પ્રધાનમંત્રી શ્રી નરેન્દ્ર મોદીના ‘સહકારથી સમૃદ્ધિ’ના વિઝનને આગળ વધારતા અને કેન્દ્રીય ગૃહ અને સહકારિતા મંત્રી શ્રી અમિત શાહના નેતૃત્વમાં દેશના સહકારી બેંકિંગ તંત્રને આધુનિક, પારદર્શી અને ખેડૂત-કેન્દ્રિત બનાવવાની દિશામાં આજે વધુ એક મહત્વપૂર્ણ પહેલ થઈ. કેન્દ્રીય ગૃહ અને સહકારિતા મંત્રી શ્રી અમિત શાહે ગુજરાતના જામનગરમાં જામનગર ડિસ્ટ્રિક્ટ કો-ઓપરેટિવ બેંકના નવનીર્મિત વડામથક ‘સહકાર ભવન’નું વર્ચ્યુઅલ માધ્યમથી લોકાર્પણ કર્યું. અદ્યતન ટેકનોલોજીથી સજ્જ આ નવું વડામથક જામનગર અને દેવભૂમિ દ્વારકા જિલ્લાના ખેડૂતો, સેવા સહકારી મંડળીઓ તથા દૂધ સહકારી સંસ્થાઓની નાણાકીય અને સંસ્થાકીય જરૂરિયાતો પૂરી કરશે.

આ પ્રસંગે ગુજરાતના મુખ્યમંત્રી શ્રી ભૂપેન્દ્રભાઈ પટેલ, ગુજરાત સરકારના સહકારિતા મંત્રી શ્રી જીતુભાઈ વાઘાણી, ગુજરાત સરકારમાં કેબિનેટ મંત્રી શ્રી અર્જુનભાઈ મોઢવાડિયા, શ્રી રાઘવજીભાઈ પટેલ, શ્રી મુળુભાઈ બેરા, જામનગર સાંસદ શ્રીમતી પૂનમબેન માડમ, રાજ્ય મંત્રી અને ઉત્તર જામનગર વિધાયક શ્રીમતી રિવાબા જાડેજા તથા ગુજરાત સ્ટેટ કો-ઓપરેટિવ બેંકના ચેરમેન શ્રી અજયભાઈ પટેલ, જામનગર ડિસ્ટ્રિક્ટ કો-ઓપરેટિવ બેંકના ચેરમેન શ્રી જીતુભાઈ લાલ સહિત જામનગર ડિસ્ટ્રિક્ટ કો-ઓપરેટિવ બેંકના નિયામકશ્રીઓ, જિલ્લા વહીવટીતંત્રના વરિષ્ઠ અધિકારીઓ, કૃષિ ઉત્પન્ન બજાર સમિતિઓ અને જિલ્લા સહકારી સંઘોના પ્રમુખો, જામનગર દૂધ સંઘના હોદ્દેદારો, સહકારી અર્બન બેંકોના ચેરમેન, સેવા સહકારી મંડળીઓના પ્રતિનિધિઓ, અનેક જનપ્રતિનિધિઓ તથા મોટી સંખ્યામાં ખેડૂત ભાઈ-બહેનો પણ ઉપસ્થિત રહ્યા અથવા વર્ચ્યુઅલ રીતે કાર્યક્રમમાં જોડાયા.

કાર્યક્રમ દરમિયાન પોતાના સંબોધનમાં કેન્દ્રીય ગૃહ અને સહકારિતા મંત્રી શ્રી અમિત શાહે જામનગર ડિસ્ટ્રિક્ટ કો-ઓપરેટિવ બેંકના ચેરમેન, બેંકના તમામ નિયામકો, સેવા સહકારી મંડળીઓના હોદ્દેદારો અને ખેડૂતોને નવનીર્મિત વડામથક માટે અભિનંદન આપ્યા. તેમણે કહ્યું કે સહકારિતા વ્યવસ્થાને મજબૂત બનાવવા માટે તેનું આધુનિકીકરણ આવશ્યક છે અને આની શરૂઆત સંસ્થાઓના વડામથકો તથા તેમની કાર્યપ્રણાલીના આધુનિકીકરણથી થાય છે.

શ્રી અમિત શાહે કહ્યું કે જામનગર ડિસ્ટ્રિક્ટ કો-ઓપરેટિવ બેંકનું નવું વડામથક રિઝર્વ બેંક અને નાબાર્ડના તમામ ધોરણો અનુસાર તથા અદ્યતન ટેકનોલોજીથી સજ્જ છે. આ વડામથક જામનગર જિલ્લાના ખેડૂતો, સેવા સહકારી મંડળીઓ અને અન્ય સહકારી સંસ્થાઓને વધુ સારી, સુરક્ષિત અને આધુનિક બેંકિંગ સેવાઓ ઉપલબ્ધ કરાવવામાં સહાયક સાબિત થશે.

કેન્દ્રીય ગૃહ અને સહકારિતા મંત્રીએ કહ્યું કે વર્ષ 1969 માં માત્ર અઢી લાખ રૂપિયાની નાની-સરખી મૂડીથી શરૂ થયેલી જામનગર ડિસ્ટ્રિક્ટ કો-ઓપરેટિવ બેંક આજે 215 કરોડ રૂપિયાથી વધુનો કારોબાર કરી રહી છે. તેમણે કહ્યું કે આગામી સમયમાં સેવા સહકારી મંડળીઓ અને દૂધ મંડળીઓના કાર્યક્ષેત્રના વિસ્તરણ સાથે આ બેંક આખા જિલ્લાના સહકારી ક્ષેત્રની આર્થિક જરૂરિયાતો પૂરી કરનારી મુખ્ય સંસ્થા તરીકે વધુ મહત્વપૂર્ણ ભૂમિકા ભજવશે.

