প্ৰধানমন্ত্ৰী শ্ৰী নৰেন্দ্ৰ মোদীয়ে আজি আই আই টি দিল্লীৰ ৫৭ সংখ্যক সমাৱৰ্তন অনুষ্ঠানত ভাষণ দিয়ে। অনুষ্ঠানটোত নিহিত হৈ থকা  গভীৰ আবেগিক অনুৰণনৰ বিষয়ে উল্লেখ কৰি প্ৰধানমন্ত্ৰীয়ে  শৈক্ষিক প্ৰতিষ্ঠানটোৰ চৌহদৰ  সজীৱতা, সপোনেৰে ভৰা পৰিৱেশৰ বিষয়ত আলোকপাত কৰে। প্ৰধানমন্ত্ৰীয়ে  ক’ভিড মহামাৰীৰ সময়ত তেওঁৰ পূৰ্বৰ ভাৰ্চুৱেল উপস্থিতিৰ কথা স্মৰণ কৰাৰ লগতে এতিয়া  স্নাতকসকলৰ মাজত শাৰীৰিকভাৱে উপস্থিত থাকিবলৈ পাই  সন্তুষ্টি প্ৰকাশ কৰে। শ্ৰী মোদীয়ে কয় যে আজি এই চৌহদত  আপোনালোকৰ সৈতে উপস্থিত থকাৰ এই অবিশ্বাস্য অভিজ্ঞতা মোৰ বাবে অতি বিশেষ।

ছাত্ৰ-ছাত্ৰী আৰু তেওঁলোকৰ পৰিয়ালক তেওঁলোকৰ সফল শৈক্ষিক কৃতিত্বৰ বাবে অভিনন্দন জনাই প্ৰধানমন্ত্ৰীয়ে  কয় যে তেওঁলোকৰ ডিগ্ৰীসমূহ শৈক্ষিক সফলতাতকৈও বহু বেছি , ই  দেশৰ বাবে অৰিহণা যোগোৱাৰ এক আদেশ । তেওঁ পদক বিজয়ীসকলক বিশেষ প্ৰশংসা কৰাৰ লগতে প্ৰতিষ্ঠানটোত নতুন নতুন এআই পদক্ষেপৰ শুভাৰম্ভণিৰ শলাগ লয়।   শ্ৰী মোদীয়ে দৃঢ়তাৰে কয় যে দেশৰ বাবে বহু কাম কৰাৰ সপোন লৈ আপোনালোকে  ইয়াৰ পৰা ওলাই গৈছে।

ছাত্ৰ-ছাত্ৰীসকলৰ বৰ্ণিল  যাত্ৰাৰ কথা উল্লেখ  কৰি প্ৰধানমন্ত্ৰীয়ে তেওঁলোকে অৰিয়েণ্টেচন ডে’ৰ পৰা সমাৱৰ্তন অনুষ্ঠানলৈ পৰিৱৰ্তন কৰাৰ বিষয়ত মন্তব্য কৰে। শিক্ষাৰ্থীসকলে প্ৰথম দৰমহা লাভ কৰাৰ পৰা  ষ্টাৰ্টআপ নিৰ্মাণ আৰু অধিক প্ৰতিযোগিতামূলক পৰীক্ষাসমূহলৈ,  যিয়ে তেওঁলোকৰ মন ভৰাই তোলে  সেই বৈচিত্ৰ্যপূৰ্ণ আকাংক্ষাসমূহৰ কথাও প্ৰধানমন্ত্ৰীয়ে  উল্লেখ  কৰে। শ্ৰী মোদীয়ে কয়  যে এই উল্লেখযোগ্য যাত্ৰা আৰু জীৱনৰ  এটা সম্পূৰ্ণ নতুন অধ্যায় আৰম্ভ কৰাৰ উৎসাহৰ পৰা আপোনালোকে  বহুত সন্তুষ্টি লাভ কৰিব লাগিব।

