2026 జులై 20 నుంచి 23 వరకు కొచ్చిలోని సదరన్ నేవల్ కమాండ్‌లో ఆపరేషన్ సదరన్ రెడీనెస్ 26-2ను భారత నేవీ నిర్వహించనుంది. నాలుగు రోజుల పాటు నిర్వహించే ఈ బహుళజాతి శిక్షణ కార్యక్రమాన్ని కంబైన్డ్ మారిటైమ్ ఫోర్సెస్ (సీఎంఎఫ్) భాగస్వామ్యంతో చేపడుతున్నారు. సీఎంఎఫ్ ప్రత్యేక శిక్షణ విభాగమైన, భారత నావికాదళ నేతృత్వంలోని కంబైన్డ్ టాస్క్ ఫోర్స్ 154 (సీటీఎఫ్ 154) ఆధ్వర్యంలో ఈ కార్యక్రమం జరుగుతుంది. 

వృత్తిపరమైన సముద్ర భద్రతా శిక్షణకూ, ప్రయోగాత్మక అనుభవానికీ, ఉత్తమ పద్దతులను ఇచ్చిపుచ్చుకోవడానికీ... సీఎంఎఫ్ భాగస్వామ్య దేశాల సిబ్బందిని ఈ కార్యక్రమం ఒకే వేదికపైకి తీసుకువస్తుంది. 40కి పైగా దేశాలతో కూడిన బహుళ జాతీయ సముద్ర భాగస్వామ్య సంస్థ అయిన సీఎంఎఫ్ సహకారంతో... ప్రాంతీయంగా సామర్థ్య నిర్మాణానికి, సామూహిక సముద్ర భద్రతకు భారత నౌకాదళం తన వంతు సహకారాన్ని అందిస్తుంది.

బోధన, సిమ్యులేటర్ ఆధారిత శిక్షణ, ప్రయోగాత్మక అనుభవం ఈ శిక్షణలో భాగంగా ఉంటాయి. ఈ సెషన్లలో సముద్ర చట్టాలు, సముద్ర రంగంపై అవగాహన, సమాచార వినిమయం, మాదక ద్రవ్యాలను అరికట్టడం, బలగాల పరిరక్షణ, అనూహ్య దాడులు, మానవ రహిత సముద్ర వ్యవస్థలు, తదితర అంశాల గురించి వివరిస్తారు. ఈ కార్యక్రమంలో పాల్గొనేవారికి నష్ట నివారణ, అగ్నిమాపకం, మ్యారిటైమ్ కమ్యూనికేషన్లు, సముద్రంలో ప్రాణరక్షణ, బోర్డింగ్ విధానాలపై శిక్షణ ఇస్తారు. అలాగే, భారతీయ నౌకాదళానికి చెందిన నౌకలో ప్రత్యేక శిక్షణ పొందుతారు.

భారతీయ నౌకాదళం అందించే ఆధునిక శిక్షణ సదుపాయాలు, అత్యాధునిక సిమ్యులేటర్లు, అధునాతన బోధనా పద్ధతులు, వృత్తిపరమైన అనుభవాన్ని ఆపరేషన్ సదరన్ రెడీనెస్ 26-2 ప్రదర్శిస్తుంది. బోధనను ఆచరణాత్మక అనువర్తనంతో అనుసంధానించడం ద్వారా ఈ కార్యక్రమంలో పాల్గొనే దేశాల మధ్య పరస్పర కార్యాచరణ సామర్థ్యాన్నీ, వృత్తిపరమైన అవగాహననూ, సహకారాన్నీ పెంపొందించడమే ఈ కార్యక్రమ లక్ష్యం.

కొచ్చిలోని సదరన్ నేవల్ కమాండ్లో నిర్వహిస్తున్న ఈ కార్యక్రమం.. బహుళ దేశాల నావికా దళ శిక్షణలో పెరుగుతున్న భారతీయ నౌకాదళ సహకారాన్ని తెలియజేస్తుంది. అలాగే అత్యుత్తమ శిక్షణ కేంద్రంగా సదరన్ నేవల్ కమాండ్ పాత్రను తెలియజేస్తుంది. వృత్తిపరమైన సముద్ర శిక్షణకు ప్రాధాన్య ఎంపికగా భారతీయ నౌకాదళ స్థానాన్ని బలోపేతం చేస్తుంది.

***