مرکزی وزیرِ تجارت و صنعت جناب پیوش گوئل 13 سے 17 جولائی 2026 تک اسپین، بیلجیم اور فن لینڈ کا دورہ کرنے والے ایک اعلیٰ سطحی بھارتی تجارتی وفد کی قیادت کریں گے۔ یہ دورہ تجارت، سرمایہ کاری، ٹیکنالوجی، اختراع اور پائیداری پر توجہ مرکوز کرتے ہوئے یورپ بھر میں اقتصادی شراکت داری کو مضبوط بنانے کے بھارت کے عزم کی عکاسی کرتا ہے۔

وفد میں جدید مصنوعات سازی، صاف توانائی، رقمی ٹیکنالوجی، جواہرات و زیورات، غذائی مصنوعات سازی، صحت نگہداشت اور ڈیزائن سمیت مختلف شعبوں کی سرکردہ بھارتی کمپنیاں شامل ہیں۔

13 جولائی کو اسپین کے دورے کے دوران جناب گوئل دوطرفہ تجارت اور سرمایہ کاری کو آگے بڑھانے اور مجوزہ بھارت-یورپی یونین آزاد تجارتی معاہدے (ایف ٹی اے) سے پیدا ہونے والے مواقع سے فائدہ اٹھانے پر توجہ مرکوز کریں گے۔ وہ حکومتِ اسپین کے اول نائب صدر اور وزیرِ معیشت، تجارت و کاروبار عزت مآب جناب کارلوس کوئرپو کابالیرو؛ وزیرِ صنعت و سیاحت عزت مآب جناب جورڈی ہیریو بوہر؛ اور وزیرِ خارجہ، یورپی یونین و تعاون عزت مآب جناب خوسے مانوئل الباریس بوئینو کے ساتھ دوطرفہ ملاقاتیں کریں گے۔ وہ اسپین کی سرکردہ کمپنیوں اور صنعتی انجمنوں کے ساتھ بھارت-اسپین تجارتی گول میز اجلاس کی صدارت بھی کریں گے، جس کا مقصد بھارت میں سرمایہ کاری کے مواقع کو اجاگر کرنا اور کاروباری اداروں کے درمیان زیادہ سے زیادہ شراکت داری کی حوصلہ افزائی کرنا ہے۔

جناب گوئل اسپین کے ایوانِ تجارت، سی ای او ای اور آئی سی ای ایکس اسپین ٹریڈ اینڈ انویسٹمنٹ کے ساتھ ایک تجارتی گول میز اجلاس میں شرکت کریں گے۔ اس اجلاس میں بھارت اور اسپین کے صنعتی رہنما موٹر گاڑیوں، قابلِ تجدید توانائی، ریلوے، مصنوعی ذہانت، نیم موصلات، غذائی مصنوعات سازی اور سیاحت کے شعبوں میں مواقع تلاش کرنے کے لیے یکجا ہوں گے۔

آئیبرڈرولا، اکسیونا، سی اے ایف، ٹالگو، گیسٹیمپ اور اندرا جیسی اسپینی کمپنیاں پہلے ہی بھارت میں مضبوط موجودگی رکھتی ہیں، جبکہ ٹی سی ایس، انفوسس، وِپرو، ٹیک مہندرا اور ایل اینڈ ٹی سمیت بھارتی کمپنیاں رقمی تبدیلی اور صنعت 4.0 کی معاونت کے لیے اسپین میں اپنی سرگرمیوں کو وسعت دے رہی ہیں۔ یہ دورہ اسپین-بھارت دوہرے سال 2026 کے موقع پر بھی ہو رہا ہے، جس کے تحت سفارتی تعلقات کے 70 سال مکمل ہونے کی یاد منائی جا رہی ہے اور کاروباری اداروں کے درمیان شراکت داری کو مضبوط بنانے پر خصوصی توجہ دی جا رہی ہے۔

