ઇન્ડિયન કાઉન્સિલ ઓફ એગ્રીકલ્ચરલ રિસર્ચ (ICAR) અને એગ્રીનોવેટ ઇન્ડિયા લિમિટેડ (AgIn) દ્વારા સંયુક્ત રીતે NASC કોમ્પ્લેક્સ, નવી દિલ્હી ખાતે “કોર્પોરેટ સોશિયલ રિસ્પોન્સિબિલિટી (CSR) કોન્ક્લેવ 2026 માટે આઈસીએઆર ટેકનોલોજી પોર્ટફોલિયો” નું સફળતાપૂર્વક આયોજન કરવામાં આવ્યું હતું. આ કોન્ક્લેવ કોર્પોરેટ સોશિયલ રિસ્પોન્સિબિલિટી (CSR) ની પહેલો દ્વારા ટકાઉ કૃષિ વિકાસને પ્રોત્સાહન આપવા માટે ICAR, કોર્પોરેટ સંસ્થાઓ, ઉદ્યોગ જગતના અગ્રણીઓ, પરોપકારી સંસ્થાઓ અને અન્ય હિતધારકો વચ્ચે ભાગીદારીને મજબૂત કરવા માટે એક અગ્રણી પ્લેટફોર્મ તરીકે ઉપયોગી સાબિત થઈ છે.

આ કોન્ક્લેવમાં ICARના CSR-રેડી ટેકનોલોજીના પોર્ટફોલિયો, નવીન સંશોધનો અને માપી શકાય તેવા હસ્તક્ષેપોનું પ્રદર્શન કરવામાં આવ્યું હતું. આ વર્ષની કોન્ક્લેવના મુખ્ય વિષયોમાં ભારતીય કૃષિને હવામાનની અસરોથી સુરક્ષિત બનાવવી; કુદરત આધારિત ઉકેલો અને પાક વૈવિધ્યકરણ દ્વારા જમીનના સ્વાસ્થ્યમાં સુધારો; સ્વાસ્થ્ય માટે કૃષિ; કૃષિ કૌશલ્ય; અને કૃષિમાં મહિલાઓ તેમજ કૃષિ વિસ્તરણ (એક્સ્ટેંશન) નો સમાવેશ થાય છે. આ અગ્રતા ધરાવતા ક્ષેત્રોનો ઉદ્દેશ્ય વ્યૂહાત્મક સીએસઆર રોકાણો દ્વારા ટકાઉ ગ્રામીણ વિકાસને પ્રોત્સાહન આપવાની સાથે મહત્વપૂર્ણ કૃષિ પડકારોનો સામનો કરવાનો છે.

આ કાર્યક્રમને કોર્પોરેટ સેક્ટર તરફથી જબરદસ્ત પ્રતિસાદ મળ્યો હતો. 75 ઉદ્યોગોના આશરે 150 પ્રતિનિધિઓએ આ કોન્ક્લેવમાં ભાગ લીધો હતો, જે CSR ભાગીદારી દ્વારા કૃષિ પરિવર્તનને ટેકો આપવામાં ઉદ્યોગ જગતના વધતા રસને પ્રતિબિંબિત કરે છે. આ ઉપરાંત, 570 સહભાગીઓ ઓનલાઈન માધ્યમથી આ કાર્યક્રમમાં જોડાયા હતા, જ્યારે યુટ્યુબ પરના લાઈવ વેબકાસ્ટે 1,600 થી વધુ દર્શકોને આકર્ષ્યા હતા, જેણે દેશભરમાં આ કાર્યક્રમની પહોંચ અને જોડાણનો વ્યાપક વિસ્તાર કર્યો હતો.

