ہنرمندی کی ترقی اور صنعتی افرادی قوت میں تبدیلی کے سفر کا ایک اہم سنگِ میل عبور کرتے ہوئے حکومتِ ہند کے وزیرِ مملکت (آزادانہ چارج) برائے ہنرمندی کی ترقی اور صنعت کاری اور وزیرِ مملکت برائے تعلیم، جناب جینت چودھری نے آج سورت کے صنعتی تربیتی ادارے (آئی ٹی آئی) کے دورے کے دوران وزیراعظم ہنرمندی اور روزگار کے لیے جدید صنعتی تربیتی اداروں کے ذریعے تبدیلی کے منصوبے (پی ایم-سیتو) کے تحت گجرات کے سورت آئی ٹی آئی کلسٹر کی منظوری کا اعلان کیا۔

یہ کلسٹر آرسیلر مِتل نیپون اسٹیل انڈیا (اے ایم/این ایس انڈیا) کی قیادت میں، جو اس منصوبے میں مرکزی صنعتی شراکت دار کا کردار ادا کرے گا اور اس کے تعلیمی شراکت دار ’’این ایم ٹیک‘‘ کے تعاون سے قائم کیا جائے گا۔ اس طرح یہ گجرات میں عمل درآمد کے لیے منظور کیے جانے والے پی ایم-سیتو کے اولین بڑے منصوبوں میں شامل ہو گیا ہے۔

اس موقع پر خطاب کرتے ہوئے حکومتِ ہند کے وزیرِ مملکت (آزادانہ چارج) برائے ہنرمندی کی ترقی اور صنعت کاری اور وزیرِ مملکت برائے تعلیم، جناب جینت چودھری نے کہا: ’’ہم ہندوستان میں ہنرمندی کی ترقی کے ایک نئے نمونے کو ابھرتے ہوئے دیکھ رہے ہیں، جہاں صنعت صرف روزگار فراہم کرنے والی نہیں بلکہ باصلاحیت افرادی قوت کی تیاری میں برابر کی شریک ہے۔ پی ایم-سیتو کے تحت سورت کلسٹر کی منظوری اس یقین کی عکاس ہے کہ آج کے تعلیمی اداروں کو کل کے روزگار کی ضروریات کے مطابق تشکیل دینا ہوگا۔ اس نوعیت کی شراکت داریوں کے ذریعے ہم ایسے اداروں کی بنیاد رکھ رہے ہیں جو عالمی معیار پر پورا اترتے ہوں اور آنے والی کئی دہائیوں تک ہندوستان کی صنعتی پیداوار اور اختراعی صلاحیتوں کو نئی قوت فراہم کریں۔‘‘

یہ منظوری پی ایم-سیتو کے اس تصور کو عملی جامہ پہنانے کی جانب ایک اہم پیش رفت ہے، جس کا مقصد ریاستی حکومتوں اور ممتاز صنعتی اداروں کے مضبوط اشتراک سے سرکاری صنعتی تربیتی اداروں کو صنعت کی ضروریات سے ہم آہنگ، مستقبل کے تقاضوں کے مطابق اور اعلیٰ معیار کے مراکز میں تبدیل کرنا ہے۔ یہ فیصلہ گجرات کی ریاستی اسٹیئرنگ کمیٹی کی جانب سے تجویز کے کامیاب تکنیکی جائزے اور منظوری کے بعد قومی سطح پر اس کی توثیق کیے جانے کے نتیجے میں کیا گیا۔

منظور شدہ ہب اور اسپوک ماڈل کے تحت سورت آئی ٹی آئی مرکزی ادارے (ہب) کے طور پر کام کرے گا، جبکہ اس کے ساتھ چار ذیلی ادارے (اسپوک) وابستہ ہوں گے، جن میں سورت خواتین آئی ٹی آئی، ہجیرا آئی ٹی آئی، باردولی آئی ٹی آئی اور سچن آئی ٹی آئی شامل ہیں۔ اس کلسٹر کو اس انداز میں تشکیل دیا گیا ہے کہ گجرات کی صنعتی ترقی کی رفتار اور جدید صنعتوں کی بدلتی ہوئی افرادی قوت کی ضروریات کے مطابق ایک جامع ہنرمندی کا نظام قائم کیا جا سکے، جس میں جدید صنعتی پیداوار، فولاد سازی، انجینئرنگ، عمل کاری کی صنعتیں، ٹیکسٹائل اور صنعت 4.0 کی جدید ٹیکنالوجیاں شامل ہیں۔

اے ایم/این ایس انڈیا، جو ہندوستان کی سب سے بڑی مربوط فولاد ساز کمپنیوں میں شمار ہوتی ہے، اس منصوبے میں اپنی وسیع عملی صلاحیت، صنعتی مہارت، ہنرمندی کی تربیت کی استعداد اور ادارہ جاتی شراکت داریوں کا بھرپور کردار ادا کرے گی۔ کمپنی اس وقت ہنرمندی کی ترقی کا ایک مضبوط نظام چلا رہی ہے، جس میں صنعت سے ہم آہنگ تعلیمی نظام، تربیتِ عملی (اپرنٹس شپ) سے منسلک تربیتی پروگرام، صنعت 4.0 سے متعلق اقدامات، ڈیجیٹل ہنرمندی کے پلیٹ فارم اور این اے ایم ٹیک سمیت ممتاز تعلیمی اور تربیتی اداروں کے ساتھ اشتراک شامل ہے۔

