Ka Tnad Textiles kan rakhe ia ka National Handloom Day kaba 12 ha ka 7 tarik Nailar 2026 da ka jingialang ha ka ri ha Rashtrapati Bhavan Cultural Centre (RBCC), New Delhi, ban rakhe ia ka pateng shna jain ba riewspah jong ka India bad ban ithuh ia ka jingnoh synniang ka kam thain jain sha ka jingkyntiew ia ka kolshor bad ka ka ioh ka kot jong ka ri.

Ka President ba donburom jong ka India, ka Droupadi Murmu, kan plie pyrda ia ka jingialang kum ka Kongsan. Ha kane ka sngi yn iadonlang ruh u Myntri Sorkar Pdeng ba dei khmih ia ka tnad Textiles u Giriraj Singh, u Myntri Khynnah ka sorkar pdeng ba dei khmih ia ka tnad Textiles u Pabitra Margherita, ka Neelam Shami Rao, Secretary (Textiles) bad ka Dr. M. Beena, Development Commissioner (Handlooms).

Ha kane ka jingrakhe yn ïashim bynta da ki nongïoh khusnam Sant Kabir Handloom Awards bad National Handloom Awards bad kiba haïing hasem jong ki, ki nongthaiñ jain na kylleng ka ri, ki dkhot jong ka Awards Selection Committee, ki riew pawkhmat kiba don bynta bad ka kam shna jain, ki heh sorkar, ki nongmihkhmat na ki lad pathai khubor bad kiwei kiwei kiba shah khot kyrpang.

Ka bynta kaba kongsan jong kane ka jingrakhe kan long ka jingai ia ka khusnam Sant Kabir Handloom Awards bad ka National Handloom Awards na ka bynta u snem 2025. Baroh 22 tylli ki khusnam, kiba kynthup 03 tylli ki khusnam Sant Kabir Handloom Awards bad 19 tylli ki khusnam National Handloom Awards, yn ai ïa ki nongthain jain kiba tbit namar ka jingnohsynniang jong ki sha ka jingtrei kti, ka jingsaindur thymmai bad ka jingnohsynniang sha ka jingpynneh pynsah ia ki dustur thain jain jong ka India.

Ha kane ka sngi yn sakhi ruh ïa ka jingpyllait paidbah ia saw tylli ki stamp kynmaw burom kiba rakhe ïa ka jingriewspah bad ki dustur thain jain ba iar jong ka India.

Ha kane ka jingïalang yn plie paidbah ruh ïa artylli ki kot—"Earth. Root. Thread – Aal Dyed Handloom Textiles of Central India" bad ka Handloom Awards Book 2025.

Yn pynlong ia ka jingpyni ia ki tiar shna kti kiba la ioh khusnam ha ki bynta ba shadien jong kane ka jingialang. Ki nongwan jngohkai kin ioh ruh ka lad ban sakhi ia ki jingpyni live ia ka rukom thain jain Kani bad ka jingthain jain Wall Hanging, kaba pyni ia ka jingiar bad ka jingtrei kti jong ki dustur thain jain jong ka India.

Nalor ka jingïalang ba kongsan ha ka 7 tarik u Nailar, 2026, kiwei pat ki jingïalang ba kongsan kiba la pynkhreh ha ka National Handloom Day ki kynthup ïa ki jingpyni, ki jingïalang (nongsaindur, IIHT) bad kiwei kiwei.

Ka kam shna jain jong ka India ka dang iai bteng ban long kawei na ki lad ba heh tam jong ka ri ha ka jingioh kam ioh jam ha ki jaka nongkyndong kaba lah ban iaineh, kaba kyrshan ia ka kamai kajih jong palat 35 lak ngut ki briew, ha kaba ki longkmie ki long palat 70 percent na ki nongtrei. Nalor ka jingkongsan jong ka ha ka liang ka ioh ka kot, kane ka kam ka dang long ka nongsumar ia ki riti dustur ba riewspah jong ka India ha kaba iadei bad ka kam jain bad ka nongnoh synniang kaba kongsan sha ki rukom pynmih jain kiba pynneh pynsah ia ka mariang.

Ia ka National Handloom Day la ju rakhe man u snem ha ka 7 tarik u Nailar ban kynmaw burom ia ka Swadeshi Movement kaba la sdang ha ka 7 tarik u Nailar 1905, kaba ai bor thymmai ia ki karkhana hapoh ri bad ia ka kam shna jain jong ka India. Ka jingrakhe ka ithuh ia ka jingnoh synniang kaba iaibteng jong ki nongthain jain sha ka kolshor jong ka ri bad ka jingkyntiew ia ka imlang sahlang bad ka ioh ka kot.

Naduh ba la sdang ha u snem 2015, ka National Handloom Day ka la long kum ka jingialang ban rakhe ïa ka jingtbit, ka sap bad ka jingaiti lut jong ki nongthaiñ jaiñ jong ka India katba ka pynskhem biang ïa ka jingkut jingmut jong ka Sorkar ban pynneh pynsah, kyntiew bad jingkyntiew ia ka kam thain jain kaba lah ban iaineh.

*****