ছাত্ৰ-ছাত্ৰীসকলক তেওঁলোকৰ বৰ্তমানৰ মুহূৰ্তক গভীৰভাৱে উদযাপন কৰিবলৈ উৎসাহিত কৰি প্ৰধানমন্ত্ৰীয়ে হাস্যৰসেৰে উল্লেখ কৰে যে মধুৰ স্মৃতি বোৰ যেন সজীৱ হৈ থাকে।    কুমাওন, আৰা, কাৰা, বিন্ধী, নীলগিৰি, কৈলাশ আৰু হিমাদ্ৰীৰ আন্তঃহোষ্টেলৰ প্ৰতিদ্বন্দ্বিতাকে ধৰি জিয়া চৰাইৰ প’হা আৰু সাতপুৰা মেছৰ পৰঠাৰ দৰে স্থানীয় ৰান্ধনীশালৰ প্ৰিয় খাদ্যৰ স্মৃতিসমূহো সজীৱ কৰি ৰাখিব লাগিব বুলি তেওঁ কয়।  শ্ৰী মোদীয়ে মন্তব্য কৰে যে অনাগত সময়ত যেতিয়া আপোনালোকৰ ওপৰত বৃহৎ দায়িত্ব আহি পৰিব , এই  স্মৃতিবোৰে  আপোনালোকক নিশ্চিতভাৱে শক্তিশালী কৰিব। প্ৰতিষ্ঠানিক সমৰ্থন ব্যৱস্থাৰ প্ৰতি গভীৰ কৃতজ্ঞতা প্ৰকাশ কৰি প্ৰধানমন্ত্ৰীয়ে স্নাতকসকলক  তেওঁলোকৰ সমনীয়া, অধ্যাপক, গুৰু  আৰু সহায়ক কৰ্মচাৰীক আজীৱন সম্পত্তি হিচাপে স্বীকৃতি দিবলৈ আহ্বান জনায় , যিসকলে তেওঁলোকৰ পৰিয়াল হৈ পৰিছিল। শ্ৰী মোদীয়ে দৃঢ়তাৰে কয়- আপোনালোকৰ ভৱিষ্যতৰ প্ৰতিটো সফলতাত আপোনালোকে এই সকলো ব্যক্তিক গভীৰভাৱে মনত ৰাখিব আৰু তেওঁলোকৰ প্ৰতি কৃতজ্ঞতা প্ৰকাশ কৰিব। দ্ৰুতগতিত পৰিৱৰ্তিত ভূ-ৰাজনৈতিক আৰু কৌশলগত বিশ্ব পৰিৱেশৰ কথা উল্লেখ  কৰি প্ৰধানমন্ত্ৰীয়ে প্ৰযুক্তিগত উন্নতিৰ অদম্য গতিক এই বৃহৎ বিশ্ব পৰিৱৰ্তনৰ প্ৰাথমিক অনুঘটক বুলি অভিহিত কৰে। তেওঁ এই দ্ৰুত পৰিৱৰ্তনৰ যুগটোক অভূতপূৰ্ব প্ৰত্যাহ্বান আৰু বিশাল নতুন সুযোগৰ দ্বৈত পৰিৱেশ হিচাপে উল্লেখ কৰে। শ্ৰী মোদীয়ে দৃঢ়তাৰে কয় যে এই সকলোবোৰ দ্ৰুত পৰিৱৰ্তনৰ মাজত মোৰ এই কথা মনত ৰাখিব: যিজনে অহৰহ শিকে তেওঁৱেই জয়ী হ’ব।

