नवी दिल्‍ली, 9 ऑगस्‍ट 2026

पंतप्रधान नरेंद्र मोदी यांच्या आवाहनानुसार सुरू करण्यात आलेल्या देशव्यापी ‘नशामुक्त युवा – विकसित भारत’ अभियानाला व्यापक जनआंदोलनाचे स्वरूप देण्याच्या उद्देशाने, आज जळगाव येथील जिल्हाधिकारी कार्यालयातील जिल्हा नियोजन भवनात आध्यात्मिक संस्था, संत आणि महंत, लोकप्रतिनिधी, प्रशासन, स्वयंसेवी संस्था आणि सामाजिक संस्थांच्या प्रतिनिधींची एक विशेष बैठक आयोजित करण्यात आली होती.

केंद्रीय युवक व्यवहार आणि क्रीडा राज्यमंत्री रक्षा खडसे यांनी दूरदृश्य प्रणालीमार्फत या बैठकीला संबोधित केले आणि मार्गदर्शनही केले.

यावेळी मंत्री संजय सावकारे, आमदार राजू भोले, जिल्हाधिकारी रोहन घुगे, पोलीस अधीक्षक श्रीकांत धिवारे, जिल्हा परिषदेच्या मुख्य कार्यकारी अधिकारी करिश्मा नायर, माय भारतचे जिल्हा युवा अधिकारी अभिषेक चावरे यांच्यासह इतर प्रशासकीय अधिकारीही उपस्थित होते.

महामंडलेश्वर स्वामी जनार्दन हरी जी महाराज यांनी देखील या बैठकीत हजेरी लावली. विविध आध्यात्मिक आणि धार्मिक संस्था, संत, स्वयंसेवी संस्था आणि सामाजिक क्षेत्रातील प्रतिनिधीही बैठकीत सहभागी झाले होते.

“काशीहून आलेला नशामुक्तीचा संदेश जळगाव जिल्ह्यातील प्रत्येक गावात पोहोचलाच पाहिजे”

बैठकीला मार्गदर्शन करताना, केंद्रीय युवक व्यवहार आणि क्रीडा राज्यमंत्री रक्षा खडसे यांनी जळगाव जिल्ह्यातील नशामुक्ती अभियानात नागरिकांनी मोठ्या प्रमाणात सहभागी व्हावे, असे आवाहन केले.

काशीहून आलेला नशामुक्तीचा संदेश जळगाव जिल्ह्यातील प्रत्येक गावात पोहोचलाच पाहिजे, असे रक्षा खडसे म्हणाल्या. आपल्या तरुणांची ऊर्जा व्यसनाधीनतेत नव्हे, तर राष्ट्र उभारणीसाठी वापरली पाहिजे, यावर त्यांनी भर दिला.  जळगावमधून सुरू झालेला हा संकल्प प्रत्येक कुटुंबापर्यंत आणि प्रत्येक तरुणापर्यंत पोहोचवून त्याचे एका व्यापक जनआंदोलनात रूपांतर करण्याचा आपला प्रयत्न असेल, असे त्या म्हणाल्या. एक निरोगी, सक्षम आणि व्यसनमुक्त तरुण पिढी हीच विकसित भारताची खरी ताकद आहे, हे त्यांनी अधोरेखित केले. नशामुक्त समाज घडवण्यासाठी सरकारसोबतच संत, आध्यात्मिक संस्था, सामाजिक संघटना, शैक्षणिक संस्था आणि तरुणांनी एकत्र पुढे येणे अत्यावश्यक आहे, असेही त्या म्हणाल्या.

आध्यात्मिक संस्था आणि संतांची निर्णायक भूमिका

जळगाव जिल्ह्यातील समाजाच्या सर्व स्तरांमध्ये आध्यात्मिक संस्था आणि संतांची व्यापक प्रभाव पाहता, नशामुक्तीचा संदेश प्रत्येक गावात पोहोचवण्यात त्यांची भूमिका अत्यंत महत्त्वाची आहे, यावरही या बैठकीत भर देण्यात आला. व्यसनमुक्त जीवनशैली, आत्मशिस्त, सकारात्मक विचार आणि निरोगी जीवनाचे महत्त्व तरुणांपर्यंत पोहोचवण्यासाठी अध्यात्मिक संस्था आणि संतांनी सातत्याने जनजागृती कार्यक्रम आयोजित करावेत, अशी सूचना या बैठकीत देण्यात आली.

युवकांच्या ऊर्जेला सकारात्मक दिशा देण्यावर लक्ष केंद्रित करणे

व्यसनमुक्तीच्या प्रयत्नांमध्ये केवळ जागरूकता पुरेशी नाही, असे यावेळी नमूद करण्यात आले. तरुणांना क्रीडा, शिक्षण, कौशल्य विकास, रोजगार, स्वयंसेवा आणि राष्ट्रउभारणी यांसारख्या सकारात्मक संधींशी जोडले पाहिजे. युवकांच्या ऊर्जेला विधायक आणि सकारात्मक कार्याकडे वळवण्यासाठी 'माय भारत', 'एनएसएस', युवा क्लब, शैक्षणिक संस्था आणि सामाजिक संघटनांनी समन्वयाने काम करण्याची गरज या बैठकीत व्यक्त करण्यात आली.

* * *

शैलेश पाटील/श्रद्धा मुखेडकर/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai