ಸಿ-ಡಾಟ್ ಶ್ರೇಷ್ಠತಾ ಕೇಂದ್ರದ ಸ್ಥಾಪನೆಗಾಗಿ ಟೆಲಿಮ್ಯಾಟಿಕ್ಸ್ ಅಭಿವೃದ್ಧಿ ಕೇಂದ್ರವು (ಸಿ-ಡಾಟ್) ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ (ಐ ಐ ಎಸ್‌ ಸಿ) ಮತ್ತು ವಿಜ್ಞಾನ ನಾವೀನ್ಯತೆ ಮತ್ತು ಅಭಿವೃದ್ಧಿ ಪ್ರತಿಷ್ಠಾನದ (ಎಫ್‌ ಎಸ್‌ ಐ ಡಿ) ಜೊತೆಗೆ ಒಪ್ಪಂದಕ್ಕೆ ಸಹಿ ಹಾಕಿದೆ

ಕೇಂದ್ರ ಸಂವಹನ ಸಚಿವಾಲಯದ ಟೆಲಿಕಾಂ ಇಲಾಖೆಯ (ಡಿಒಟಿ) ಪ್ರಮುಖ ಟೆಲಿಕಾಂ ಸಂಶೋಧನೆ ಮತ್ತು ಅಭಿವೃದ್ಧಿ ಕೇಂದ್ರವಾದ ಸೆಂಟರ್ ಫಾರ್ ಡೆವಲಪ್‌ಮೆಂಟ್ ಆಫ್ ಟೆಲಿಮ್ಯಾಟಿಕ್ಸ್ (ಸಿ-ಡಾಟ್), ರಾಷ್ಟ್ರೀಯ ಪ್ರಾಮುಖ್ಯತೆಯ ಸಂಸ್ಥೆಯಾದ ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ‌ (ಐ ಐ ಎಸ್‌ ಸಿ) ಮತ್ತು ವಿಜ್ಞಾನ ನಾವೀನ್ಯತೆ ಮತ್ತು ಅಭಿವೃದ್ಧಿ ಪ್ರತಿಷ್ಠಾನದ (ಎಫ್‌ ಎಸ್‌ ಐ ಡಿ) ಜೊತೆಗೆ ತ್ರಿಪಕ್ಷೀಯ ಒಪ್ಪಂದಕ್ಕೆ ಸಹಿ ಹಾಕಿದೆ. ಈ ಒಪ್ಪಂದವು ಸಹಯೋಗದ ಸಂಶೋಧನೆ ಮತ್ತು ತಂತ್ರಜ್ಞಾನ ಅಭಿವೃದ್ಧಿಯ ಮೂಲಕ ಭಾರತದ ದೇಶೀಯ ಟೆಲಿಕಾಂ ನಾವೀನ್ಯತಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವಲ್ಲಿ ಮತ್ತೊಂದು ಪ್ರಮುಖ ಮೈಲಿಗಲ್ಲಾಗಿದೆ.

ಒಪ್ಪಂದದ ಭಾಗವಾಗಿ, ಸಿ-ಡಾಟ್ ಅತ್ಯಾಧುನಿಕ ಸಂವಹನ ತಂತ್ರಜ್ಞಾನಗಳ ದೇಶೀಯ ಸಂಶೋಧನೆ, ನಾವೀನ್ಯತೆ, ಸಾಮರ್ಥ್ಯ ವರ್ಧನೆ ಮತ್ತು ವಾಣಿಜ್ಯೀಕರಣವನ್ನು ವೇಗಗೊಳಿಸುವ ಉದ್ದೇಶದಿಂದ ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ‌ಯ ವಿಜ್ಞಾನ ನಾವೀನ್ಯತೆ ಮತ್ತು ಅಭಿವೃದ್ಧಿ ಪ್ರತಿಷ್ಠಾನದಲ್ಲಿ ಶ್ರೇಷ್ಠತಾ ಕೇಂದ್ರವನ್ನು (ಸಿಒಇ) ಸ್ಥಾಪಿಸಿದೆ. ಈ ಶ್ರೇಷ್ಠತಾ ಕೇಂದ್ರವು ಶೈಕ್ಷಣಿಕ ಕ್ಷೇತ್ರ ಮತ್ತು ಉದ್ಯಮಕ್ಕೆ ಸಹಯೋಗದ ವೇದಿಕೆಯಾಗಿ ಕಾರ್ಯನಿರ್ವಹಿಸಲಿದ್ದು, ಭಾರತದ ಡಿಜಿಟಲ್ ಭವಿಷ್ಯಕ್ಕೆ ನಿರ್ಣಾಯಕವಾಗಿರುವ ಕಾರ್ಯತಂತ್ರದ ಕ್ಷೇತ್ರಗಳಲ್ಲಿ ಹೆಚ್ಚು ಪರಿಣಾಮಕಾರಿ ಸಂಶೋಧನೆ, ತಂತ್ರಜ್ಞಾನ ಅಭಿವೃದ್ಧಿ ಮತ್ತು ಪ್ರತಿಭೆಗಳ ಸೃಷ್ಟಿಯನ್ನು ಉತ್ತೇಜಿಸುತ್ತದೆ.

ನೂತನವಾಗಿ ಸ್ಥಾಪಿಸಲಾದ ಈ ಶ್ರೇಷ್ಠತಾ ಕೇಂದ್ರವು ವೈರ್‌ಲೆಸ್ ಸಂವಹನ, ಕ್ವಾಂಟಮ್ ತಂತ್ರಜ್ಞಾನಗಳು, ಸೈಬರ್ ಭದ್ರತೆ ಮತ್ತು ಎಐ-ಚಾಲಿತ ಸಂವಹನ ವ್ಯವಸ್ಥೆಗಳಲ್ಲಿ ಸಂಶೋಧನೆ ಮತ್ತು ನಾವೀನ್ಯತೆಯ ಮೇಲೆ ಗಮನ ಹರಿಸಲಿದ್ದು, 5ಜಿ ಸುಧಾರಿತ/6ಜಿ ತಂತ್ರಜ್ಞಾನಗಳು, ವೆರಿ ಲಾರ್ಜ್‌-ಸ್ಕೇಲ್ ಎಂಐಎಂಒ ವ್ಯವಸ್ಥೆಗಳು, ಇಂಟಿಗ್ರೇಟೆಡ್ ಸೆನ್ಸಿಂಗ್ ಆಂಡ್ ಕಮ್ಯುನಿಕೇಷನ್, ಎಐ-ನೇಟಿವ್ ಕಮ್ಯುನಿಕೇಷನ್ ನೆಟ್‌ವರ್ಕ್‌ ಗಳು ಮತ್ತು ಸಾಧನಗಳು, ಹಾಗೂ ಕ್ವಾಂಟಮ್ ಮತ್ತು ಪೋಸ್ಟ್-ಕ್ವಾಂಟಮ್ ಸಂವಹನ ತಂತ್ರಜ್ಞಾನಗಳು ಸೇರಿದಂತೆ ಉದಯೋನ್ಮುಖ ಕ್ಷೇತ್ರಗಳಲ್ಲಿ ಸುಧಾರಿತ ಸಂಶೋಧನೆಯನ್ನು ಕೈಗೊಳ್ಳಲಿದೆ. ಐ ಐ ಎಸ್‌ ಸಿ ಯ ಜಾಗತಿಕವಾಗಿ ಗುರುತಿಸಲ್ಪಟ್ಟ ಶೈಕ್ಷಣಿಕ ಶ್ರೇಷ್ಠತೆಯನ್ನು ಸಿ-ಡಾಟ್ ನ ದೇಶೀಯ ಟೆಲಿಕಾಂ ಸಂಶೋಧನೆ ಮತ್ತು ಅಭಿವೃದ್ಧಿಯ ವ್ಯಾಪಕ ಪರಿಣತಿಯೊಂದಿಗೆ ಸಂಯೋಜಿಸುವ ಮೂಲಕ, ಈ ಕೇಂದ್ರವು ಭವಿಷ್ಯಕ್ಕೆ ಸಿದ್ಧವಾಗಿರುವ ಸಂವಹನ ತಂತ್ರಜ್ಞಾನಗಳ ಅಭಿವೃದ್ಧಿಯನ್ನು ವೇಗಗೊಳಿಸಲು, ಬೌದ್ಧಿಕ ಆಸ್ತಿಯನ್ನು (ಐಪಿ) ಸೃಷ್ಟಿಸಲು, ಡೀಪ್-ಟೆಕ್ ನವೋದ್ಯಮಗಳಿಗೆ ಬೆಂಬಲ ನೀಡಲು ಮತ್ತು ಜಂಟಿ ಸಂಶೋಧನೆ, ಕಾರ್ಯಾಗಾರಗಳು, ತರಬೇತಿ ಕಾರ್ಯಕ್ರಮಗಳು ಹಾಗೂ ಶೈಕ್ಷಣಿಕ-ಉದ್ಯಮದ ತೊಡಗಿಸಿಕೊಳ್ಳುವಿಕೆಗಳ ಮೂಲಕ ನಿರಂತರ ಜ್ಞಾನ ವಿನಿಮಯಕ್ಕೆ ಅನುಕೂಲ ಮಾಡಿಕೊಡುವ ಗುರಿಯನ್ನು ಹೊಂದಿದೆ.

ಈ ಉಪಕ್ರಮದೊಂದಿಗೆ, ಐಐಟಿ ಹೈದರಾಬಾದ್, ಐಐಟಿ ಕಾನ್ಪುರ, ಐಐಟಿ ಗಾಂಧಿನಗರ ಮತ್ತು ಐಐಟಿ ರೂರ್ಕಿಗಳೊಂದಿಗಿನ ಇದೇ ರೀತಿಯ ಸಹಯೋಗಗಳ ನಂತರ ಸಿ*ಡಾಟ್ ಈಗ ಐದು ಶ್ರೇಷ್ಠತಾ ಕೇಂದ್ರಗಳನ್ನು ಸ್ಥಾಪಿಸಿದಂತಾಗಿದೆ. ವಿಸ್ತರಿಸುತ್ತಿರುವ ಈ ಶ್ರೇಷ್ಠತಾ ಕೇಂದ್ರಗಳ ಜಾಲವು ಸಹಯೋಗದ ಮೂಲಕ ಅತ್ಯಾಧುನಿಕ ಸಂಶೋಧನೆಯನ್ನು ಪೋಷಿಸುವ, ದೇಶೀಯ ತಾಂತ್ರಿಕ ಸಾಮರ್ಥ್ಯಗಳನ್ನು ಬಲಪಡಿಸುವ ಮತ್ತು ಮುಂದಿನ ಪೀಳಿಗೆಯ ಟೆಲಿಕಮ್ಯುನಿಕೇಷನ್‌ ನಲ್ಲಿ ಜಾಗತಿಕ ನಾಯಕನಾಗಿ ಭಾರತದ ಸ್ಥಾನವನ್ನು ಬಲಪಡಿಸುವ ಕ್ರಿಯಾಶೀಲ ರಾಷ್ಟ್ರೀಯ ನಾವೀನ್ಯತಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ಸಿ-ಡಾಟ್ ನ ನಿರಂತರ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಸಿ-ಡಾಟ್ ನ ಸಿಇಒ ಡಾ. ರಾಜಕುಮಾರ್ ಉಪಾಧ್ಯಾಯ ಮತ್ತು ಎಫ್‌ ಎಸ್‌ ಐ ಡಿ ಯ ಸಿಇಒ ಶ್ರೀ ಓಂಪ್ರಕಾಶ್ ಸುಬ್ಬರಾವ್ ಅವರ ಸಮ್ಮುಖದಲ್ಲಿ, ಐ ಐ ಎಸ್‌ ಸಿ ಯ ಅಧ್ಯಾಪಕರು ಮತ್ತು ಸಿ-ಡಾಟ್ ನ ಹಿರಿಯ ಅಧಿಕಾರಿಗಳ ಉಪಸ್ಥಿತಿಯಲ್ಲಿ ಈ ಒಪ್ಪಂದಕ್ಕೆ ಸಹಿ ಹಾಕಲಾಯಿತು. ಸಹಿ ಮಾಡುವ ಸಮಾರಂಭದ ನಂತರ, ಸಹಯೋಗದ ಮತ್ತು ಹೆಚ್ಚು ಪರಿಣಾಮಕಾರಿ ಸಂಶೋಧನೆ ಹಾಗೂ ನಾವೀನ್ಯತೆಯ ಮೂಲಕ ಸಂವಹನ ತಂತ್ರಜ್ಞಾನಗಳನ್ನು ಮುನ್ನಡೆಸಲು ಸಮರ್ಪಿತವಾದ ಶ್ರೇಷ್ಠತಾ ಕೇಂದ್ರವನ್ನು ಉದ್ಘಾಟಿಸಲಾಯಿತು.