আই আই টি ডিগ্ৰীৰ প্ৰকৃত মূল্যৰ কথা পুনৰ সংজ্ঞায়িত কৰি প্ৰধানমন্ত্ৰীয়ে কয় যে এই অৰ্হতা উচ্চ চিজিপিএ বা লাভজনক প্লেচমেণ্ট অফাৰৰ বহু ওপৰলৈ গৈছে, ইয়াৰ পৰিৱৰ্তে সমস্যা সমাধানৰ ক্ষমতাৰ ক্ষেত্ৰত ই বিশ্বজোৰা  প্ৰমাণপত্ৰ হিচাপে কাম কৰিব। শ্ৰী মোদীয়ে কয় যে আপোনালোকৰ ডিগ্ৰীয়ে সমগ্ৰ বিশ্বক কৈছে যে আপোনালোকে অতি কঠিন সমস্যা কেনেকৈ সমাধান কৰিব লাগে সেই বিষয়ে সঠিকভাৱে জানে।

শৈক্ষিক অধ্যৱসায় আৰু আজীৱন স্থিতিস্থাপকতাৰ বিষয়ে উল্লেখ কৰি প্ৰধানমন্ত্ৰীয়ে যুৱক-যুৱতীসকলক পৰীক্ষাগাৰৰ জটিল  বিষয়ৰ সমাধানৰ দৰেই জীৱনৰ বৃহৎ প্ৰত্যাহ্বানসমূহো একেদৰে  মোকাবিলা কৰিবলৈ পৰামৰ্শ দিয়ে। "জীৱনত যদি অসুবিধা অনিবাৰ্যভাৱে আহে, তেন্তে সম্পূৰ্ণ নতুন সুযোগৰো উত্থান ঘটিব ; মাত্ৰ সম্পূৰ্ণ সজাগ হৈ থাকিব লাগিব," শ্ৰী মোদীয়ে কয়।

চিৰাচৰিত শৈক্ষিক পৰিৱেশৰ বিপৰীতে প্ৰধানমন্ত্ৰীয়ে স্নাতকসকলক কয় যে তেওঁলোকৰ জীৱন বিশ্ববিদ্যালয়ৰ পৰীক্ষাৰ দৰে নহয়, জীৱনৰ আটাইতকৈ জটিল প্ৰত্যাহ্বানসমূহে সম্পূৰ্ণৰূপে ‘আউট অৱ চিলেবাছ’ হিচাবে কাম কৰে। তেওঁ কয় যে প্ৰকৃত সফলতা কেৱল পূৰ্বনিৰ্ধাৰিত প্ৰশ্নৰ উত্তৰ দিয়াতেই নহয়, সমাজে চিহ্নিত কৰা  সমস্যাসমূহ চিনাক্ত কৰি সমাধান কৰাত নিহিত হৈ থাকে। শ্ৰী মোদীয়ে  কয় যে বহু প্ৰাক্তন ছাত্ৰ-ছাত্ৰীৰ সফলতাৰ মৌলিক কাৰণ আছিল যে তেওঁলোকে সেই গুৰুত্বপূৰ্ণ প্ৰশ্নবোৰক সাহসেৰে চিনাক্ত কৰিছিল,  যিবোৰক বিশ্বই প্ৰশ্ন হিচাপে বিবেচনা কৰা বন্ধ কৰি দিছিল।

বিগত প্ৰজন্মই বহন কৰিবলগীয়া হোৱা ঐতিহাসিক বোজাৰ কথা উল্লেখ কৰি প্ৰধানমন্ত্ৰীয়ে স্বাধীনতা লাভৰ একক লক্ষ্যই কেনেকৈ অপৰিসীম ত্যাগ আৰু তপস্যাৰে চিহ্নিত এক সমগ্ৰ যুগক সংজ্ঞায়িত কৰিছিল সেই কথা স্মৰণ কৰে। তেওঁ বৰ্তমানৰ প্ৰজন্মক কয় যে তেওঁলোকে নিজৰ কেৰিয়াৰ ট্ৰেজেক্টৰীসমূহক অহা তিনিটা দশকৰ দেশৰ উন্নয়নমূলক লক্ষ্যৰ সৈতে পোনপটীয়াকৈ সম্পৃক্ত কৰি  নিজৰ উত্তৰাধিকাৰ সংজ্ঞায়িত কৰক। শ্ৰী মোদীয়ে  কয় যে আপোনালোকৰ প্ৰতিটো সিদ্ধান্তৰ ভিত্তি এনে  হ’ব লাগে যে দেশৰ বাবে তাৰ পৰা  কি লাভ হ’ব আৰু  সেই সিদ্ধান্তই কোনটো জাতীয় প্ৰয়োজন পূৰণ কৰিব।