14 اور 15 جولائی کو بیلجیم میں جناب گوئل اینٹورپ کی بندرگاہ اور اینٹورپ عالمی ہیرا مرکز کا دورہ کریں گے۔ اینٹورپ کی بندرگاہ کا دورہ یورپ کے ایک سرکردہ نقل و حمل و رسد کے مرکز کے بارے میں معلومات فراہم کرے گا اور کثیر ذرائع نقل و حمل کے باہمی ربط، ماحول دوست رسدی نظام اور مضبوط و لچک دار رسدی زنجیروں کے بہترین طریقۂ کار کو اجاگر کرے گا۔ اینٹورپ عالمی ہیرا مرکز کا دورہ عالمی ہیرا قدر زنجیر، تصدیق، ذمہ دارانہ ذرائع سے حصول اور بھارت کے جواہرات و زیورات کے شعبے کے لیے دستیاب مواقع کو نمایاں کرے گا۔

وزیر موصوف تھیلس گروپ کے جناب الین کویورین اور سائلوکس گروپ کے جناب ژاں-کرسٹوف بوگارٹ کے ساتھ اعلیٰ انتظامی سطح کی ملاقاتیں بھی کریں گے۔ تھیلس فضائی و خلائی صنعت، دفاع، سائبر تحفظ اور رقمی شناخت کے شعبوں میں ایک عالمی رہنما ہے اور بھارت میں اس کی اہم شراکت داریاں قائم ہیں، جبکہ سائلوکس مخصوص کیمیائی مادّوں اور بازگردانی کے شعبے کا ایک گروپ ہے، جس کی گجرات میں بڑی سرگرمیاں ہیں اور جو بیٹریوں کی بازگردانی اور پائیدار مصنوعات سازی کے شعبوں میں اشتراک کر رہا ہے۔

بھارت-یورپی یونین تجارتی گول میز اجلاس اور تجارت و ٹیکنالوجی کونسل (ٹی ٹی سی) کا مکمل اجلاس براہِ راست غیر ملکی سرمایہ کاری کے مواقع، تجارت میں سہولت، پائیدار ٹیکنالوجیوں اور مضبوط و لچک دار رسدی زنجیروں پر توجہ مرکوز کرے گا۔

برسلز کے دورے کے دوران جناب گوئل وزیرِ خارجہ اور وزیر مملکت برائے الیکٹرانکس و اطلاعاتی ٹیکنالوجی کے ساتھ تیسرے بھارت-یورپی یونین تجارت و ٹیکنالوجی کونسل (ٹی ٹی سی) وزارتی اجلاس کی مشترکہ صدارت کریں گے۔ بھارت-یورپی یونین ٹی ٹی سی تجارت، قابلِ اعتماد ٹیکنالوجی اور اقتصادی تحفظ کے شعبوں میں تعاون کا اعلیٰ ترین ادارہ جاتی نظام ہے۔

ٹی ٹی سی اجلاس کے موقع پر وزیر موصوف کی یورپی یونین کے اعلیٰ رہنماؤں، جن میں یورپی کمیشن کے صدر، یورپی کونسل کے صدر اور بیلجیم کے وزیر اعظم شامل ہیں، کے ساتھ ملاقاتیں متوقع ہیں۔ وہ بیلجیم کے نائب وزیر اعظم اور وزیرِ روزگار، معیشت و زراعت عزت مآب جناب ڈیوڈ کلیرنوال اور یورپی کمشنر برائے تجارت و اقتصادی تحفظ عزت مآب جناب ماروش شیفچووچ کے ساتھ بھی دوطرفہ ملاقاتیں کریں گے۔ جناب گوئل بھارت-بیلجیم تجارتی گول میز اجلاس اور یورپ کی سرکردہ کمپنیوں کے ساتھ بات چیت کے ذریعے صنعتی رہنماؤں سے بھی تبادلۂ خیال کریں گے۔

16 اور 17 جولائی کو جناب گوئل فن لینڈ کے وزیر اعظم کی دعوت پر فن لینڈ کا دورہ کریں گے۔ اس دورے میں اختراع، جدید مصنوعات سازی، صاف توانائی، رقمی ٹیکنالوجی اور صنعتی تحقیق کے شعبوں میں تعاون کو مضبوط بنانے پر توجہ مرکوز کی جائے گی۔