શ્રી અમિત શાહે જણાવ્યું કે લગભગ 25 કરોડ રૂપિયાના ખર્ચે નિર્મિત આ આધુનિક વડામથક 25 હજાર ચોરસફૂટ જમીન પર બનાવવામાં આવ્યું છે અને તેમાં લગભગ 47 હજાર ચોરસફૂટનો કાર્ય વિસ્તાર ઉપલબ્ધ છે. આ ભવનનું માળખું આગામી 15 વર્ષો સુધી બેંકની સંભવિત જરૂરિયાતોને ધ્યાનમાં રાખીને કરવામાં આવ્યું છે. ભવનમાં તાલીમ કેન્દ્ર, ખેડૂત છાત્રાલય, આધુનિક કોન્ફરન્સ રૂમ, પરિષદ ખંડ, સુરક્ષિત લોકર સુવિધા અને ભોજન સહિત વિવિધ સુવિધાઓની વ્યવસ્થા કરવામાં આવી છે. તેમણે કહ્યું કે આ ભવન જામનગર અને દેવભૂમિ દ્વારકા, બંને જિલ્લાના ખેડૂતો માટે એક ઊર્જાકેન્દ્ર તરીકે કામ કરશે. ભવનમાં સ્થાપિત 200 કિલોવોટ ક્ષમતાનો સોલાર ઊર્જા પ્લાન્ટ તેને ગ્રીન બિલ્ડિંગ તરીકે વિકસાવવાની દિશામાં એક મહત્વપૂર્ણ પહેલ છે.

કેન્દ્રીય ગૃહ અને સહકારિતા મંત્રીએ કહ્યું કે બેંકમાં લગભગ 135 કરોડ રૂપિયાની કુલ થાપણ રકમ છે. બેંક દ્વારા કુલ 780 કરોડ રૂપિયાનું ધિરાણ વિતરણ કરવામાં આવ્યું છે, બેંકે 24 કરોડ રૂપિયાનો નફો મેળવ્યો છે અને તેનો ગ્રોસ એનપીએ શૂન્ય છે. તેમણે આને બેંકના કુશળ વ્યવસ્થાપન અને સહકારી મૂલ્યો પ્રત્યે તેની કટિબદ્ધતાનું પ્રમાણ ગણાવ્યું.

શ્રી અમિત શાહે કહ્યું કે 40 શાખાઓના માધ્યમથી સંચાલિત આ બેંક નવા વડામથકની સહાયતાથી આગામી દિવસોમાં જામનગર જિલ્લાના ગામ-ગામ સુધી પહોંચ વધારશે. બેંક સાથે 431 સેવા સહકારી મંડળીઓ, છ દૂધ સંઘ અને 652 દૂધ ઉત્પાદક મંડળીઓ જોડાયેલી છે તથા બેંક લગભગ દોઢ લાખથી વધુ સહકારી સભ્યોને સેવાઓ પૂરી પાડી રહી છે.

કેન્દ્રીય ગૃહ અને સહકારિતા મંત્રીએ કહ્યું કે પ્રધાનમંત્રી શ્રી નરેન્દ્ર મોદીના નેતૃત્વમાં ભારત સરકારે અલગ સહકારિતા મંત્રાલયની સ્થાપના કરીને દેશના સહકારી આંદોલનને નવી ઊર્જા અને નવી ગતિ આપવાનું કામ કર્યું છે. તેમણે કહ્યું કે બે લાખથી વધુ નવી પ્રાથમિક કૃષિ ધિરાણ સમિતિઓ અને દૂધ સહકારી સમિતિઓની સ્થાપના, પેક્સમાં 20 થી વધુ નવા વ્યવસાયિક કાર્યોને જોડવા, સહકારી સંસ્થાઓની ઓડિટ વ્યવસ્થાને ઓનલાઈન કરવી અને વિવિધ સહકારી સંસ્થાઓને આપસમાં જોડવા જેવી પહેલો આગામી સમયમાં દેશના ખેડૂતો અને ગ્રામીણ અર્થતંત્રને સમૃદ્ધ બનાવવામાં મહત્વપૂર્ણ ભૂમિકા ભજવશે.

શ્રી અમિત શાહે કહ્યું કે તેઓ ભવિષ્યમાં જામનગરની મુલાકાત દરમિયાન જામનગર ડિસ્ટ્રિક્ટ કો-ઓપરેટિવ બેંકના આ નવા વડામથકની મુલાકાત લેશે. તેમણે એ પણ કહ્યું કે પોતાની જામનગર મુલાકાત દરમિયાન તેઓ જિલ્લાની સેવા સહકારી મંડળીઓ અને દૂધ મંડળીઓના પ્રતિનિધિઓ સાથે બેઠક કરીને સહકારી ક્ષેત્રના વિસ્તરણ અને ખેડૂતોની સમૃદ્ધિ સાથે જોડાયેલા વિષયો પર વિગતવાર ચર્ચા કરશે. તેમણે વિશ્વાસ વ્યક્ત કર્યો કે જામનગર ડિસ્ટ્રિક્ટ કો-ઓપરેટિવ બેંક આગામી દિવસોમાં વધુ મજબૂત બનશે તથા ગામ-ગામ સુધી નાગરિકો, ખેડૂતો અને સહકારી સંસ્થાઓને વધુ સારી સેવાઓ પૂરી પાડશે.

SM/JY/JD