کرگل وجے دیوس کی 27ویں سالگرہ کے موقع پر دراس میں منعقدہ یادگاری تقریب سے خطاب کرتے ہوئے مرکزی وزیر دفاع راجناتھ سنگھ نے کہا کہ ’’اگرچہ دشمن کے عزائم آج بھی نہیں بدلے اور وہ پراکسی جنگ اور دراندازی جیسے مذموم ہتھکنڈے اختیار کر رہا ہے، تاہم ہندوستانی مسلح افواج ہر چیلنج کا مقابلہ کرنے کے لیے پوری طرح تیار ہیں۔‘‘

راجناتھ سنگھ نے 1999 کی کرگل جنگ میں ہندوستان کو فتح دلانے والے بہادر فوجیوں کو خراجِ عقیدت پیش کرتے ہوئے کہا کہ انتہائی دشوار حالات میں ان کی جرات، عزم اور حب الوطنی آج بھی نہ صرف مسلح افواج بلکہ پورے ملک کے لیے باعثِ تحریک ہے۔

 

جناب راجناتھ سنگھ نے مسلح افواج پر مکمل اعتماد کا اظہار کرتے ہوئے کہا کہ جب تک ملک کے بہادر جوانوں کی حب الوطنی اور عزم غیر متزلزل رہے گا، کوئی بھی بھارت کی طرف بری نظر ڈالنے کی جرات نہیں کر سکتا۔ انہوں نے کہا کہ انہی فوجیوں کی جرات و بہادری کی بدولت ملک کا ہر شہری بے خوف ہو کر اپنے خوابوں کی تعبیر حاصل کرنے اور اپنی خواہشات کو پورا کرنے کے قابل ہے۔

جناب راجناتھ سنگھ نے فوجیوں کے ساتھ بڑا کھانا کے موقع پر بات چیت کرتے ہوئے کہا، ’’اگرچہ کرگل کی فتح کو یاد کرتے ہوئے ہمیں فخر کا احساس ہوتا ہے، لیکن ہمیں یہ بھی یاد رکھنا چاہیے کہ ہمارے سامنے موجود چیلنجز کم نہیں ہوئے ہیں۔‘‘ انہوں نے وزیر اعظم  جناب نریندر مودی کی قیادت والی حکومت کے فوجیوں کی فلاح و بہبود کے عزم کا اعادہ کرتے ہوئے کہا کہ دفاعی شعبے کو جدید بنانے پر مسلسل زور دیا جا رہا ہے تاکہ مسلح افواج کو عالمی معیار کے ہتھیاروں اور تربیت سے لیس رکھا جا سکے۔

 

جناب راجناتھ سنگھ نے جدید ٹیکنالوجی کو اپنانے پر مسلح افواج کی ستائش کرتے ہوئے کہا کہ ان کی بہادری، فرض شناسی اور عزم کی داستانیں نہ صرف ملک بلکہ پوری دنیا میں تسلیم کی جاتی ہیں۔ انہوں نے کہا، ’’یہ صدی ہماری ہے، مستقبل ہمارا ہے۔ خود انحصاری کی سمت میں جو پیش رفت ہم نے کی ہے، اس کے پیش نظر مجھے پورا یقین ہے کہ آنے والے وقت میں ہماری مسلح افواج دنیا کی بہترین افواج میں شمار ہوں گی۔‘‘

وشواناتھن اسٹیڈیم میں منعقدہ ’شوریہ بھوج‘ پروگرام کے دوران ڈرونز، روبوٹک میولز اور فوج کی مارشل آرٹس روٹین ڈرلز کا مظاہرہ بھی کیا گیا، جبکہ علاقے کی شاندار ثقافتی وراثت کو اجاگر کرنے کے لیے ایک ثقافتی پروگرام بھی پیش کیا گیا۔

بعد ازاں جناب راجناتھ سنگھ نے لداخ کے لیفٹیننٹ گورنر ونئے کمار سکسینہ، بری فوج کے سربراہ جنرل دھیراج سیٹھ، شمالی کمان کے جنرل آفیسر کمانڈنگ اِن چیف لیفٹیننٹ جنرل پرتیک شرما، دیگر حاضر سروس فوجی اہلکاروں، کارگل جنگ کے سابق فوجیوں، بہادری کے اعزازات حاصل کرنے والوں، ویر ناریوں، شہداء کے اہل خانہ، سول معززین اور مقامی شہریوں کے ساتھ شوریہ بھوج میں شرکت کی۔

 