অৰ্থনৈতিক, প্ৰযুক্তিগত আৰু ঔদ্যোগিক খণ্ডত ব্যাপক আত্মনিৰ্ভৰশীলতাৰ দিশত চৰকাৰে অব্যাহত ৰখা পদক্ষেপৰ বিষয়ে  বিশদ বিৱৰণ দি প্ৰধানমন্ত্ৰীয়ে এই কথাত গুৰুত্ব আৰোপ কৰে যে যুৱ সবলীকৰণ হৈছে বিকশিত ভাৰতৰ মূল স্তম্ভ। তেওঁ গণতান্ত্ৰিকীকৰণেৰে পৰম্পৰাগতভাৱে নিষিদ্ধ খণ্ডসমূহ যুৱ উদ্ভাৱকৰ বাবে মুকলি কৰি দিবলৈ  প্ৰশাসনে গ্ৰহণ কৰা কৌশলগত নীতিৰ প্ৰশংসা কৰে। শ্ৰী মোদীয়ে কয় যে দেশৰ যুৱক-যুৱতীসকল যিমানেই ক্ষমতাশালী হ’ব সিমানেই সমগ্ৰ দেশ শক্তিশালী হ’ব।  চৰকাৰী সংস্কাৰৰ পিছত মহাকাশ খণ্ডৰ লক্ষ্যণীয় বৃদ্ধিৰ বিষয়ত  আলোকপাত কৰি প্ৰধানমন্ত্ৰীয়ে বৰ্তমান  নিজাকৈ ৰকেটৰ ডিজাইন আৰু উৎক্ষেপণ কৰা যুৱ অভিযন্তাসকলৰ  সফলতাক প্ৰশংসা কৰে,  যি কৃতিত্ব পূৰ্বতে মুষ্টিমেয় দেশৰ  মাজত সীমাবদ্ধ আছিল। শ্ৰী মোদীয়ে কয় , "আজি সেই একেটা মহাকাশ খণ্ডই সুন্দৰভাৱে আমাৰ হাজাৰ হাজাৰ যুৱক-যুৱতীৰ বাবে নতুন সুযোগৰ দুৱাৰ মুকলি কৰি দিছে।"

অৰ্ধপৰিবাহী নিৰ্মাণৰ দ্ৰুত ঘৰুৱা অগ্ৰগতিৰ দিশটোলৈ আঙুলিয়াই দি  প্ৰধানমন্ত্ৰীয়ে অতীতৰ সন্দেহক উলাই কৰি গৌৰৱেৰে উল্লেখ কৰে যে প্ৰাৰম্ভিক উৎপাদন ইউনিটসমূহ ইতিমধ্যে কাৰ্যক্ষম হৈ আছে আৰু এই বিষয়ত অপৰিসীম ৰাষ্ট্ৰীয় আস্থা বৃদ্ধি কৰিছে। শ্ৰী মোদীয়ে মন্তব্য কৰে যে ক’ৰবাত এজন যুৱকে সম্পূৰ্ণ আত্মবিশ্বাসেৰে গৌৰৱেৰে কৈছে- ‘ভাৰতত চিপ প্ৰস্তুতৰ বাসনা  মোৰ তেজত আছে’।