منظور شدہ اسٹریٹجک سرمایہ کاری منصوبے کے تحت سورت کلسٹر کے لیے پانچ برسوں میں تقریباً 240 کروڑ روپے کے بجٹ کی منظوری دی گئی ہے۔ اس منصوبے کے تحت بنیادی ڈھانچے کی جدید کاری، جدید تجربہ گاہوں اور عملی تربیت گاہوں کا قیام و ترقی، ڈیجیٹل تدریسی نظام، اسمارٹ جماعتیں، نصاب کی جدید کاری، اساتذہ کی پیشہ ورانہ استعداد میں اضافہ اور صنعت کی قیادت میں انتظامی نظام کو فروغ دینے پر خصوصی توجہ دی جائے گی۔

اس منصوبے کے تحت آئندہ پانچ برسوں میں تقریباً 25 ہزار تربیت یافتگان کو داخلہ دینے کا ہدف مقرر کیا گیا ہے، جبکہ جدید اور نئے متعارف کرائے جانے والے تربیتی پروگراموں کے ذریعے 3,528 اضافی تربیتی نشستیں بھی فراہم کی جائیں گی۔ اس کلسٹر کے تحت موجودہ تجارتی شعبوں کی جدید کاری کی جائے گی، ابھرتی ہوئی ٹیکنالوجیوں سے ہم آہنگ نئے طویل مدتی تربیتی پروگرام شروع کیے جائیں گے اور صنعت کی ضروریات کے مطابق قلیل مدتی تربیتی کورسز بھی متعارف کرائے جائیں گے تاکہ خطے کے نوجوانوں کے لیے روزگار حاصل کرنے کے امکانات اور تربیتِ عملی (اپرنٹس شپ) کے مواقع میں اضافہ کیا جا سکے۔

اس پیش رفت پر اظہارِ خیال کرتے ہوئے اے ایم/این ایس انڈیا اور اس کے تعلیمی شراکت دار این اے ایم ٹیک کے نمائندوں نے سورت کلسٹر کی منظوری کا خیرمقدم کیا اور اس عزم کا اعادہ کیا کہ کمپنی صنعت کی قیادت میں قائم ہونے والی شراکت داریوں کے ذریعے ملک میں ہنرمندی کی ترقی کے قومی پروگرام کو بھرپور تعاون فراہم کرتی رہے گی۔ اے ایم/این ایس انڈیا کے ایگزیکٹو ڈائریکٹر اور نائب چیف ٹیکنالوجی افسر جناب سنتوش منڈھاڈا نے کہا کہ یہ اقدام مستقبل کے تقاضوں سے ہم آہنگ باصلاحیت افرادی قوت کی تیاری، مقامی برادریوں کو مضبوط بنانے اور نوجوانوں کے لیے روزگار کے بہتر مواقع پیدا کرنے کے کمپنی کے وسیع تر ویژن سے ہم آہنگ ہے۔

سورت کلسٹر کی منظوری ملک بھر میں پی ایم-سیتو منصوبے پر عمل درآمد کی بڑھتی ہوئی رفتار کو مزید تقویت دیتی ہے اور اس حقیقت کی عکاسی کرتی ہے کہ ہنرمندی کے نظام کی تشکیل میں صنعت کا کردار مسلسل مضبوط ہو رہا ہے۔ توقع ہے کہ یہ منصوبہ حکومت کے تعاون، صنعت کی قیادت اور ادارہ جاتی عمدگی کو یکجا کرنے والے اشتراکی ہنرمندی ماڈل کی ایک بےجوڑ مثال ثابت ہوگا، جو تیزی سے بدلتی ہوئی معیشت کی افرادی قوت کی ضروریات پوری کرنے میں معاون ہوگا۔

پی ایم-سیتو کے بارے میں

پی ایم-سیتو حکومتِ ہند کی ایک نمایاں اسکیم ہے، جس کا مقصد صنعت کی قیادت میں ہب اور اسپوک ماڈل کے ذریعے سرکاری صنعتی تربیتی اداروں (آئی ٹی آئی) کو جدید خطوط پر استوار کرنا، بنیادی ڈھانچے کو جدید بنانا، صنعت کی مؤثر شمولیت کو فروغ دینا اور تربیت یافتہ افراد کے لیے روزگار کے بہتر مواقع پیدا کرنا ہے۔

60 ہزار کروڑ روپے کی مجموعی مالی گنجائش رکھنے والی اس اسکیم کا مقصد مستقبل کے تقاضوں سے ہم آہنگ ہنرمندی کی ترقی کا ایسا مضبوط نظام قائم کرنا ہے جو ہندوستان کی ترقیاتی امنگوں کو تقویت دے سکے۔ اس کے تحت ایک ہزار سرکاری صنعتی تربیتی اداروں (آئی ٹی آئی) کو جدید بنایا جائے گا اور قومی مراکزِ امتیاز (این سی او ای) کے پانچ مراکز قائم کیے جائیں گے۔

*****

ش ح۔ ش ا ر۔ ول

Uno-9804­

(रिलीज़ आईडी: 2283462) आगंतुक पटल : 13