بھارتی بحریہ 20 سے 23 جولائی 2026 تک جنوبی بحری کمان، کوچی میں آپریشن سدرن ریڈینس 2-26 کی میزبانی کرے گی۔ چار روزہ کثیر ملکی تربیتی پروگرام بھارتی بحریہ کی قیادت میں قائم کمبائنڈ ٹاسک فورس 154 (سی ٹی ایف 154)، جو کمبائنڈ میری ٹائم فورسز (سی ایم ایف) کی خصوصی تربیتی ٹاسک فورس ہے، کے تحت سی ایم ایف کے اشتراک سے منعقد کیا جائے گا۔

اس پروگرام میں سی ایم ایف کے شراکت دار ممالک کے اہلکار شرکت کریں گے، جہاں انہیں بحری سلامتی سے متعلق پیشہ ورانہ تربیت، عملی تجربہ اور بہترین طریقۂ کار کے تبادلے کا موقع فراہم کیا جائے گا۔ 40 سے زائد ممالک پر مشتمل کثیر ملکی بحری شراکت داری سی ایم ایف کے ساتھ تعاون کے ذریعے بھارتی بحریہ علاقائی استعداد  میں اضافے اور اجتماعی بحری سلامتی کے فروغ میں اپنا کردار جاری رکھے ہوئے ہے۔

تربیتی پروگرام میں کلاس روم کی تدریس، سمیولیٹر پر مبنی تربیت اور عملی مشقیں شامل ہوں گی۔ اس دوران بحری قانون، بحری حدود سے متعلق بیداری اور معلومات کے تبادلے، منشیات کی اسمگلنگ کے انسداد، فورس پروٹیکشن، غیر روایتی خطرات اور بغیر عملے کے بحری نظام جیسے موضوعات پر تربیت دی جائے گی۔ شرکاء کو نقصانات پر قابو پانے اور آگ بجھانے، بحری مواصلات، سمندر میں بقا، جہاز پر چڑھائی کے طریقۂ کار اور بھارتی بحریہ کے جہاز پر عملی تربیت بھی فراہم کی جائے گی۔

آپریشن سدرن ریڈینس 2-26 بھارتی بحریہ کے جدید تربیتی ڈھانچے، جدید ترین سمیولیٹروں، اعلیٰ تدریسی طریقۂ کار اور پیشہ ورانہ مہارت کو اجاگر کرے گا۔ نظریاتی تعلیم کو عملی تربیت کے ساتھ مربوط کرنے کا مقصد شریک ممالک کے درمیان باہمی ہم آہنگی، پیشہ ورانہ فہم اور تعاون کو مزید مضبوط بنانا ہے۔

جنوبی بحری کمان، کوچی میں اس تربیتی پروگرام کا انعقاد کثیر ملکی بحری تربیت میں بھارتی بحریہ کے بڑھتے ہوئے کردار کو مزید مستحکم کرتا ہے۔ ساتھ ہی یہ جنوبی بحری کمان کی ایک ممتاز تربیتی مرکز کے طور پر حیثیت کو نمایاں کرتا ہے اور پیشہ ورانہ بحری تربیت کے لیے بھارتی بحریہ کے ترجیحی مرکز ہونے کو مزید تقویت دیتا ہے۔

************

 ش ح۔ ت ف ۔ م ذ

UR. No. 23