اوڈیشہ کا ساحلی خطہ رامیشور–پارادیپ ساحلی شاہراہ کی تعمیر کے ساتھ ایک بڑی تبدیلی کے دور میں داخل ہونے والا ہے۔ 160.18 کلومیٹر طویل یہ راہداری ریاست کے ساحلی علاقوں میں آمدورفت کے نظام کو نئی جہت دے گی۔ اس منصوبے پر وزارتِ سڑک نقل و حمل و شاہراہیں 8,300.79 کروڑ روپے کی مجموعی لاگت سے عمل درآمد کرے گی۔ یہ شاہراہ کھوردھا، پوری، کیندرپاڑا اور جگت سنگھ پور اضلاع سے گزرے گی اور اہم ثقافتی، مذہبی، سیاحتی اور معاشی مراکز کے درمیان بلا رکاوٹ رابطہ قائم کرے گی۔

تیز رفتار، محفوظ اور ہموار سفر کی سہولت فراہم کرنے کے لیے اس منصوبے کے تحت رامیشور سے کونارک تک 4لین، محدود رسائی والی شاہراہ تعمیر کی جائے گی، جبکہ کونارک سے پارادیپ تک 2لین شاہراہ بنائی جائے گی، جس کے دونوں جانب پختہ کنارے ہوں گے۔ اس شاہراہ کی طے شدہ رفتار 100 کلومیٹر فی گھنٹہ ہوگی۔ منصوبہ مکمل ہونے کے بعد رامیشور اور پارادیپ کے درمیان سفر کا دورانیہ تقریباً 2 گھنٹے 30 منٹ کم ہو جائے گا، جس سے نہ صرف مسافروں کی آمدورفت آسان ہوگی بلکہ مال برداری کا نظام بھی زیادہ مؤثر بنے گا۔

اوڈیشہ کے روحانی ورثے کو باہم مربوط کرنا

یہ نئی ساحلی شاہراہ مذہبی اور ثقافتی سیاحت کے فروغ میں ایک اہم سنگِ میل ثابت ہوگی، کیونکہ اس کے ذریعے اوڈیشہ کے چند معروف ترین روحانی مقامات تک رسائی پہلے سے کہیں زیادہ تیز اور آسان ہو جائے گی۔

یہ راہداری عالمی شہرت یافتہ جگن ناتھ مندر، پوری، تاریخی کونارک سورج مندر اور مقدس رام چندی مندر کے درمیان رابطے کو مزید مضبوط بنائے گی، جس سے ہر سال اوڈیشہ آنے والے لاکھوں زائرین کے لیے زیارت کا سفر زیادہ سہل اور آرام دہ ہو جائے گا۔

سڑک کے بنیادی ڈھانچے میں بہتری سے نہ صرف سفر کا وقت کم ہوگا بلکہ محفوظ، آرام دہ اور سہل آمدورفت کے ذریعے زائرین اور سیاحوں کے مجموعی سفری تجربے میں بھی نمایاں بہتری آئے گی۔ اس کے علاوہ، خطے میں زیرِ تعمیر ہوائی اڈے کا بنیادی ڈھانچہ بھی اوڈیشہ کو روحانی سیاحت کے ایک اہم مرکز کے طور پر مزید مستحکم کرے گا، جس سے بھارت اور دنیا بھر سے آنے والے زائرین کے لیے یہاں پہنچنا آسان ہو جائے گا۔

یہ شاہراہ صرف آمدورفت کا ایک منصوبہ نہیں، بلکہ اس بات کی بھی بہترین مثال ہے کہ جدید بنیادی ڈھانچہ کس طرح لوگوں کو تاریخی مندروں، ثقافتی روایات اور روحانی مراکز سے جوڑ کر بھارت کے ثقافتی ورثے کے تحفظ اور فروغ میں مؤثر کردار ادا کر سکتا ہے۔

پوری سے پارادیپ تک: اوڈیشہ کی نئی سیاحتی شاہراہ

رامیشور–پارادیپ راہداری اوڈیشہ کے مشرقی ساحل پر واقع ساحلوں، تاریخی مقامات، حیاتیاتی تنوع سے مالا مال علاقوں اور مقامی آبادی کو باہم جوڑتے ہوئے ساحلی سیاحت کے ایک نئے دروازے کے طور پر ابھرنے والی ہے۔

پوری، کونارک اور پارادیپ کے درمیان بہتر رابطے کے بعد یہ مقامات ایک مربوط سیاحتی سلسلے کی صورت اختیار کر لیں گے، جہاں سیاحوں کو روحانی ورثے، قدیم طرزِ تعمیر، دلکش ساحلوں اور قدرتی ماحولیاتی نظام پر مشتمل ایک مکمل ساحلی تجربہ میسر آئے گا۔

یہ شاہراہ ساحلی سیاحت، ماحول دوست سیاحت اور قدرتی مناظر پر مبنی سیاحت کے فروغ کے نئے مواقع فراہم کرے گی، جبکہ جنگلی حیات کے محفوظ علاقوں اور گاہرمتھا میں واقع سمندری کچھوؤں کی مشہور افزائشی آماج گاہوں سمیت اہم ماحولیاتی مقامات تک رسائی بھی آسان بنائے گی۔

بہتر رابطہ اوڈیشہ کے منفرد ساحلی حیاتیاتی تنوع اور اس کے تحفظ کی کوششوں کے بارے میں عوامی آگاہی بڑھاتے ہوئے پائیدار سیاحت کو بھی فروغ دے گا۔ سیاح قدرتی مناظر تک زیادہ آسانی سے پہنچ سکیں گے اور ایسی ذمہ دارانہ سیاحتی سرگرمیوں کی حوصلہ افزائی ہوگی جو نازک ماحولیاتی نظام کے تحفظ کو یقینی بنائیں۔

مقامی معیشت اور ساحلی ترقی کو فروغ

یہ نئی شاہراہ مقامی آبادی کے لیے نئے معاشی مواقع پیدا کرے گی، کیونکہ اس کے نتیجے میں شاہراہ کے اطراف ہوٹلوں، گھریلو قیام گاہوں (ہوم اسٹے)، ریستورانوں، دستکاری کی منڈیوں اور سیاحت سے وابستہ کاروباروں کی ترقی کو فروغ ملے گا۔

پردھان منتری گتی شکتی کے اصولوں سے ہم آہنگ یہ منصوبہ 9 معاشی مراکز اور 5 لاجسٹک مراکز کو باہم مربوط کرے گا، جس سے اوڈیشہ کے معاشی ڈھانچے کو مزید مضبوطی ملے گی۔ اس کے علاوہ پارادیپ بندرگاہ، پوری ریلوے اسٹیشن، پوری ہوائی اڈہ اور دیگر علاقائی معاشی مراکز تک رسائی بھی پہلے سے کہیں زیادہ بہتر ہو جائے گی۔

*****

ش ح۔ ش ا ر۔ ول

Uno-137­