’شوریہ بھوج‘ سے قبل  جناب راجناتھ سنگھ نے کرگل وار میموریل میں منعقدہ ’شوریہ سندھیا‘ پروگرام میں شرکت کی، جہاں حب الوطنی سے سرشار دھنوں کے ذریعے آپریشن وجے کے ہیروز کو پُراثر خراجِ عقیدت پیش کیا گیا۔ اس موقع پر کرگل جنگ کے 10 شہداء کے اہل خانہ کو ان کے خاندانوں کی جرات، ثابت قدمی اور عظیم قربانیوں کے اعتراف میں اعزاز سے نوازا گیا۔

جناب راجناتھ سنگھ کو ’’ویروں کی مٹی‘‘ پر مشتمل ایک کلش پیش کیا گیا۔ اس کے بعد مختلف مذاہب کے مذہبی رہنماؤں نے بین المذاہب دعائیں کیں، جن کے بعد پُروقار بیٹنگ ریٹریٹ تقریب اور قومی ترانہ پیش کیا گیا۔ بعد ازاں وزیر دفاع نے جنگ میں عظیم قربانی پیش کرنے والے فوجیوں کو خراجِ عقیدت پیش کرنے کے لیے یادگار پر چراغ روشن کیے۔

یُدھ سنسمرن

تقریبات کا آغاز لاموچین ویو پوائنٹ پر منعقدہ ’’یُدھ سنسمرن‘‘ پروگرام سے ہوا، جس میں کرگل جنگ کے سابق فوجیوں، شہداء کے اہل خانہ اور دیگر معزز شخصیات نے شرکت کی۔ اس موقع پر یُدھ سنسمرن پر مبنی ایک فلم اور ایک مختصر ویڈیو دکھائی گئی، جس میں آپریشن وجے کے 40 جانبازوں کی غیر معمولی جرات اور بہادری کو اجاگر کیا گیا۔ بعد ازاں شہداء کے اہل خانہ کو اعزاز سے نوازا گیا اور انہوں نے اپنے عزیز فوجیوں سے وابستہ یادیں حاضرین کے ساتھ شیئر کیں۔

گوروومئے سنسکرتی

دوپہر کے پروگرام کا آغاز وشواناتھن اسٹیڈیم میں لداخ اسکاوٹس ریجمنٹل سینٹر بینڈ کی حب الوطنی سے سرشار دھنوں سے ہوا۔ اس کے بعد کور آف ملٹری پولیس سینٹر اینڈ اسکول کی ’’شویت اشوا‘‘ ٹیم نے موٹر سائیکلوں پر شاندار کرتب پیش کیے، جن میں پیشہ ورانہ مہارت، نظم و ضبط اور اعلیٰ تربیت کا مظاہرہ کیا گیا۔

طلبہ نے قومی یکجہتی پر مبنی رنگا رنگ رقص پیش کیا، جبکہ دشوار گزار اور بلند پہاڑی علاقوں میں کارروائیوں کے لیے ہندوستانی فوج کی جانب سے جدید ترین ٹیکنالوجی کے بڑھتے ہوئے استعمال کی جھلکیاں بھی پیش کی گئیں۔ اس کے بعد ’’وجے بھوج‘‘ کا انعقاد کیا گیا، جس میں معزز شخصیات، سابق فوجیوں، حاضر سروس اہلکاروں اور شہداء کے اہل خانہ نے یاد، اظہارِ تشکر اور یکجہتی کے جذبے کے ساتھ شرکت کی۔

یہ تقریبات 26 جولائی 2026 کو اختتام پذیر ہوں گی، جب وزیر دفاع ’’شردھانجلی سماروہ‘‘ کے دوران قوم کی جانب سے آپریشن وجے کے شہداء کو خراجِ عقیدت پیش کریں گے۔

یہ یادگاری تقریبات کرگل جنگ میں اپنی جانیں نچھاور کرنے والے 545 جانبازوں کو خراجِ عقیدت پیش کرنے کے لیے منعقد کی جا رہی ہیں، جن میں ہندوستانی فوج کے 537 اہلکار، ہندوستانی فضائیہ کے 5 اہلکار، بارڈر سیکورٹی فورس کا ایک اہلکار اور دو شہری شامل تھے، جن کی عظیم قربانی نے ہندوستان کو فتح سے ہمکنار کیا اور ملک کی علاقائی سالمیت کا تحفظ یقینی بنایا۔

***

ش ح ۔   م  د ۔  م  ص

U :607 

(रिलीज़ आईडी: 2289504) आगंतुक पटल : 5