ড্ৰ’ন খণ্ডৰ পৰিৱৰ্তনশীল প্ৰভাৱৰ কথা  উল্লেখ  কৰি প্ৰধানমন্ত্ৰীয়ে কয় যে যুৱ উদ্ভাৱকসকলে কৃষি আৰু চিকিৎসা প্ৰদানৰ পৰা আৰম্ভ কৰি ৰাষ্ট্ৰীয় প্ৰতিৰক্ষালৈকে ক্ষেত্ৰসমূহত কেনেদৰে বৈপ্লৱিক পৰিৱৰ্তন আনিছে। শ্ৰী মোদীয়ে কয় যে আজি এই খণ্ডত অতিকৈ অনুপ্ৰাণিত হোৱা যুৱক-যুৱতীসকলে সক্ৰিয়ভাৱে  নতুন সম্ভাৱনাৰ সৃষ্টি কৰিছে। ভাৰতৰ ষ্টাৰ্টআপ বিপ্লৱক শক্তিশালী কৰাৰ ক্ষেত্ৰত বৰ্তমানৰ প্ৰজন্মৰ অৱদানক  কৃতিত্ব দি প্ৰধানমন্ত্ৰীয়ে ইউনিকৰ্ণ, ডিজিটেল পেমেণ্ট আৰু ফিনটেকৰ উত্থানে সৃষ্টি কৰা বৃহৎ অৰ্থনৈতিক গতিক  প্ৰশংসা কৰে। যিয়ে লাখ লাখ লোকক অভূতপূৰ্ব উদ্যোগীকৰণৰ মঞ্চ প্ৰদান কৰিছে। শ্ৰী মোদীয়ে দৃঢ়তাৰে কয় যে এই সকলোবোৰ বিপ্লৱে দেশৰ লাখ লাখ যুৱক-যুৱতীক প্ৰথমবাৰৰ বাবে সম্পূৰ্ণ নতুন কিবা এটা কৰাৰ এক সুযোগ দিছে।

ভৱিষ্যতৰ প্ৰযুক্তিগত আধিপত্যৰ সীমা নিৰ্ধাৰণ কৰি প্ৰধানমন্ত্ৰীয়ে কৃত্ৰিম বুদ্ধিমত্তা, ডাটা চেণ্টাৰ, গুৰুত্বপূৰ্ণ  খনিজ, গভীৰ সাগৰৰ অন্বেষণ, কোৱাণ্টাম কম্পিউটিং, শক্তি নিৰাপত্তাৰ দৰে জটিল উদীয়মান খণ্ডসমূহৰ বিষয়ত আলোকপাত কৰে। শ্ৰী মোদীয়ে লক্ষ্য কৰে যে এনে বহু অত্যাধুনিক ক্ষেত্ৰই আপোনালোকৰ অপৰিসীম প্ৰতিভা, আপোনালোকৰ সাহসী উদ্ভাৱন আৰু আপোনালোকৰ শক্তিশালী নেতৃত্বৰ বাবে আগ্ৰহেৰে অপেক্ষা কৰি আছে।

