بھارت کی فیشن اور ملبوسات کی صنعت ایک تاریخی تبدیلی کے دور سے گزر رہی ہے، جہاں وہ اپنی روایتی پیداواری صلاحیت سے آگے بڑھ کر ڈیزائن میں جدت، اعلیٰ معیار اور ثقافتی انفرادیت کے لیے عالمی شناخت قائم کر رہی ہے۔

 مالی سال 2025-26 میں بھارت کی ٹیکسٹائل اور ملبوسات کی برآمدات کے تقریباً 3.16 لاکھ کروڑ روپے تک پہنچنے اور 2030 تک اسے 9 لاکھ کروڑ روپے تک لے جانے کے ہدف، نیز آزاد تجارتی معاہدوں (ایف ٹی اے ) کے بڑھتے ہوئے نیٹ ورک کے ذریعے بھارت کی اہم عالمی منڈیوں تک رسائی کے تناظر میں، اجلاس میں اس بات پر تبادلۂ خیال کیا گیا کہ بھارتی برانڈز کس طرح مضبوط برانڈ شناخت قائم کر کے، کاروبار کرنے کی حکمتِ عملی کی صلاحیتوں کو وسعت دے کر، اور صارفین و ضابطہ جاتی تقاضوں میں آنے والی تبدیلیوں کے مطابق خود کو ڈھال کر اپنی مسابقتی برتری کو طویل مدتی عالمی ترقی میں تبدیل کر سکتے ہیں۔

اسی تناظر میں، 16 جولائی 2026 کو بھارت ٹیکس 2026 کے تحت نئی دہلی کے بھارت منڈپم میں "انڈین برانڈز، گلوبل ایمبیشنز: ری ڈیفائننگ ریٹیل گروتھ بیونڈ بارڈرز" کے موضوع پر ایک خصوصی اجلاس منعقد کیا گیا۔ اس اجلاس میں ڈیزائنرز، کاروباری شخصیات، ای کامرس پلیٹ فارمز اور مینوفیکچررز نے شرکت کی اور اس بات پر غور و خوض کیا کہ بھارتی ٹیکسٹائل اور لائف اسٹائل برانڈز اپنی روایتی دستکاری اور ورثے کو برقرار رکھتے ہوئے عالمی منڈیوں میں کس طرح اپنی توسیع کر سکتے ہیں۔ اس اجلاس میں 20 سے زائد ممتاز پینل ماہرین نے شرکت کی، جن میں بھارتی برانڈز، لگژری ڈیزائنرز، ای کامرس پلیٹ فارمز، اور پی ڈی ایس (پی ڈی ایس )، ویلسپن ورلڈ، نَیٹ ہومز، پشمینہ ڈاٹ کام، ایکسپو بازار اور ٹرائیڈنٹ جیسے نمایاں برانڈز کے صنعتی ماہرین شامل تھے۔ پینل کے اراکین نے بھارتی برانڈز کو عالمی سطح پر مستحکم کرنے، ریٹیل شعبے کی مسابقتی صلاحیت کو مضبوط بنانے، اور جدت کے ذریعے بین الاقوامی منڈیوں میں توسیع کے مواقع پر اپنے خیالات کا اظہار کیا۔

بھارتی ملبوسات اور گارمنٹس برانڈز، ڈیزائنرز، ای-کامرس پلیٹ فارمز، ریٹیلرز، برآمد کنندگان اور اختراعی شعبے کے ماہرین سے خطاب کرتے ہوئے مرکزی وزیرِ ٹیکسٹائل جناب گری راج سنگھ نے بھارت کے ٹیکسٹائل شعبے کے مستقبل کے لیے ایک حوصلہ افزا وژن پیش کیا۔ انہوں نے کہا کہ بھارتی کاریگروں، ڈیزائنرز اور مائیکرو، چھوٹے اور درمیانے درجے کے کاروباری اداروں (ایم ایس ایم ایز) کے پاس ملک کی شاندار دستکاری، مالا مال ٹیکسٹائل روایت اور ثقافتی ورثے کو محفوظ رکھتے ہوئے عالمی سطح پر قابلِ اعتماد برانڈز قائم کرنے کے بے پناہ امکانات موجود ہیں۔