وزیر موصوف فن لینڈ کے وزیرِ اقتصادی امور عزت مآب ڈاکٹر ساکاری پُوئستو کے ساتھ دوطرفہ ملاقات کریں گے اور رقمی تبدیلی، صاف توانائی، جدید مصنوعات سازی اور گردشی معیشت کے شعبوں میں سرگرم فن لینڈ کی کمپنیوں کے ساتھ بھارت-فن لینڈ تجارتی گول میز اجلاس میں شرکت کریں گے۔ ادارہ جاتی تعاون کو مضبوط بنانے کے لیے کنفیڈریشن آف انڈین انڈسٹری (سی آئی آئی) اور بزنس فن لینڈ کے درمیان ایک مفاہمتی یادداشت پر بھی دستخط کیے جائیں گے۔

جناب گوئل نوکیا کارپوریشن، وی ٹی ٹی ریسرچ سینٹر، کونے کارپوریشن اور کیمپی گروپ سمیت فن لینڈ کی سرکردہ کمپنیوں اور اختراعی اداروں کا دورہ کریں گے۔ ان دوروں کا مقصد مواصلاتی بنیادی ڈھانچے، چھٹی نسل کی مواصلاتی ٹیکنالوجی (6جی) کی تحقیق، ذہین نقل و حرکت، جدید مصنوعات سازی، صنعتی مشینری، برقی گاڑیوں کے چارجنگ بنیادی ڈھانچے، جدید ترین ٹیکنالوجیوں، پائیدار نقل و حرکت، صنعتی اختراع اور سرمایہ کاری کے شعبوں میں تعاون کے مواقع تلاش کرنا ہے۔

بھارتی تجارتی وفد میں بوروسل رینیوایبلز، مدرسن گروپ، ٹریویٹرون ہیلتھ کیئر، ہری کرشنا ایکسپورٹس اور نیکانتی سی فوڈز جیسی کمپنیاں شامل ہوں گی، جو مصنوعی ذہانت اور صاف ٹیکنالوجی سے لے کر جواہرات و زیورات، غذائی مصنوعات سازی، صحت نگہداشت اور ڈیزائن تک مختلف شعبوں کی نمائندگی کریں گی۔

اسپین، بیلجیم اور فن لینڈ کے اس پورے دورے میں جدید مصنوعات سازی، صاف توانائی اور پائیداری، رقمی اور جدید ترین ٹیکنالوجیوں، جواہرات و زیورات، نیز غذائی اور صارفین سے متعلق صنعتوں جیسے اہم موضوعات کو نمایاں کیا جائے گا۔

یہ دورہ بھارت-یورپی یونین تعلقات کے ایک اہم مرحلے پر ہو رہا ہے، جب دونوں فریق اقتصادی تعاون کو مضبوط بنانے اور بھارت-یورپی یونین آزاد تجارتی معاہدے کے جلد نفاذ کے لیے کام کرنے کے پابندِ عزم ہیں۔ اس تناظر میں جناب گوئل کا یہ دورہ اس مشترکہ تصور کو ٹھوس نتائج میں تبدیل کرنے کی جانب ایک اہم قدم ہے۔ یہ یورپی یونین، جو بھارت کے سب سے بڑے تجارتی شراکت داروں میں سے ایک ہے، کے ساتھ تعلقات کو مزید گہرا کرنے اور ایک پُرعزم، متوازن اور باہمی طور پر فائدہ مند معاہدے کو آگے بڑھانے کے بھارت کے پختہ عزم کی عکاسی کرتا ہے۔ ایسا معاہدہ مضبوط و لچک دار رسدی زنجیروں، پائیدار ترقی اور قواعد پر مبنی عالمی تجارتی نظام میں معاون ثابت ہوگا۔

توقع ہے کہ یہ دورہ تجارت اور سرمایہ کاری کو فروغ دے کر، ابھرتی ہوئی ٹیکنالوجیوں، صاف توانائی، اختراع اور جدید مصنوعات سازی کے شعبوں میں تعاون کو مضبوط بنا کر، کاروباری اداروں اور اختراعی نظاموں کے درمیان قریبی شراکت داری کو فروغ دے کر اور اختراع، مصنوعات سازی اور پائیداری کے شعبوں میں ایک قابلِ اعتماد عالمی شراکت دار کے طور پر بھارت کی حیثیت کو مزید مستحکم کر کے یورپ کے ساتھ بھارت کے تعلقات کو نئی رفتار فراہم کرے گا۔

*****

ش ح۔ ش ا ر۔ ول

Uno-9852­