આ કોન્ક્લેવના પ્રારંભિક તબક્કા તરીકે, હૈદરાબાદ (20 જૂન 2026), બેંગલુરુ (23 જૂન 2026), મુંબઈ (1 જુલાઈ 2026), અને કોલકાતા (7 જુલાઈ 2026) ખાતે ચાર પ્રાદેશિક ICAR સીએસઆર અને ટેકનોલોજી પોર્ટફોલિયો રોડશોનું આયોજન કરવામાં આવ્યું હતું. આ રોડશોનો મુખ્ય હેતુ ટકાઉ કૃષિ વિકાસ માટે વ્યૂહાત્મક સહયોગ સ્થાપવા તેમજ CSR ભાગીદારોને જોડવાનો અને પ્રોત્સાહિત કરવાનો હતો. ટેકનોલોજીના વ્યાપારીકરણને પ્રોત્સાહન આપવા અને સીએસઆર-સંચાલિત ભાગીદારીને મજબૂત કરવા માટે આ કાર્યક્રમોમાં ICAR સંસ્થાઓ, કોર્પોરેટ સંસ્થાઓ, ઉદ્યોગ જગતના અગ્રણીઓ, સ્ટાર્ટઅપ્સ, ઉદ્યોગસાહસિકો, બિન-સરકારી સંસ્થાઓ અને મીડિયાના પ્રતિનિધિઓ એકસાથે આવ્યા હતા. સામૂહિક રીતે, આ ચારેય રોડશોમાં 500થી વધુ હિતધારકોની ભાગીદારી જોવા મળી હતી, જેમાં અનેક સંસ્થાઓએ સીએસઆર-સમર્થિત પહેલો દ્વારા આઈસીએઆર સાથે ભાગીદારી કરવામાં ભારે રસ દાખવ્યો હતો.

આ કોન્ક્લેવ ખૂબ જ પ્રોત્સાહક નોંધ સાથે સંપન્ન થઈ હતી, જેમાં અગ્રણી ઉદ્યોગો અને CSR સંસ્થાઓ, જેમ કે એગ્રીકલ્ચર ઇન્સ્યોરન્સ કંપની ઓફ ઇન્ડિયા લિમિટેડ (AICL), એસબીઆઈ ફાઉન્ડેશન, યુકો બેંક, આઈસીઆઈસીઆઈ ફાઉન્ડેશન, બાયોવેટ પ્રાઇવેટ લિમિટેડ, ફેડરેશન ઓફ ઇન્ડિયન ચેમ્બર્સ ઓફ કોમર્સ એન્ડ ઇન્ડસ્ટ્રી (FICCI), ઈન્ફાહ, વેંકટેશ્વરા હેચરીઝ પ્રાઇવેટ લિમિટેડ, પીડીલાઇટ ઇન્ડસ્ટ્રીઝ લિમિટેડ, અને યસ બેંકએ કોર્પોરેટ સોશિયલ રિસ્પોન્સિબિલિટી (CSR) અને રિસર્ચ એન્ડ ડેવલપમેન્ટ પહેલો દ્વારા આઈસીએઆર અને એગ્રીનોવેટ ઇન્ડિયા લિમિટેડ (AgIn) સાથે સહયોગ કરવાની તેમની પ્રતિબદ્ધતા વ્યક્ત કરી હતી. આ વ્યૂહાત્મક ભાગીદારીથી નવીન કૃષિ ટેકનોલોજીના સ્વીકાર અને વિસ્તરણને વેગ મળવાની, ટકાઉ કૃષિ વિકાસને પ્રોત્સાહન મળવાની અને દેશભરના ખેડૂત સમુદાયોની આજીવિકામાં નોંધપાત્ર વધારો થવાની અપેક્ષા છે.

આ કોન્ક્લેવે સમાવેશી કૃષિ વૃદ્ધિ માટે વિજ્ઞાન, નવપ્રવર્તન અને વ્યૂહાત્મક ભાગીદારીનો લાભ લેવા માટેની આઈસીએઆરની પ્રતિબદ્ધતાનો પુનરોચ્ચાર કર્યો હતો. સંશોધકો, ઉદ્યોગ જગતના અગ્રણીઓ, નીતિ નિર્માતાઓ, વિકાસલક્ષી સંસ્થાઓ અને સીએસઆર હિતધારકોને એકસાથે લાવીને, આ કાર્યક્રમે ભારતીય કૃષિના લાભાર્થે કૃષિ ટેકનોલોજીના વ્યાપારીકરણ અને સ્વીકારને વેગ આપવા માટે સીએસઆર સંસાધનોને એકત્રિત કરવામાં એક મહત્વપૂર્ણ સીમાચિહ્નરૂપ ઘટના અંકિત કરી છે.

IJ/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com