প্ৰধানমন্ত্ৰী শ্ৰী নৰেন্দ্ৰ মোদীৰ অধ্যক্ষতাত অনুষ্ঠিত অৰ্থনৈতিক পৰিক্ৰমাৰ কেবিনেট কমিটিয়ে আজি উত্তৰপ্ৰদেশৰ বাৰাণসী চহৰৰ যান-জঁট হ্ৰাস কৰাৰ উদ্দেশ্যে গংগা নদীৰ পাৰে পাৰে সংযোগ ব্যৱস্থাৰে সৈতে ১৯নং ৰাষ্ট্ৰীয় ঘাইপথ আৰু বাৰাণসী ৰিং ৰোডৰ মাজত এটা সংযোগকাৰী কৰিডৰ নিৰ্মাণৰ বাবে অনুমোদন জনাইছে। ৪৬.০৩৯ কিলোমিটাৰ দৈৰ্ঘ্যৰ এই প্ৰকল্পটোৰ অধীনত এটা ৬লেনযুক্ত এলিভেটেড মূল কেৰিজৱে, এটা আকৰ্ষণীয় কেবল-ষ্টেড দলং, এখন এক্সট্ৰাড’জড ফুট অভাৰ ব্ৰীজ-তথা-প্ৰধান দলং, লুপ, ৰেম্প, সংযোগকাৰী পথ আৰু চাৰ্ভিচ ৰোড নিৰ্মাণ কৰা হ’ব। এই প্ৰকল্পটো ৰাষ্ট্ৰীয় ঘাইপথৰ অধীনত ১৪,৪৪৭.৬৪ কোটি টকাৰ সৰ্বমুঠ মূলধনী ব্যয়ৰে হাইব্ৰীড এনুইটি মডেলৰ ভিত্তিত ৰূপায়ণ কৰা হ’ব, য’ত ৬,০৩৭.৮৫ কোটি টকাৰ অসামৰিক নিৰ্মাণ ব্যয় (ইউটিলিটি স্থানান্তৰণ সহ, জিএছটি অবিহনে) আৰু ৫৪১.১১ কোটি টকাৰ ভূমি অধিগ্ৰহণ ব্যয় অন্তৰ্ভুক্ত হৈ আছে।

এই প্ৰকল্পই ১৯নং ৰাষ্ট্ৰীয় ঘাইপথ আৰু বাৰাণসী ৰিং ৰোডৰ মাজত এক মসৃণ সংযোগ প্ৰদান কৰিব, যাৰ ফলত চহৰখনৰ পথ নেটৱৰ্কৰ যান-জঁট বহু পৰিমাণে হ্ৰাস পাব আৰু চহৰীয়া যাতায়ত ব্যৱস্থা উন্নত হ’ব। ঘণ্টাত ৮০-১০০ কিলোমিটাৰ বেগত গাড়ী চলাব পৰাকৈ ডিজাইন কৰা এই কৰিডৰে প্ৰকল্পটোৰ প্ৰভাৱিত অঞ্চলৰ গড় ভ্ৰমণ সময় প্ৰায় ৬০ মিনিটৰ পৰা ২০ মিনিটলৈ হ্ৰাস কৰিব বুলি আশা কৰা হৈছে, যাৰ ফলত প্ৰায় ৬৭ শতাংশ সময় হ্ৰাস পাব। ১৯নং ৰাষ্ট্ৰীয় ঘাইপথ আৰু কাশী ৰে’লৱে ষ্টেচনৰ মাজৰ ভ্ৰমণ সময় প্ৰায় ৫০ মিনিটৰ পৰা প্ৰায় ২৫ মিনিটলৈ হ্ৰাস পাব, যাৰ ফলত প্ৰায় ২৫ মিনিট (প্ৰায় ৫০ শতাংশ) সময় ৰাহি হ’ব।

পিএম গতি শক্তি নেচনেল মাষ্টাৰ প্লেনৰ সৈতে সংগতি ৰাখি এই কৰিডৰে প্ৰধান ঘাইপথ, ৰে’লৱে ষ্টেচন, লাল বাহাদুৰ শাস্ত্ৰী বিমানবন্দৰ আৰু ৰামনগৰ আইডব্লিউএআই বন্দৰলৈ মসৃণ যাতায়তৰ সুবিধা প্ৰদান কৰি মাল্টি-মডেল সংযোগ ব্যৱস্থা শক্তিশালী কৰিব। ইয়াৰ লগতে কাশী বিশ্বনাথ মন্দিৰ, বেনাৰস হিন্দু বিশ্ববিদ্যালয়, নমো ঘাট, ৰামনগৰ দুৰ্গ আৰু বাৰাণসীৰ ঘাটসমূহকে ধৰি প্ৰধান ধৰ্মীয়, শৈক্ষিক আৰু সাংস্কৃতিক স্থানসমূহলৈ সংযোগ ব্যৱস্থা উল্লেখনীয়ভাৱে উন্নত কৰিব। গুৰুত্বপূৰ্ণ অৰ্থনৈতিক, সামাজিক আৰু লজিষ্টিক কেন্দ্ৰসমূহক সংযোগ কৰি এই প্ৰকল্পই লজিষ্টিক কাৰ্যক্ষমতা বৃদ্ধি কৰিব, পথ সুৰক্ষা উন্নত কৰিব, পৰ্যটন আৰু তীৰ্থযাত্ৰা সহজতৰ কৰিব আৰু সমগ্ৰ পূব উত্তৰ প্ৰদেশৰ বহনক্ষম আঞ্চলিক অৰ্থনৈতিক বিকাশত সহায় কৰিব।