ಈ ಸಂದರ್ಭದಲ್ಲಿ, ಸಿ-ಡಾಟ್ ನ ಸಿಇಒ ಡಾ. ರಾಜಕುಮಾರ್ ಉಪಾಧ್ಯಾಯ ಅವರು ಐ ಐ ಎಸ್‌ ಸಿ ಸಮುದಾಯಕ್ಕೆ "ವಿಕಸಿತ ಭಾರತಕ್ಕಾಗಿ ಸುರಕ್ಷಿತ ದೇಶೀಯ ಸಂವಹನ ತಂತ್ರಜ್ಞಾನಗಳನ್ನು ನಿರ್ಮಿಸುವಲ್ಲಿ ಸಿ-ಡಾಟ್‌ ನ ಪಾತ್ರ" ಎಂಬ ವಿಷಯದ ಕುರಿತು ವಿಶೇಷ ಉಪನ್ಯಾಸವನ್ನು ನೀಡಿದರು. ಉಪನ್ಯಾಸವು ಭಾರತದ ಕ್ಷಿಪ್ರ ಡಿಜಿಟಲ್ ಮತ್ತು ಟೆಲಿಕಾಂ ರೂಪಾಂತರ, ವಿಶ್ವಾಸಾರ್ಹ ದೇಶೀಯ ಸಂವಹನ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸುವ ಕಾರ್ಯತಂತ್ರದ ಪ್ರಾಮುಖ್ಯತೆ ಮತ್ತು ಮುಂದಿನ ಪೀಳಿಗೆಯ ಟೆಲಿಕಾಂ ನೆಟ್‌ವರ್ಕ್‌ ಗಳು, ಸೈಬರ್ ಭದ್ರತೆ, ಎಐ-ಚಾಲಿತ ಸಂವಹನ ವ್ಯವಸ್ಥೆಗಳು ಹಾಗೂ ಕ್ವಾಂಟಮ್-ಸುರಕ್ಷಿತ ಸಂವಹನಗಳಲ್ಲಿ ಸಿ-ಡಾಟ್ ನ ಪ್ರವರ್ತಕ ಕೊಡುಗೆಗಳನ್ನು ಎತ್ತಿಹಿಡಿಯಿತು. ಈ ಗೋಷ್ಠಿಯು 6ಜಿ ತಂತ್ರಜ್ಞಾನಗಳ ಪರಿವರ್ತನಾತ್ಮಕ ಸಾಮರ್ಥ್ಯವನ್ನು ಮತ್ತು ಜಾಗತಿಕ ಟೆಲಿಕಮ್ಯುನಿಕೇಷನ್‌ ನ ಭವಿಷ್ಯವನ್ನು ರೂಪಿಸುವಲ್ಲಿ ಭಾರತದ ಬೆಳೆಯುತ್ತಿರುವ ನಾಯಕತ್ವವನ್ನು ಸಹ ಅನ್ವೇಷಿಸಿತು.

