بستر منڈل کے ایک وفد جس میں بستر پنڈم 2026 کے فاتحین، پرگنہ مانجھی اور بستر کے چالکی شامل تھے، نے صدر جمہوریہ ہند دروپدی مرمو آج راشٹرپتی بھون کلچرل سینٹر میں30 جولائی 2026کو ملاقات کی۔ اس موقع پر موجود معززین میں مرکزی وزیر داخلہ و کو آپریٹو جناب امت شاہ اور چھتیس گڑھ کے وزیر اعلیٰ وشنو دیو سائی بھی موجود تھے۔

اجتماع سے خطاب کرتے ہوئے صدر جمہوریہ نے کہا کہ بستر پنڈم محض ایک ثقافتی تقریب نہیں ہے۔ یہ بستر کی شاندار روایات اور ثقافتی شناخت کا جشن ہے۔ اس کا مقصد قومی اور بین الاقوامی دونوں پلیٹ فارمز پر بستر کی حقیقی شناخت قائم کرنا ہے۔ انہوں نے اس بات پر زور دیا کہ بستر پنڈم جیسے واقعات نے نوجوانوں کو ان کی روایات، رسم و رواج اور ثقافتی ورثے سے دوبارہ جوڑنے میں اہم کردار ادا کیا ہے۔ اس طرح کی تقریبات سے سیاحت کو بھی فروغ ملتا ہے اور روزگار کے مواقع بھی پیدا ہوتے ہیں۔

صدر نے سماجی زندگی اور ثقافتی اقدار کے تحفظ میں مانجھی اورچالکی کے کردار کو سراہا۔ انہوں نے کہا کہ وہ کمیونٹی اور انتظامیہ کے درمیان ایک موثر پل ہیں۔ انہوں نے یقین ظاہر کیا کہ اپنی لگن اور قیادت کے ذریعے وہ معاشرے میں خوشی، امن اور خوشحالی کے لیے کام کرتے رہیں گے۔

صدر کو یہ جان کر خوشی ہوئی کہ حکومت کی کوششوں اور بستر کے لوگوں کی فعال شراکت سے یہ خطہ ترقی کی نئی راہ پر گامزن ہے۔ انہوں نے کہا کہ لوگ تشدد کے ماحول سے نکل کر تعلیم، روزگار اور ترقی کے نئے مواقع حاصل کر رہے ہیں۔ یہ تبدیلی بستر کے روشن مستقبل کی علامت ہے۔ سڑکیں، بجلی اور پینے کا پانی جیسی سہولیات دور دراز کے دیہاتوں تک بھی پہنچ رہی ہیں۔ طویل عرصے سے بند اسکول ایک بار پھر بچوں سے کھچا کھچ بھر رہے ہیں اور تعلیم کی روشنی ہر گھر تک پہنچ رہی ہے۔ آج بستر میں امید، بھروسے اور ترقی کا ماحول بن رہا ہے۔ یہ تبدیلی پوری قوم کے لیے خوشی اور فخر کا باعث ہے۔

صدر نے کہا کہ قبائلی نوجوان تعلیم، سائنس، آرٹ اور کھیل جیسے مختلف شعبوں میں اپنی صلاحیتوں کا لوہا منو رہے ہیں۔ قبائلی لوگ کھیل اور فن میں فطری ہنر رکھتے ہیں۔ انہیں یہ جان کر خوشی ہوئی کہ حال ہی میں چھتیس گڑھ میں بستر اولمپکس کا انعقاد کیا گیا تھا۔

صدر نے اس اعتماد کا اظہار کیا کہ قبائلی عوام ترقی کے سفر میں حصہ لیں گے اور اپنی ثقافتی شناخت کو محفوظ اور فروغ دیتے ہوئے قوم کی تعمیر میں اپنا حصہ ڈالیں گے۔ انہوں نے کہا کہ تعاون اور ہم آہنگی کے کلچر کو مضبوط کرنا ہمارا فرض ہے۔ انہوں نے خواتین، بچوں، معاشرے کے محروم طبقات اور بزرگ شہریوں کو بااختیار بنانے کے لیے کام کرنے کی ضرورت پر زور دیا۔ انہوں نے لوگوں پر زور دیا کہ وہ پانی، ماحولیات اور قدرتی وسائل کے تحفظ کو اپنی زندگی کا لازمی حصہ بنائیں۔

***

(ش ح۔اص)

UR No 975