বাৰাণসী আৰু চান্দৌলীৰ পথ নেটৱৰ্কৰ যান-জঁট মুক্ত কৰাৰ বাবে এক পৰিৱৰ্তনকামী চহৰীয়া যাতায়ত প্ৰকল্প হিচাপে এই কৰিডৰৰ পৰিকল্পনা কৰা হৈছে। ই ১৯নং ৰাষ্ট্ৰীয় ঘাইপথ, বাৰাণসী ৰিং ৰোড, ৰামনগৰ/বেনাৰস হিন্দু বিশ্ববিদ্যালয় আৰু অন্যান্য প্ৰধান চহৰীয়া গন্তব্যস্থানসমূহৰ মাজত এক দ্ৰুতবেগী, প্ৰৱেশ-নিয়ন্ত্ৰিত সংযোগ প্ৰদান কৰিব। বাৰাণসীলৈ প্ৰতিবছৰে ১৫ কোটিতকৈও অধিক পৰ্যটক আৰু তীৰ্থযাত্ৰী অহাৰ পৰিপ্ৰেক্ষিতত, এই প্ৰকল্পই চহৰখনৰ বৰ্তমানৰ পথ নেটৱৰ্কৰ যান-জঁট যথেষ্ট পৰিমাণে হ্ৰাস কৰাৰ লগতে কাশী বিশ্বনাথ মন্দিৰ, বেনাৰস হিন্দু বিশ্ববিদ্যালয়, নমো ঘাট, ৰামনগৰ দুৰ্গ, বাৰাণসীৰ ঘাটসমূহ আৰু কাশী ৰে’লৱে ষ্টেচনলৈ সংযোগ ব্যৱস্থা লক্ষণীয়ভাৱে উন্নত কৰিব। বেনাৰস হিন্দু বিশ্ববিদ্যালয়/লংকা আৰু সামনে ঘাটৰ মাজত এটা এলিভেটেড স্পাৰ নিৰ্মাণ কৰাৰ ফলত থলুৱা যাতায়তক বাহিৰৰ যান-বাহনৰ পৰা পৃথক কৰি অতি ব্যস্ত লংকা জংচনৰ যান-জঁট অধিক সহজ কৰি তোলা হ’ব।

প্ৰকল্পটোৱে নিয়ন্ত্ৰিত-প্ৰৱেশ যাতায়তৰ জৰিয়তে পথ সুৰক্ষা উন্নত কৰিব, বাহন চলোৱাৰ খৰচ আৰু ধোঁৱা নিৰ্গমন হ্ৰাস কৰিব, ভ্ৰমণৰ নিৰ্ভৰযোগ্যতা বৃদ্ধি কৰিব আৰু যাত্ৰী তথা মালবাহী গাড়ীৰ কাৰ্যক্ষম চলাচল সুচল কৰিব। তদুপৰি, ই ঘণ জনবসতিপূৰ্ণ চহৰৰ মূল অংশৰ পৰা দীৰ্ঘদূৰত্বৰ যান-বাহনসমূহক অন্য পথেৰে ডাইভাৰ্ট কৰি ১৯নং ৰাষ্ট্ৰীয় ঘাইপথ, বেনাৰস হিন্দু বিশ্ববিদ্যালয়-ৰামনগৰ কৰিডৰ আৰু ৩৫নং ৰাষ্ট্ৰীয় ঘাইপথৰ যান-জঁট মুক্ত কৰিব।