উন্নত গৱেষণাৰ দিশত এক বৃহৎ ৰাষ্ট্ৰীয় উদ্যমৰ বিষয়ত গুৰুত্ব আৰোপ কৰি প্ৰধানমন্ত্ৰীয়ে প্ৰধানমন্ত্ৰীৰ গৱেষণা ফেল’শ্বিপ আৰু অনুসন্ধান ৰাষ্ট্ৰীয় গৱেষণা ন্যাস স্থাপনকে ধৰি শক্তিশালী সমৰ্থন ব্যৱস্থাৰো ৰূপৰেখা দাঙি ধৰে, যাৰ বাবে  এক লাখ কোটি টকা পৰ্যন্ত অভূতপূৰ্ব পুঁজিৰ লক্ষ্য স্থিৰ কৰা হৈছে। শ্ৰী মোদীয়ে কয় যে আজি দেশখনক নতুন গৱেষণাৰ অতি প্ৰয়োজন আৰু আমাৰ প্ৰশাসনিক মনোযোগ সমানে আৰু দৃঢ়ভাৱে  তেনে গৱেষণাত সহায় কৰিব।  শৈক্ষিক সম্পদসমূহৰ গণতান্ত্ৰিকীকৰণ কৰাৰ পদক্ষেপসমূহৰ বিষয়ে বিশদ বিৱৰণ দাঙি ধৰি প্ৰধানমন্ত্ৰীয়ে ‘এক জাতি এক চাবস্ক্ৰিপচন’ কাৰ্যসূচীৰ বিষয়ত আলোকপাত কৰে, যিয়ে নিশ্চিত কৰে যে বিশ্বৰ প্ৰতিষ্ঠিত গৱেষণাধৰ্মী  আলোচনীসমূহ আনকি সৰু চহৰসমূহতো অতিৰিক্ত খৰচ নোহোৱাকৈয়ে সুলভ হৈ পৰিছে। এই গৱেষণা নৱজাগৰণক আগুৱাই নিয়াৰ বাবে যুৱক-যুৱতীসকলৰ প্ৰতিশ্ৰুতিৰ বিষয়ত  সম্পূৰ্ণ আস্থা ব্যক্ত কৰি  তেওঁ আগন্তুক দীঘলীয়া যাত্ৰাৰ বাবে সকলোকে সাজু হ'বলৈ কয়।  শ্ৰী মোদীয়ে দৃঢ়তাৰে কয় যে গৱেষণা সম্পৰ্কীয় এই কীৰ্তিচিহ্নস্বৰূপ কাম আপোনালোক সকলোৰে অটল দায়বদ্ধতাৰ জৰিয়তেহে হ’ব পাৰে।

ছ’চিয়েল মিডিয়া যুগৰ বিষাক্ত বাতাবৰণৰ বিষয়ত স্নাতকসকলক সজাগ কৰি দি প্ৰধানমন্ত্ৰীয়ে তেওঁলোকক নিজৰ দৰমহা, প্লেচমেণ্ট, বা ষ্টাৰ্টআপৰ মাইলৰ খুঁটিক সমনীয়াৰ সৈতে তুলনা কৰাটো সম্পূৰ্ণৰূপে এৰাই চলিবলৈ আহ্বান জনায়। তেওঁ তেওঁলোকক নিজৰ মানসিক আৰু শাৰীৰিক সুস্থতাক অগ্ৰাধিকাৰ দিয়াৰ লগতে আত্ম-উন্নতিৰ বিষয়ত  কঠোৰভাৱে মনোনিৱেশ কৰিবলৈ পৰামৰ্শ দিয়ে। ''মনত ৰাখিবা, জীৱনটো কোনোপধ্যে সফলতাৰ মাপকাঠী থকা লিডাৰ-ব'ৰ্ড নহয়; আপোনালোকৰ প্ৰকৃত প্ৰতিযোগিতা  আন কাৰো লগত নহয়, নিজৰ লগত।’- শ্ৰী মোদীয়ে কয়।

ভাষণৰ সামৰণিত প্ৰধানমন্ত্ৰীয়ে ছাত্ৰ-ছাত্ৰী, তেওঁলোকৰ অভিভাৱক, তেওঁলোকৰ শিক্ষক আৰু এই মাইলৰ খুঁটি স্পৰ্শ কৰাত তেওঁলোকক পথ প্ৰদৰ্শন কৰা প্ৰতিষ্ঠানটোৰ সমগ্ৰ  সহায়ক নেটৱৰ্কলৈ অভিনন্দন জ্ঞাপন কৰে। শ্ৰী মোদীয়ে মন্তব্য কৰে যে আপোনালোকৰ ভৱিষ্যত অবিশ্বাস্যভাৱে উজ্জ্বল হওক আৰু আপোনালোকে নিৰন্তৰভাবে সাহসেৰে নতুন উচ্চতা স্পৰ্শ কৰক।

Delighted to join the Convocation Ceremony of IIT Delhi. My best wishes to all the graduating students.@iitdelhi https://t.co/Lhuq4yUzJW

— Narendra Modi (@narendramodi) August 8, 2026

********

MJPS/SS/PRK/DM