گورنمنٹ ای مارکیٹ پلیس (جی ای ایم) نے آج باضابطہ طور پر اپنے دسویں یومِ تاسیس کے سلسلے میں 10 روزہ جشن کا آغاز کر دیا ہے، جو کہ ٹیکنالوجی، شفافیت اور شمولیت کے ذریعے سرکاری خریداری میں انقلابی تبدیلی لانے کی ایک دہائی مکمل ہونے کی خوشی میں شراکت داروں کی شمولیت کے اقدامات کے ایک سلسلے کا آغاز ہے۔

جشن کا آغاز گورنمنٹ ای مارکیٹ پلیس کے دسویں یومِ تاسیس کے آفیشل لوگو کی رونمائی سے ہوا، جو بھارت کے قابلِ اعتماد ڈیجیٹل سرکاری خریداری کے ایکو سسٹم کی تعمیر میں جی ای ایم کے دس سالہ سفر کی علامت ہے۔ اس یادگاری لوگو پر مبنی ایک تصوراتی فلم بھی دکھائی گئی، جس میں جی ای ایم کے ارتقاء، اہم سنگِ میل اور مستقبل کے وژن کو اجاگر کیا گیا ہے۔

اجتماع سے خطاب کرتے ہوئے، گورنمنٹ ای مارکیٹ پلیس کے سی ای او مہر کمار نے گزشتہ دہائی کے دوران ادارے کے انقلابی سفر پر روشنی ڈالی اور ترقی، جدت طرازی اور اسٹیک ہولڈرز پر مرکوز سرکاری خریداری کے اگلے مرحلے کے لیے اپنے وژن کا خاکہ پیش کیا۔

اس تقریب میں ادارے کے اندرونی ہندی میگزین جی ای ایم بھارتی کے تازہ ترین ایڈیشن کا اجراء بھی عمل میں آیا، اور ملازمین کو ان کی مثالی خدمات اور طویل ملازمت کے اعتراف میں اعزازات سے نوازا گیا۔

جشن کے ایک حصے کے طور پر، گورنمنٹ ای مارکیٹ پلیس 5 اگست کو 'بائر میٹ' (خریداروں کی میٹنگ) اور 10 اگست کو 'سیلر راؤنڈ ٹیبل' (فروخت کنندگان کا گول میز اجلاس) منعقد کرے گی، جس کا اختتام دسویں یومِ تاسیس کی تقاریب پر ہوگا۔ اس موقع پر ممتاز خریداروں اور فروخت کنندگان کو جی ای ایم کے ایکو سسٹم کو مضبوط بنانے میں ان کی مثالی خدمات کے اعتراف میں اعزاز سے بھی نوازا جائے گا۔

یومِ تاسیس کی تقریبات کا آغاز ملک بھر میں شراکت داروں کی شمولیت کے اقدامات اور رسائی کے پروگراموں کے سال بھر جاری رہنے والے سلسلے کی شروعات کی علامت بھی ہے۔ خصوصی تقاریب، مکالموں اور اشتراکی پلیٹ فارموں کے ذریعے، جی ای ایم خریداروں، فروخت کنندگان، پالیسی سازوں، صنعت کے نمائندوں اور ایکو سسٹم کے شراکت داروں کو ایک جگہ جمع کرے گا تاکہ سرکاری خریداری میں انقلابی تبدیلی لانے کی ایک دہائی کا جشن منایا جا سکے، اور ساتھ ہی ملک بھر میں شفاف، مؤثر اور جامع طرزِ حکمرانی کو فروغ دینے میں اپنے تعاون کا مظاہرہ کیا جا سکے۔

**********

 (ش ح –ا ب ن)

U.No:1074