بھارت کے مقامی طور پر تیار کردہ خودکار ٹرین تحفظ نظام (اے ٹی پی) کَوچ کے دائرۂ کار کو مزید وسعت دینے کی سمت ایک اور اہم قدم اٹھاتے ہوئے، بھارتی ریلوے نے شمالی ریلوے کے دہلی ڈویژن میں ریواڑی–دہلی اور شکور بستی–بھٹنڈہ سیکشنز سمیت متعلقہ برانچ لائنوں کے مجموعی طور پر 680 روٹ کلومیٹر پر کَوچ ورژن 4.0 نصب کرنے کی منظوری دے دی ہے۔ اس منصوبے پر 206 کروڑ روپے لاگت آئے گی۔

یہ منصوبہ بھارتی ریلوے کی جانب سے ملک بھر میں کَوچ نظام کے مرحلہ وار نفاذ کی جاری مہم کا حصہ ہے، جس کا مقصد زیادہ مصروف اور اسٹریٹجک اہمیت کے حامل ریلوے راستوں پر اس مقامی تحفظ نظام کو وسعت دینا ہے۔

کَوچ بھارت میں تیار کردہ خودکار ٹرین تحفظ نظام (اے ٹی پی) ہے، جسے ریلوے کی سلامتی میں نمایاں بہتری لانے کے لیے تیار کیا گیا ہے۔ یہ نظام  لال سگنل عبور کرنے (ایس پی اے ڈی) کے واقعات اور ٹرینوں کے تصادم کی روک تھام میں مدد دیتا ہے۔ یہ مسلسل ٹرینوں کی نقل و حرکت پر نظر رکھتا ہے، ضرورت پڑنے پر خودکار طور پر بریک لگا دیتا ہے، ٹرینوں کو مقررہ زیادہ سے زیادہ محفوظ رفتار پر چلانے میں معاونت کرتا ہے، اور گھنی دھند جیسے ناموافق موسمی حالات میں بھی ٹرینوں کے محفوظ اور قابلِ اعتماد آپریشن کو یقینی بناتا ہے۔

بھارتی ریلوے کے ان اہم راستوں پر کَوچ ورژن 4.0 کی تنصیب سے ریلوے کی سلامتی مزید مضبوط ہوگی، آپریشنل کارکردگی بہتر ہوگی، ٹرینوں کی آمدورفت کا نظام زیادہ قابلِ اعتماد بنے گا اور مسافر و مال بردار ٹرین خدمات کی تیز رفتار اور ٹیکنالوجی سے تقویت یافتہ نقل و حرکت کو فروغ ملے گا۔

*********

(ش ح۔ش ت۔م ذ)

U.R .9795