن اسمبلی جناب راجو بھولے، ضلع کلکٹر جناب روہن گھوگے، سپرنٹنڈنٹ آف پولیس جناب شری کانت دھِوارے، ضلع پریشد کی چیف ایگزیکٹو آفیسر محترمہ کرشمہ نائر، ضلع یوتھ آفیسر، ایم وائی بھارت، جناب ابھیشیک چاویئرے اور دیگر انتظامی افسران بھی موجود تھے۔

مہامنڈلیشور سوامی جناردن ہری جی مہاراج نے بھی اجلاس میں شرکت کرکے اس کی رونق بڑھائی۔ مختلف روحانی اور مذہبی اداروں، سنتوں، رضاکار تنظیموں اور سماجی شعبے کے نمائندوں نے بھی اجلاس میں شرکت کی۔

کاشی سے نشہ مکتی کا پیغام جلگاؤں کے ہر گاؤں تک پہنچنا چاہیے

اجلاس کی رہنمائی کرتے ہوئے نوجوانوں کے امور اور کھیلوں کی مرکزی وزیر مملکت محترمہ رکشا کھڈسے نے جلگاؤں ضلع میں منشیات سے نجات کی مہم میں عوام کی بڑے پیمانے پر شرکت پر زور دیا۔

انہوں نے کہا، ”کاشی سے نشہ مکتی کا پیغام جلگاؤں کے ہر گاؤں تک پہنچنا چاہیے۔ ہمارے نوجوانوں کی توانائی نشے میں نہیں بلکہ قوم کی تعمیر میں صرف ہونی چاہیے۔ ہماری کوشش ہوگی کہ جلگاؤں سے شروع ہونے والے عزم کو ہر خاندان اور ہر نوجوان تک پہنچایا جائے اور اسے ایک وسیع عوامی تحریک میں تبدیل کیا جائے۔ صحت مند، بااختیار اور نشے سے پاک نوجوان نسل ہی وکست بھارت کی حقیقی طاقت ہے۔ نشے سے پاک معاشرے کی تعمیر کے لیے ضروری ہے کہ حکومت کے ساتھ ساتھ سنت، روحانی ادارے، سماجی تنظیمیں، تعلیمی ادارے اور نوجوان بھی متحد ہوکر آگے آئیں۔“

روحانی اداروں اور سنتوں کا فیصلہ کن کردار

اجلاس میں اس بات کو اجاگر کیا گیا کہ جلگاؤں ضلع میں معاشرے کے تمام طبقات تک روحانی اداروں اور سنتوں کی وسیع رسائی کے پیش نظر، منشیات سے نجات کا پیغام ہر گاؤں تک پہنچانے میں ان کا کردار انتہائی اہم ہے۔ اس بات پر زور دیا گیا کہ نوجوانوں تک نشے سے پاک طرزِ زندگی، خود نظم و ضبط، مثبت سوچ اور صحت مند زندگی کی اہمیت پہنچانے کے لیے انہیں مسلسل بیداری پروگرام منعقد کرنے چاہئیں۔

مہامنڈلیشور سوامی جناردن ہری جی مہاراج نے کہا کہ نوجوانوں کے کردار کی تعمیر میں خاندان، معاشرے اور روحانی اداروں کا کردار نہایت اہم ہے۔

انہوں نے کہا، ”نوجوانوں کو نشے سے دور رکھنے کے لیے ان میں خود اعتمادی، اقدار اور زندگی کے تئیں مثبت نقطۂ نظر پیدا کرنا ضروری ہے۔ روحانی ادارے اور سنت اس بیداری کے کام میں فعال طور پر حصہ لیں گے۔“

نوجوانوں کی توانائی کو مثبت سمتوں میں بروئے کار لانے پر توجہ

اس بات پر زور دیا گیا کہ نشے سے نجات کی کوششوں میں محض بیداری کافی نہیں ہے۔ نوجوانوں کو کھیل، تعلیم، ہنرمندی کی ترقی، روزگار، رضاکارانہ خدمات اور ملک کی تعمیر کے مثبت مواقع سے جوڑنا ضروری ہے۔ نوجوانوں کی توانائی کو تعمیری اور مثبت کاموں کی جانب موڑنے کے لیے ایم وائی بھارت، این ایس ایس، یوتھ کلبوں، تعلیمی اداروں اور سماجی تنظیموں کے درمیان باہمی تال میل کے ساتھ کام کرنے کی ضرورت پر زور دیا گیا۔

عوامی نمائندوں کی فعال شرکت

اس موقع پر وزیر جناب سنجے ساوکرے نے نشے سے نجات کی مہم میں معاشرے کے تمام طبقات کی حکومت کے ساتھ فعال شرکت کی ضرورت پر زور دیا۔

انہوں نے کہا، ”نوجوان ملک کا مستقبل ہیں۔ انہیں نشے سے دور رکھنے کے لیے بیداری کے ساتھ ساتھ مثبت اور تعمیری اقدامات سے جوڑنا بھی ضروری ہے۔ اگر اس مہم کو عوام کی شرکت حاصل ہوتی ہے تو اس کا اثر یقینی طور پر وسیع پیمانے پر ہوگا۔“

رکن اسمبلی جناب راجو بھولے نے جلگاؤں شہر کے ساتھ ساتھ پورے ضلع کے نوجوانوں تک نشے سے نجات کا پیغام پہنچانے کے لیے مسلسل مقامی اقدامات چلانے کی ضرورت پر زور دیا۔

انہوں نے کہا، ”نشے سے پاک معاشرے کے لیے ہر خاندان اور ہر شہری کو اس کوشش میں حصہ لینا ہوگا۔ نوجوانوں کو صحیح سمت اور مثبت مواقع فراہم کرنا ہماری اجتماعی ذمہ داری ہے۔“

انتظامیہ اور سماجی تنظیموں کے باہمی تال میل سے اقدامات

اجلاس میں مہم کو مؤثر طریقے سے نافذ کرنے کے لیے ایم وائی بھارت، این ایس ایس، یوتھ کلبوں، تعلیمی اداروں، رضاکار تنظیموں، کھیلوں کی تنظیموں، روحانی اداروں اور مقامی انتظامیہ کے باہمی تال میل سے مسلسل سرگرمیاں انجام دینے پر تبادلۂ خیال کیا گیا۔

مختلف تنظیموں سے اپیل کی گئی کہ وہ اپنے پلیٹ فارمز کے ذریعے فعال طور پر حصہ لیں تاکہ جلگاؤں ضلع کے ہر گاؤں تک نشے سے نجات کا پیغام پہنچایا جا سکے، نوجوانوں میں بیداری پیدا کی جا سکے اور نشے سے دور رہنے کے لیے ایک مثبت ماحول تشکیل دیا جا سکے۔

محترم وزیر اعظم جناب نریندر مودی کی قیادت میں یہ عزم کیا گیا کہ جلگاؤں ضلع میں ’نشہ مکت یوا – وکست بھارت‘ مہم کو وسیع عوامی تحریک کی شکل دی جائے گی اور نشے سے نجات کا پیغام ہر گاؤں، ہر خاندان اور ہر نوجوان تک پہنچایا جائے گا۔

                                          *********

ش ح۔ ف ش ع

                                                                                                                                       U: 1690