انہوں نے اس بات پر زور دیا کہ عالمی منڈیوں میں کامیابی حاصل کرنے کے لیے بھارتی برانڈز کو مقدار کے ساتھ ساتھ معیار، پائیداری اور سراغ پذیری پر بھی خصوصی توجہ دینی ہوگی۔ اس کے ساتھ ساتھ، بھارت کے بھرپور دستکاری اور ٹیکسٹائل ورثے کو مؤثر انداز میں دنیا کے سامنے پیش کرنا بھی ضروری ہے۔ مرکزی وزیر نے کہا، "کاریگر بھارت کا سرمایہ ہیں۔" انہوں نے دوبارہ اس بات پر زور دیا کہ بھارت کے کاریگر اور بُنکر ہی ملک کی ٹیکسٹائل صنعت کی حقیقی طاقت اور بنیاد ہیں۔ انہوں نے کہا کہ بھارت ٹیکس 2026 جیسے پروگرام کاریگروں کی اعلیٰ درجے کی دستکاری کو عالمی پلیٹ فارم پر پیش کرنے، انہیں بین الاقوامی خریداروں سے جوڑنے، اور بھارت کے مالا مال ٹیکسٹائل ورثے کو محفوظ رکھتے ہوئے ان کے لیے پائیدار روزگار کے نئے مواقع پیدا کرنے میں اہم کردار ادا کرتے ہیں۔

ٹیکسٹائل کے مرکزی وزیرنے کہا کہ بھارتی برانڈز معیار، پائیداری، شاندار ورثے اور اعلیٰ دستکاری کی بنیاد پر اپنی عالمی امنگوں کو پورا کرتے ہوئے ترقی کی نئی تعریف تشکیل دے سکتے ہیں۔ انہوں نے بھارت کے بھرپور دستکاری کے ورثے کو عالمی سطح پر فروغ دینے کی ضرورت پر زور دیتے ہوئے صنعت کاروں، کاریگروں اور بُنکروں کو مزید تعاون فراہم کرنے کی اپیل کی۔ انہوں نے انہیں بھارت کی سب سے بڑی طاقت قرار دیتے ہوئے کہا کہ ٹیکسٹائل کے شعبے میں جامع اور عالمی سطح پر مسابقتی ترقی کو یقینی بنانے کے لیے ان کا بااختیار ہونا نہایت ضروری ہے۔

اس موقع پر معروف بھارتی ڈیزائنرز ویشالی شاڈانگولے اور راہول مشرا نے بھی عالمی سطح پر بھارتی برانڈز اور دستکاری کی بڑھتی ہوئی ساکھ کے بارے میں اپنے خیالات کا اظہار کیا۔ اپنے تجربات بیان کرتے ہوئے ویشالی شاڈانگولے نے بتایا کہ ان کا یہ اقدام صرف چار بُنکر خاندانوں کے ساتھ شروع ہوا تھا، جو آج ایک ایسی برادری کی شکل اختیار کر چکا ہے جہاں 90 فیصد سے زیادہ بُنکر نوجوان خواتین ہیں۔ یہ اقدام روایتی دستکاری کے تحفظ کے ساتھ ساتھ ان کے لیے پائیدار روزگار کے مواقع بھی فراہم کر رہا ہے۔ انہوں نے بھارت کی 100 معدومیت کے خطرے سے دوچار بُنائی کی روایات کو دوبارہ زندہ کرنے کے اپنے عزم کا ذکر کرتے ہوئے کہا، “اگر آپ عالمی منڈی میں اپنی شناخت قائم کرنا چاہتے ہیں، تو آپ کو بھارتی بُنائی کی خصوصیات اور اس کی طاقت کو دنیا کے سامنے پیش کرنا ہوگا۔” جے پور رگز کے بانی جناب نند کشور چودھری نے کہا کہ کسی بھی برانڈ کی سب سے بڑی طاقت اس کی مستند معلومات فراہم کرنا ہوتی ہے۔ انہوں نے کہا کہ کوئی بھی برانڈ جتنا زیادہ اپنی جڑوں، روایات اور ورثے سے جڑا ہوتا ہے، حریفوں کے لیے اس کی نقل کرنا اتنا ہی مشکل ہو جاتا ہے۔

