محترمہ ورشا آشوک اگلاوے نے جیولوجیکل سروے آف انڈیا (جی ایس آئی) کی 54ویں ڈائریکٹر جنرل کے طور پر چارج سنبھال لیا ہے، اور بھارت کی اس معروف ارضیاتی تنظیم کے 176 سالہ تاریخ میں اس کے سربراہ کے طور پر خدمات انجام دینے والی پہلی خاتون بن گئی ہیں۔ انھوں نے جناب اسِت ساہا کی جگہ لی ہے، جنھوں نے 27 جولائی 2024 سے 31 جولائی 2026 تک ڈائریکٹر جنرل کے طور پر خدمات انجام دیں۔

تین دہائیوں سے زیادہ کے پیشہ ورانہ تجربے کی حامل ایک ممتاز ارضیاتی سائنس داں، محترمہ اگلاوے نے انڈین بیورو آف مائنز میں خدمات انجام دینے کے بعد 1992 میں جی ایس آئی میں شمولیت اختیار کی۔ اپنے کیریئر کے دوران، انھوں نے مرکزی ہیڈکوارٹرز میں خدمات کے علاوہ جی ایس آئی کے مرکزی، شمالی اور مشرقی علاقوں میں کئی اہم سائنسی اور انتظامی عہدوں پر کام کیا۔ موجودہ عہدہ سنبھالنے سے پہلے، وہ کولکتہ میں مشرقی علاقے کی اضافی ڈائریکٹر جنرل اور محکمہ کی سربراہ تھیں۔

قدیم حیاتیات اور پیلینولوجی کی ماہر، محترمہ اگلاوے نے لیٹ کرٹیشس-پیلؤسین تہوں، کے-ٹی سرحد، اور ستپورہ-گونڈوانا بیسن کے مطالعہ و تحقیق میں اہم حصہ ڈالا ہے۔ انھوں نے مرکزی بھارت میں سالبردی-گھورپنڈ علاقے کو ڈائنوسار کے نئے گھونسلے بنانے کی جگہ کے طور پر رپورٹ کیا، بین الاقوامی تحقیق میں حصہ ڈالا اور یو ایس اے کی یونیورسٹی آف مشی گن میوزیم آف پیلینٹولوجی کے ساتھ مشترکہ قدیم حیاتیاتی مطالعات میں شرکت کی۔ انھوں نے کینیڈا کے ٹورنٹو میں پی ڈی اے سی 2023 میں بھارتی وفد کے رکن کے طور پر جی ایس آئی کی نمائندگی بھی کی۔

اپنی سائنسی شراکتوں کے علاوہ، انھوں نے جی ایس آئی کی ادارہ جاتی صلاحیتوں کو مضبوط بنانے میں اہم کردار ادا کیا ہے، جس میں لکھنؤ میں شمالی علاقہ کے دفتر میں ایک جدید ترین پیلینولوجی لیبارٹری قائم کرنا اور پورے ملک میں کثیر الشعبہ ارضیاتی سائنسی پروگراموں کی قیادت کرنا شامل ہے۔

عہدہ سنبھالنے پر، محترمہ اگلاوے نے اہم معدنی تلاش اور معدنی سلامتی کے شعبوں میں بھارت سرکار کی ترجیحات کے ساتھ اپنے پروگراموں کو ہم آہنگ کرنے کے جی ایس آئی کے عزم کی تصدیق کی۔ انھوں نے جدید ارضی طبیعی تحقیقات، تیز رفتار تلاش کے پروگراموں اور مضبوط لیبارٹری بنیادی ڈھانچے کے ذریعے گہرائی میں موجود اور چھپے ہوئے معدنی ذخائر کی تلاش میں تیزی لانے پر زور دیا۔ انھوں نے سمندری معدنی تلاش کو وسعت دینے، جدید ترین ارضیاتی سائنسی تحقیق کو فروغ دینے، قدرتی خطرات کے مطالعے اور گلیشیالوجی جیسے عوامی بہبود کے ارضیاتی سائنس پروگراموں کو مضبوط بنانے، اور نوجوان ارضیاتی سائنس دانوں کے لیے سائنسی اشاعتوں اور صلاحیت سازی کو بڑھانے کی ضرورت کو بھی اجاگر کیا۔

جی ایس آئی کی سائنسی مہارت اور بڑھتی ہوئی تکنیکی صلاحیتوں پر اعتماد کا اظہار کرتے ہوئے، انھوں نے کہا کہ تنظیم ملک کی اہم اور حکمتِ عملی کے مطابق معدنیات کی بڑھتی ہوئی طلب کو پورا کرنے کے ساتھ ساتھ ارضیاتی سائنسی برتری اور جدت طرازی کے ذریعے پائیدار وسائل کی ترقی میں اپنا حصہ ڈالنے کے لیے بہتر پوزیشن میں ہے۔

***

(ش ح - ع ا)

U.No. 1092

(रिलीज़ आईडी: 2292773) आगंतुक पटल : 9