ಈ ಸಹಯೋಗದ ಪ್ರಾಮುಖ್ಯತೆಯನ್ನು ವಿವರಿಸಿದ ಸಿ-ಡಾಟ್‌ ನ ಸಿಇಒ ಡಾ. ರಾಜಕುಮಾರ್ ಉಪಾಧ್ಯಾಯ ಅವರು, ಐ ಐ ಎಸ್‌ ಸಿ ಬೆಂಗಳೂರಿನಲ್ಲಿ ಸಿ-ಡಾಟ್ ಶ್ರೇಷ್ಠತಾ ಕೇಂದ್ರದ ಸ್ಥಾಪನೆಯು ಭಾರತದ ಭವಿಷ್ಯದ ಟೆಲಿಕಾಂ ನಾವೀನ್ಯತಾ ಪರಿಸರ ವ್ಯವಸ್ಥೆಯಲ್ಲಿನ ಕಾರ್ಯತಂತ್ರದ ಹೂಡಿಕೆಯನ್ನು ಪ್ರತಿನಿಧಿಸುತ್ತದೆ ಎಂದರು. ಐ ಐ ಎಸ್‌ ಸಿ ಯ ವಿಶ್ವದರ್ಜೆಯ ಸಂಶೋಧನಾ ಸಾಮರ್ಥ್ಯಗಳನ್ನು ಸಿ-ಡಾಟ್ ನ ದೇಶೀಯ ಟೆಲಿಕಾಂ ತಂತ್ರಜ್ಞಾನಗಳ ಪರಿಣತಿಯೊಂದಿಗೆ ಒಂದುಗೂಡಿಸುವ ಮೂಲಕ, ನಾವು 5ಜಿ ಸುಆಧರಿತ, 6ಜಿ, ಎಐ, ಕ್ವಾಂಟಮ್ ಕಮ್ಯುನಿಕೇಷನ್ಸ್ ಮತ್ತು ಇತರ ಉದಯೋನ್ಮುಖ ತಂತ್ರಜ್ಞಾನಗಳಲ್ಲಿ ಮಹತ್ವದ ಸಂಶೋಧನೆಯನ್ನು ವೇಗಗೊಳಿಸುವ ವೇದಿಕೆಯನ್ನು ರಚಿಸುತ್ತಿದ್ದೇವೆ. ಈ ಸಹಯೋಗವು ನಿರ್ಣಾಯಕ ಸಂವಹನ ತಂತ್ರಜ್ಞಾನಗಳಲ್ಲಿ ಭಾರತದ ಆತ್ಮನಿರ್ಭರತೆಯನ್ನು ಬಲಪಡಿಸುವುದು ಮಾತ್ರವಲ್ಲದೆ, ಮುಂದಿನ ಪೀಳಿಗೆಯ ನಾವೀನ್ಯಕಾರರು, ಸಂಶೋಧಕರು, ಬೌದ್ಧಿಕ ಆಸ್ತಿ ಮತ್ತು ಡೀಪ್-ಟೆಕ್ ಉದ್ಯಮಗಳನ್ನು ಪೋಷಿಸುತ್ತದೆ, ಇದು ವಿಕಸಿತ ಭಾರತದ ದೃಷ್ಟಿಕೋನಕ್ಕೆ ಗಮನಾರ್ಹ ಕೊಡುಗೆ ನೀಡುತ್ತದೆ ಎಂದು ಅವರು ಹೇಳಿದರು.

ಈ ಸಹಯೋಗದ ಪ್ರಾಮುಖ್ಯತೆಯ ಬಗ್ಗೆ ಮಾತನಾಡಿದ ಐ ಐ ಎಸ್‌ ಸಿ ಬೆಂಗಳೂರಿನ ಎಲೆಕ್ಟ್ರಿಕಲ್ ಕಮ್ಯುನಿಕೇಷನ್ ಇಂಜಿನಿಯರಿಂಗ್ (ಇಸಿಇ) ವಿಭಾಗದ ಅಧ್ಯಕ್ಷರಾದ ಪ್ರೊ. ನೀಲೇಶ್ ಬಿ. ಮೆಹ್ತಾ ಅವರು, ಸಿ-ಡಾಟ್ ನೊಂದಿಗಿನ ಸಹಭಾಗಿತ್ವವು ಅತ್ಯಾಧುನಿಕ ಸಂಶೋಧನೆಯಲ್ಲಿ ತೊಡಗಿರುವ ಐ ಐ ಎಸ್‌ ಸಿ ಯ ಅಧ್ಯಾಪಕರು ಹಾಗೂ ವಿದ್ಯಾರ್ಥಿಗಳು ಮತ್ತು ಸಿ-ಡಾಟ್ ನ ಕ್ಷೇತ್ರ ತಜ್ಞರು ಹಾಗೂ ಇಂಜಿನಿಯರ್‌ ಗಳ ನಡುವೆ ದೀರ್ಘಕಾಲೀನ ಮತ್ತು ಹೆಚ್ಚು ಪರಿಣಾಮಕಾರಿ ಸಹಯೋಗವನ್ನು ಉತ್ತೇಜಿಸುತ್ತದೆ, ಇದರಿಂದಾಗಿ ಸುಧಾರಿತ ಸಂವಹನ ತಂತ್ರಜ್ಞಾನಗಳಲ್ಲಿ ನಾವೀನ್ಯತೆಯನ್ನು ವೇಗಗೊಳಿಸುತ್ತದೆ ಎಂದು ಹೇಳಿದರು.