معروف فیشن ڈیزائنر راہل مشرا نے مقامی دستکاری کے تحفظ اور فروغ پر زور دیتے ہوئے کہا، “ہر جغرافیائی خطے کی پسند کے مطابق ڈیزائن تبدیل کرنے کے بجائے بھارتی دستکاری کی اصل شناخت اور صداقت کو برقرار رکھنے پر توجہ دینی چاہیے، کیونکہ یہی صداقت بھارتی برانڈز کی سب سے بڑی انفرادیت ہے۔” انہوں نے کہا کہ ہاتھ سے تیار کی جانے والی دستکاری اور ہینڈلوم بھارت کی روح ہیں، اور مصنوعی ذہانت (اے آئی) کے اس دور میں ان کی اہمیت مزید بڑھ جاتی ہے۔

ای کامرس شعبے کے ماہرین نے کہا کہ آن لائن مارکیٹ پلیسز اور حکمت عملی بین الاقوامی توسیع کی بنیاد بن چکی ہیں۔ انہوں نے کہا کہ عالمی سطح پر توسیع کرنے میں یقیناً وقت لگتا ہے، لیکن ایک بار یہ ہدف حاصل ہو جائے تو اس سے طویل مدتی استحکام اور پائیدار ترقی یقینی ہوتی ہے۔ ایمیزون گلوبل سیلنگ کی کنٹری ہیڈ، محترمہ شریندھی کلپاؤڈی نے بتایا کہ اُن کا پلیٹ فارم دو لاکھ سے زائد فروخت کنندگان کو تعاون فراہم کر رہا ہے، جن میں ٹائر-2 اور ٹائر-3 شہروں کے متعدد ہنرمند بھی شامل ہیں۔ برانڈ سازی کی اہمیت پر زور دیتے ہوئے انہوں نے کہا، “بھارت کو صرف زیادہ برآمدات ہی نہیں کرنی چاہئیں، بلکہ عالمی سطح پر ایسی شناخت بھی قائم کرنی چاہیے کہ اسے طویل عرصے تک یاد رکھا جائے۔” انہوں نے مزید کہا، “برانڈ سازی اب صرف ایک اختیار نہیں رہی، بلکہ بقا کی ناگزیر ضرورت بن چکی ہے۔” مقررین نے ٹیکنالوجی، ڈیٹا اور مصنوعی ذہانت کے کردار پر بھی تفصیل سے گفتگو کی۔ انہوں نے علاقائی زبانوں میں اے آئی سے تقویت یافتہ حلوں کے استعمال کے امکانات پر روشنی ڈالی، نیز قابلِ اعتماد سرٹیفکیٹ ، نمونہ لاجسٹکس معاونت، اور بزنس ٹو کنزیومر (بی2سی) برآمدات کے لیے ترغیبات جیسے عملی اقدامات کو بھارتی برانڈز کی عالمی توسیع کے لیے اہم قرار دیا۔

