మహారాష్ట్ర... సతారా జిల్లాలో రహస్యంగా నడుపుతున్న ఓ మాదక ద్రవ్యాల తయారీ కేంద్రంపై డీఆర్ఐ అధికారులు దాడులు చేశారు. ఈ ఆపరేషన్‌లో వివిధ రూపాల్లో ఉన్న సైకోట్రాపిక్ పదార్థాలతోపాటు వాటి తయారీకి ఉపయోగించే సుమారు 400 లీటర్ల ముడి సరుకును అధికారులు స్వాధీనం చేసుకున్నారు. ఈ వ్యవహారంలో ఇద్దరిని అరెస్టు చేశారు.

పక్కా సమాచారంతో 2026 ఆగస్టు 01న సతారా జిల్లాలోని తయారీ కేంద్రంపై డీఆర్ఐ అధికారులు మెరుపు దాడులు నిర్వహించారు. ఎన్‌డీపీఎస్ చట్టం 1985 ప్రకారం నిషేధిత అల్ప్రజోలం, డైజిపామ్ ను ఇక్కడ రహస్యంగా తయారు చేస్తూ అక్రమంగా తరలిస్తున్నట్లు అధికారులు గుర్తించారు. దాడుల సమయంలో తయారీదారుడిని అక్కడికక్కడే అదుపులోకి తీసుకున్నారు.

అధికారుల తనిఖీల్లో సుమారు కిలో పూర్తిగా తయారైన అల్ప్రజోలం, 15 కిలోలకు పైగా సగం తయారైన రూపంలో ఉన్న అల్ప్రజోలం, సుమారు 3.75 కిలోల డైజిపామ్ ను స్వాధీనం చేసుకున్నారు. వీటి తయారీకి ఉపయోగించే సుమారు 400 లీటర్ల వివిధ రకాల ముడి పదార్థాలు, రసాయన మిశ్రమాలను కూడా స్వాధీనం చేసుకున్నారు. ఈ అక్రమ సరుకంతటినీ ఎన్‌డీపీఎస్ చట్టం 1985 నిబంధనల కింద జప్తు చేశారు.

మత్తు పదార్థాలను కొనుగోలుకు సిద్ధమైన ఓ వ్యక్తిని పూణేలో అదుపులోకి తీసుకున్నారు. నిందితుల అక్రమ లావాదేవీలకు సంబంధించిన కీలక ఆధారాలను అధికారులు సేకరించారు.

అల్ప్రజోలం, డైజిపామ్ లు బెంజోడయాజెపైన్ వర్గానికి చెందినవి. ఆందోళన, పానిక్ అటాక్‌, నిద్రలేమి, మూర్ఛ, ఇతర నాడీ సంబంధిత సమస్యల చికిత్సకు వైద్యుల పర్యవేక్షణలో వీటిని ఉపయోగిస్తారు. మత్తును కలిగించే గుణం, బానిసగా మార్చే స్వభావం కలిగి ఉండటం వల్ల ఎన్‌డీపీఎస్ చట్టం 1985 కింద నియంత్రించారు. వీటిని అక్రమంగా తయారు చేయడం, రవాణా చేయడం ప్రజా ఆరోగ్యానికి తీవ్ర ముప్పుగా మారుతుంది. వీటి దుర్వినియోగం వల్ల మత్తుకు బానిస కావడం, మెదడు దెబ్బతినడం వంటి తీవ్రమైన ఆరోగ్య సమస్యలు తలెత్తుతాయి.

నిందితులు గతంలోనూ ఇలాంటి అక్రమ మాదకద్రవ్యాల తయారీ, రవాణా కార్యకలాపాలలో పాల్గొన్నట్లు ప్రాథమిక విచారణలో వెల్లడైంది. ఎన్‌డీపీఎస్ చట్టం 1985 నిబంధనల ప్రకారం ఇద్దరు నిందితులను అధికారులు అరెస్టు చేశారు.

***