ಸಹಯೋಗದ ಪ್ರಾಮುಖ್ಯತೆಯನ್ನು ವಿವರಿಸಿದ ಎಫ್‌ ಎಸ್‌ ಐ ಡಿ ಯ ಸಿಇಒ ಶ್ರೀ ಓಂಪ್ರಕಾಶ್ ಸುಬ್ಬರಾವ್ ಅವರು, "ಸಿ-ಡಾಟ್‌ ನೊಂದಿಗೆ ಈ ಪ್ರಮುಖ ಮೈಲಿಗಲ್ಲನ್ನು ತಲುಪಿರುವುದಕ್ಕೆ ನಮಗೆ ಸಂತೋಷವಾಗಿದೆ ಮತ್ತು ಐ ಐ ಎಸ್‌ ಸಿ ಯ ಅಸಾಧಾರಣ ಸಂಶೋಧಕರು ಹಾಗೂ ನಾವೀನ್ಯಕಾರರೊಂದಿಗೆ ಹೆಚ್ಚು ಪರಿಣಾಮಕಾರಿ ಯೋಜನೆಗಳು ಮತ್ತು ಸಹಯೋಗಗಳನ್ನು ಪ್ರಾರಂಭಿಸಲು ನಾವು ಎದುರು ನೋಡುತ್ತಿದ್ದೇವೆ. ಎಫ್‌ ಎಸ್‌ ಐ ಡಿ ಯಾವಾಗಲೂ ಶೈಕ್ಷಣಿಕ ಕ್ಷೇತ್ರ ಮತ್ತು ಉದ್ಯಮವನ್ನು ಬೆಸೆಯಲು ಬದ್ಧವಾಗಿದೆ, ಏಕೆಂದರೆ ಭಾರತದ ವೈಜ್ಞಾನಿಕ ಪರಿಸರ ವ್ಯವಸ್ಥೆ ಮತ್ತು ತಾಂತ್ರಿಕ ನಾಯಕತ್ವವನ್ನು ಬಲಪಡಿಸಲು ಸಹಯೋಗದ ನಾವೀನ್ಯತೆಯು ಅತ್ಯಗತ್ಯ ಎಂದು ನಾವು ದೃಢವಾಗಿ ನಂಬುತ್ತೇವೆ. ಈ ಸಹಭಾಗಿತ್ವವು ದೇಶಕ್ಕೆ ಅರ್ಥಪೂರ್ಣ ಫಲಿತಾಂಶಗಳನ್ನು ನೀಡುತ್ತದೆ ಎಂಬ ಭರವಸೆ ನಮಗಿದೆ ಎಂದು ಹೇಳಿದರು.

ಐ ಐ ಎಸ್‌ ಸಿ ಬೆಂಗಳೂರಿನಲ್ಲಿ ಶ್ರೇಷ್ಠತಾ ಕೇಂದ್ರವನ್ನು ಉದ್ಘಾಟಿಸುತ್ತಿರುವ ಸಿ-ಡಾಟ್‌  ನ ಸಿಇಒ ಡಾ. ರಾಜಕುಮಾರ್ ಉಪಾಧ್ಯಾಯ

ಸಿ-ಡಾಟ್ ನ ಸಿಇಒ ಡಾ. ರಾಜ್‌ಕುಮಾರ್ ಉಪಾಧ್ಯಾಯ ಮತ್ತು ಎಫ್‌ ಎಸ್‌ ಐ ಡಿ ಯ ಸಿಇಒ ಶ್ರೀ ಓಂಪ್ರಕಾಶ್ ಸುಬ್ಬರಾವ್ ಅವರ ಸಮ್ಮುಖದಲ್ಲಿ, ಐ ಐ ಎಸ್‌ ಸಿ ಯ ಅಧ್ಯಾಪಕರು ಮತ್ತು ಸಿ-ಡಾಟ್ ನ ಹಿರಿಯ ಅಧಿಕಾರಿಗಳ ಉಪಸ್ಥಿತಿಯಲ್ಲಿ ಒಪ್ಪಂದಕ್ಕೆ ಸಹಿ

ಐ ಐ ಎಸ್‌ ಸಿ ಸಮುದಾಯಕ್ಕೆ "ವಿಕಸಿತ ಭಾರತಕ್ಕಾಗಿ ಸುರಕ್ಷಿತ ದೇಶೀಯ ಸಂವಹನ ತಂತ್ರಜ್ಞಾನಗಳನ್ನು ನಿರ್ಮಿಸುವಲ್ಲಿ ಸಿ-ಡಾಟ್ ನ ಪಾತ್ರ" ಎಂಬ ವಿಷಯದ ಕುರಿತು ವಿಶೇಷ ಉಪನ್ಯಾಸ ನೀಡುತ್ತಿರುವ ಸಿ-ಡಾಟ್ ನ ಸಿಇಒ ಡಾ. ರಾಜಕುಮಾರ್ ಉಪಾಧ್ಯಾಯ

*****