এই প্ৰকল্পত কেইবাটাও যুগান্তকাৰী অভিযান্ত্ৰিক বৈশিষ্ট্য অন্তৰ্ভুক্ত কৰা হৈছে, যাৰ ভিতৰত আছে— গংগা নদীৰ ওপৰত এখন দৃষ্টিনন্দন ৯১০ মিটাৰ দৈৰ্ঘ্যৰ কেবল-ষ্টেড দলং, ট্ৰেভেলেটৰ যুক্ত ১.৩২ কিলোমিটাৰ দৈৰ্ঘ্যৰ এখন এক্সট্ৰাড’জড ফুট অভাৰ ব্ৰীজ তথা প্ৰধান দলং, যিয়ে কাশী বিশ্বনাথ মন্দিৰলৈ পথচাৰীৰ বাবে মসৃণ সংযোগ প্ৰদান কৰিব, বৰ্তমানৰ/প্ৰস্তাৱিত মালৱীয় দলঙৰ ওপৰেৰে এখন ৰে’ল অভাৰ ব্ৰীজ, জৰুৰীকালীন পাৰ্কিং বে’, শব্দ প্ৰতিৰোধক বেৰ, ফেচাদে লাইটিং আৰু বাৰাণসীৰ সাংস্কৃতিক ঐতিহ্যৰ দ্বাৰা অনুপ্ৰাণিত স্থাপত্যৰ উপাদান। এই বৈশিষ্ট্যসমূহেই কেৱল পৰিবহনৰ কাৰ্যক্ষমতাই বৃদ্ধি নকৰে, বৰং চহৰখনৰ সৌন্দৰ্যও বৃদ্ধি কৰিব, বাৰাণসীৰ আকাশমাৰ্গত এক নতুন মাত্ৰা যোগ কৰিব আৰু ভাৰতৰ অন্যতম প্ৰধান ধৰ্মীয় তথা সাংস্কৃতিক কেন্দ্ৰ হিচাপে ইয়াৰ স্থানক অধিক শক্তিশালী কৰিব।

পিএম গতি শক্তি ৰাষ্ট্ৰীয় মাষ্টাৰ প্লেন অনুসৰি পৰিকল্পিত এই কৰিডৰে এটা অৰ্থনৈতিক কেন্দ্ৰ (চান্দৌলী বিশেষ অৰ্থনৈতিক মণ্ডল), এটা সামাজিক কেন্দ্ৰ (চান্দৌলী আকংক্ষী জিলা) আৰু ছয়টা প্ৰধান লজিষ্টিক কেন্দ্ৰ যেনে— লাল বাহাদুৰ শাস্ত্ৰী বিমানবন্দৰ, কাশী ৰে’লৱে ষ্টেচন, বেনাৰস ৰে’লৱে ষ্টেচন, বাৰাণসী চিটি ৰে’লৱে ষ্টেচন, পণ্ডিৎ দীন দয়াল উপাধ্যায় জংচন আৰু ৰামনগৰ আইডব্লিউএআই বন্দৰক সংযোগ কৰি মাল্টি-মডেল সংযোগক শক্তিশালী কৰিব। এই পৰিবহন কেন্দ্ৰসমূহ আৰু কাশী বিশ্বনাথ মন্দিৰ, বেনাৰস হিন্দু বিশ্ববিদ্যালয়, নমো ঘাট, ৰামনগৰ দুৰ্গ আৰু বাৰাণসীৰ ঘাটসমূহৰ দৰে গুৰুত্বপূৰ্ণ স্থানসমূহৰ মাজত মসৃণ সংযোগ প্ৰদান কৰি এই প্ৰকল্পই মাল্টি-মডেল সংহতি বৃদ্ধি কৰিব, লজিষ্টিক কাৰ্যক্ষমতা উন্নত কৰিব, পৰ্যটন আৰু তীৰ্থযাত্ৰা সুচল কৰিব আৰু সমগ্ৰ পূব উত্তৰ প্ৰদেশৰ বহনক্ষম আঞ্চলিক অৰ্থনৈতিক বিকাশত সহায় কৰিব।

সামগ্ৰিকভাৱে, প্ৰস্তাৱিত গংগা এলিভেটেড কৰিডৰে এটা আধুনিক, উচ্চ ক্ষমতাসম্পন্ন চহৰীয়া পৰিবহন কৰিডৰ গঢ়ি তুলিব, যিয়ে বাৰাণসীত দ্ৰুত, সুৰক্ষিত আৰু অধিক নিৰ্ভৰযোগ্য সংযোগ প্ৰদান কৰি যাতায়ত ব্যৱস্থাৰ পৰিৱৰ্তন সাধন কৰিব। লগতে ই যান-জঁট উল্লেখনীয়ভাৱে হ্ৰাস কৰিব, মাল্টি-মডেল সংহতি শক্তিশালী কৰিব, পৰ্যটন আৰু তীৰ্থযাত্ৰাৰ আন্তঃগাঁথনি উন্নত কৰিব আৰু পিএম গতি শক্তি আৰু বিকশিত ভাৰতৰ সপোনৰ সৈতে সংগতি ৰাখি বহনক্ষম অৰ্থনৈতিক বিকাশত সহায় কৰিব।

কৰিডৰৰ মেপ:

***

MJPS/DB