بڑے صنعت کار  نے بھارت کے پیداواری ماحولیاتی نظام، سپلائی چین اور عالمی مسابقتی صلاحیت کو مزید مضبوط بنانے کی ضرورت پر زور دیا۔ ریلائنس انڈسٹریز کے سینئر ایگزیکٹو نائب صدر اور کارپوریٹ و صنعتی امور کے سربراہ، ڈاکٹر انل راجونشی نے کلسٹر ترقی کے سلسلے میں حکومت کی کوششوں کو سراہتے ہوئے کہا کہ ایک مربوط پیداواری ماحولیاتی نظام بھارتی برانڈز کو زیادہ پیداواری صلاحیت، کارکردگی اور عالمی سطح پر مسابقتی برتری فراہم کرے گا۔ ٹرینٹ کے منیجنگ ڈائریکٹر، جناب وینکٹیسالو پلانی سوامی نے کہا کہ بھارت کو اپنی ٹیکسٹائل صنعت کے لیے ایک مضبوط عالمی شناخت تیار کرنی ہوگی، جو معیار، بروقت فراہمی اور بہترین خدمات میں تسلسل پر مبنی ہو، اور اس کے ساتھ ساتھ ویلیو چین کے ہر مرحلے پر زیادہ شفافیت اور رفتار کو یقینی بنانا ہوگا۔ مقررین نے یہ سوال بھی اٹھایا کہ کپاس، جو بھارت کی نمایاں طاقتوں میں سے ایک ہے، اس کی پروسیسنگ اور برانڈنگ اکثر دوسرے ممالک میں کیوں ہوتی ہے۔ انہوں نے ناسکام کی طرز پر ایک ایسے مرکزی ادارے کے قیام کی تجویز دی، جو عالمی برانڈ سازی کے لیے صنعت کو ابتدا سے انتہا تک جامع تعاون فراہم کر سکے۔ انہوں نے کہا کہ طویل مدتی ترقی عالمی منڈیوں تک رسائی کی ایک اہم بنیاد بن چکی ہے، اور بڑے برآمد کنندگان اور ڈیزائنرز کے درمیان تعاون کے ذریعے پیداواری صلاحیت اور تخلیقی صلاحیت کا مؤثر امتزاج قائم کیا جا سکتا ہے۔

ان خیالات کا اظہار سینئر افسران نے بھی اجلاس کے دوران کیا۔ انڈیا ٹریڈ پروموشن آرگنائزیشن (آئی ٹی پی او ) کے چیئرمین جناب جاوید اشرف (آئی ایف ایس ) نے کہا کہ ہندوستان نہ صرف بڑی مقدار میں مصنوعات فروخت کرتا ہے بلکہ بہترین معیار بھی پیش کرتا ہے۔ انہوں نے اس بات پر زور دیا کہ "میڈ ان انڈیا" کی شناخت کو اعلیٰ معیار کا مترادف ہونا چاہیے، اور یہ کہ نمائشیں مائیکرو، چھوٹے اور درمیانے درجے کے کاروباری اداروں (ایم ایس ایم ایز ) کے لیے ایک اہم پلیٹ فارم بنی ہوئی ہیں۔ ہندوستانی برانڈز اور ڈیزائنرز سے خطاب کرتے ہوئے، محترمہ  نیلم شامی راؤ، سکریٹری، وزارت ٹیکسٹائل، نے مضبوط ڈیزائن ہاؤسز، مشترکہ انفراسٹرکچر، اور ای کامرس پلیٹ فارمز پر زیادہ موثر موجودگی کی ضرورت پر زور دیا۔ انہوں نے اس بات پر زور دیا کہ برانڈ سازی ایک طویل مدتی عمل ہے، جس میں مسلسل کوشش، معیار اور جدت کی ضرورت ہوتی ہے۔

سیشن کا اختتام حکومت اور صنعت کے درمیان زیادہ موثر تعاون کے مطالبے کے ساتھ ہوا تاکہ ہندوستانی برانڈز کو عالمی سطح پر قابل اعتماد، اعلیٰ معیار اور مخصوص برانڈز کے طور پر قائم کیا جا سکے۔ اس دوران ہندوستانی دستکاری اور دستکاری کی عالمی سطح پر نمائش کو بڑھانے، کلسٹر کی ترقی کو مضبوط بنانے اور مستند معلومات فراہم کرنے اور معیاری مواد کو ترقی کے اہم ذرائع کے طور پر اپنانے پر خصوصی زور دیا گیا۔

*******

U.No: 58

ش ح۔ن ا

 

(रिलीज़ आईडी: 2285590) आगंतुक पटल : 7