بین الریاستی مصنوعی منشیات کی اسمگلنگ کرنے والے گروہ کے خلاف ایک بڑی کامیابی حاصل کرتے ہوئے، سینٹرل بیورو آف نارکوٹکس مدھیہ پردیش یونٹ نے پونے، مہاراشٹر میں میفیڈرون تیار کرنے والی ایک جدید ترین لیبارٹری کو بے نقاب کرتے ہوئے اسے ختم کر دیا ہے، اور 'آپریشن وجر' کے تحت اس گروہ کے دو مرکزی سرغناؤں کو اجین (مدھیہ پردیش) اور جودھپور (راجستھان) سے گرفتار کر لیا ہے۔

اس کارروائی کو پریوینٹیو برانچ، دفتر برائے ڈپٹی نارکوٹکس کمشنر، سی بی این، نیمچ نے مخصوص خفیہ معلومات کی بنیاد پر انجام دیا۔ یہ تفتیش اور مربوط کارروائیاں یکم سے 10 جولائی 2026 کے درمیان کی گئیں۔

کارروائی کے دوران، سی بی این کے افسران نے پونے میں ایم ڈی تیار کرنے والی ایک ہائی ٹیک غیر قانونی لیبارٹری کو قبضے میں لے لیا، جس کے ساتھ ہی مصنوعی منشیات بنانے میں استعمال ہونے والی جدید ترین مشینری، لیبارٹری کے آلات، پریکرسر کیمیکلز اور حفاظتی سامان بھی برآمد کر لیا گیا۔ اس گروہ کے مرکزی سرغناؤں سمیت دو ملزمان کو این ڈی پی ایس ایکٹ، 1985 کے تحت گرفتار کر لیا گیا ہے۔

یہ کارروائی فروری 2026 میں شروع کی گئی تفتیش کا ہی تسلسل ہے، جب سی بی این نیمچ نے مندسور کے مقام پر ایک مسافر بس کو روکا تھا اور 8.17 کلو گرام میفیڈرون ضبط کی تھی۔ اس کے بعد کی جانے والی تلاشیوں کے نتیجے میں تھاولے، مہو میں ایک غیر قانونی لیبارٹری کا پتہ چلا، جس کے بعد 43.82 کلو گرام میفیڈرون، 261.32 کلو گرام پریکرسر کیمیکلز اور جدید مینوفیکچرنگ آلات برآمد کر کے قبضے میں لے لیے گئے۔

مسلسل خفیہ اطلاعات اور وسیع پیمانے پر کی جانے والی بین الریاستی تفتیش کی بنیاد پر، پریوینٹیو ٹیم نے روپوش مرکزی منصوبہ ساز کا سراغ لگا لیا، جو جعلی شناختی دستاویزات کا استعمال کرتے ہوئے مسلسل کئی ریاستوں میں اپنے ٹھکانے بدل رہا تھا۔ ایک انتہائی خفیہ انڈر کور آپریشن کے بعد، ملزم کو اجین (مدھیہ پردیش) پولیس کے گراں قدر تعاون سے 3 جولائی 2026 کی رات گئے اجین سے کامیابی کے ساتھ گرفتار کر لیا گیا۔

وسیع پیمانے پر کی جانے والی تفتیش کے دوران یہ انکشاف ہوا کہ اس سنڈیکیٹ نے دگی، بھوسری، پونے میں ایم ڈی تیار کرنے والی ایک اور جدید ترین سہولت قائم کر رکھی تھی، جس کی مالی معاونت اور نگرانی جودھپور میں موجود ایک شریکِ سازشی کر رہا تھا۔ فوری کارروائی کرتے ہوئے، سی بی این کی ٹیموں نے 9 جولائی 2026 کی رات گئے پونے اور جودھپور میں بیک وقت چھاپے مارے، جس کے نتیجے میں دوسرے سازشی کو گرفتار کر لیا گیا اور اس خفیہ لیبارٹری کو تباہ کر دیا گیا۔ کارروائی کے دوران جدید ترین ڈیجیٹل مشینری، لیبارٹری کے آلات، بھاری شیشے کے برتن، پیش رو کیمیکلز اور حفاظتی سامان ضبط کر لیا گیا۔ تمام ضبط شدہ مشینری، آلات اور کیمیکلز کو این ڈی پی ایس ایکٹ، 1985 کی دفعات کے تحت قبضے میں لے لیا گیا ہے۔ مزید تفتیش جاری ہے۔

سینٹرل بیورو آف نارکوٹکس وزارتِ خزانہ کے ماتحت ایک ریگولیٹری اور قانون نافذ کرنے والا ادارہ ہے جو افیم کی قانونی کاشت کی نگرانی کرتا ہے، لائسنس یافتہ کسانوں سے فصل حاصل کرتا ہے، اور نفسیاتی مادوں  اور پریکرسر کیمیکلز کی بین الاقوامی تجارت کو باقاعدہ بناتا ہے۔ گوالیار میں ہیڈ کوارٹر رکھنے والا سی بی این اس سخت ریگولیٹری نگرانی کے ساتھ ساتھ منشیات کے خلاف فعال کارروائیاں بھی کرتا ہے، جس کے تحت وہ منشیات کے جرائم کی تفتیش کرتا ہے اور اسمگلنگ اور منشیات کے غلط استعمال کو روکنے کے لیے این ڈی پی ایس ایکٹ کے تحت غیر قانونی منشیات اور اثاثوں کو ضبط کرتا ہے۔

موجودہ کیلنڈر سال کے دوران، سی بی این نے 142 کیسز درج کیے ہیں اور 193 گرفتاریاں عمل میں لائی ہیں، جن میں چار خفیہ لیبارٹریوں کا پردہ فاش کرنا بھی شامل ہے۔ اس طرح کی مسلسل نافذ العمل کارروائیوں کے ذریعے، سی بی این منظم منشیات کی اسمگلنگ کے نیٹ ورکس کو جڑ سے اکھاڑ پھینکنے اور 'منشیات سے مبرا بھارت' (نشا مکت بھارت) کے قومی وژن کو حاصل کرنے کے لیے اپنے غیر متزلزل عزم کا مظاہرہ جاری رکھے ہوئے ہے۔

***

 (ش ح –ا ب ن)

U.No:9904