U Myntri Sorkar Pdeng ba dei khmih ia ki tnat Kam Pohiing bad Kam Iatreilang, Amit Shah u la ai jingkren mynta ka sngi ha ka jingialang Land Border Districts’ Superintendents of Police Conference-2026 ha New Delhi. Ki Myntri Khynnah ka tnat Kam Poh Iing Nityanand Rai bad Bandi Sanjay Kumar, u Secretary ka tnat Kam Pohiing, u Director jong ka Intelligence Bureau (IB), ki Director General of Police jong ki jylla khappud, bad kiwei kiwei ki ophisar ki la iadon lang ha kane ka jingialang.

Ha kane ka jingialang, u Myntri ka tnat Kam Pohiing u la ong ba kane ka jingialang ka la pynskhem ia ka rukom treikam kaba pura ha kaba iadei bad ka jingshngain jong ki jaka khappud. U la ong ruh ba ha ki por ban wan, kan don ka jingiatrei lang na ka bynta ka jingshngain jong ki jaka khappud. U la ong ruh ba ha kane ka jingialang kan don ia ki jingiakren shaphang ki jingeh kiba iadei bad ka jingshngain ha ki jaka khappud, ka jingpynbeit ia kine, bad ka jingwanrah ia ki polisi na ka bynta kane.

U Amit Shah u la ong ba ki kam jong ka India kiba iadei bad ki jaka khappud, kiba don nongrim ha ka Smart Border, kin long kiba hakhmat tam ha ka pyrthei ha ki por ban wan. U la ong ruh ba ka Sorkar Modi, ha ryngkat ki kynhun kiba iada ia ki jaka khappud, ki bor pyniaid ia ki jylla bad ki distrik, kito kiba iadon bynta na ka Sorkar India, bad ki nongshongshnong  - lyngba ka jingiatreilang – ki dang pynbiang ia ka rynsan na ka bynta ka jingshngain. U Shah u la ong ba ki jaka khappud kiba shngain, kiba riewspah, bad ka imlang sahlang kaba peitngor ki lah ban wanrah jingshngain ha ka ri.

U Myntri ka tnat Kam Pohiing u la ong ba hapoh ka jingialam jong u Myntri Rangbahduh Narendra Modi, ka ri ka la lait na ki kam Naxal bad ki kam lehnoh ha Jammu & Kashmir bad ka thain shatei lammihngi, kaba long ka dak jong ka jingjop jong ngi baroh. U la bynrap ba ha ki lai snem ban wan, ngin leh tyngeh pyrshah ia ki kam drok bad ngin ioh ia ka jingjop ha kane ka kam. U la ong ba ngi dang pynbiang ia ka kam kaba khlain ban pyllait ia ka ri na ka jingwan rung tuh ki briew bad ban pynthikna ba ym don kano kano ka jingwan rung tuh ki briew. U Shah u la ong ba mynshuwa, ki jingeh ki long kiba shyrta bad ki jingpynbeit ki long kiba shipor, ha ka Sorkar Modi, ngi dang pynbeit ia ki jingeh naduh tynrai bad ngi dang pynthikna ba ki jingpynbeit ki long kiba shirta.

U Amit Shah u la ong ba ka Sorkar Modi ka la kyntiew ia ka jingbei tyngka ha ki jaka khappud da 400 percent bad ka la pyndonkam ia ka jingstad saian ban pynkhlain ia ka jingshngain ha ki jaka khappud. U la ong ba hapoh ka Vibrant Villages Programme, u Myntri Rangbahduh u la ong ba ka shnong kaba khatduh jong ka ri ka dei ka shnong kaba nyngkong, hapoh kane ka sienjam ngi dang pyrshang ban iada na ka jingphet shnong, ban pynmih ia ki kam bad pynthikna ia ka jingpyntreikam pura ia ki skhim sorkar na ka bynta ka bha ka miat. U Amit Shah u la ong ba u Myntri Rangbahduh Narendra Modi u la sdang ia ka Demography Mission ban peit ia ka jingkylla ha ka jingdon ki briew, wad ia ki bynta ki bym iahap, bad ai jingmut ban iada na kum kine ki jingkylla ha ki por ban wan. U la ong ba ka Sorkar Modi ka kut jingmut ban tehlakam ia ka jingkylla bym iahap ha ka jingdon ki briew kaba wan na ki daw ki bym iahap. U Myntri ka tnat Kam Poh Iing u la ong ba ka daw kaba kongsan jong ka jingkylla ha ka jingdon ki briew ha ki jaka khappud ka dei ka jingrung tuh ki briew na shiliang pud.

U Myntri ka tnat Kam Pohiing u la ong ba khnang ban pynskhem shisha ia ka jingshngain ha ki jaka khappud, ka Sorkar Modi ka la pynbiang ia ka rynsan jong ka jingshngain kaba pynkylla ia ka rukom treikam jong ka India. U la ong ba ka Sorkar Modi ka dang kylla na ka rukom treikam jong ki jaka pahara ia ki jaka khappud kiba sah marwei sha ka rynsan kaba iasohlang ha ki kam kiba iadei bad ka jingshngain. U Myntri Sorkar Pdeng u la ban jur ba dei ban ioh ka jingtip shaphang ka jingkylla ha ka jingdon ki briew kaba wan na ki daw ki bym iahap ha ki jaka khappud naduh ki shnong haduh ki kyrdan kiba halor tam.

U Amit Shah u la ong ba ka Sorkar Modi ka dang ker ia ka jaka khappud kaba 1,610-km hapdeng ka India bad Myanmar ha ka jinglut kaba T 31,000 klur. U la ong ba ka thong jong ka Sorkar kadei ban iada na ki jinghiar thma sop sop, ka jingrung tuh, ka jingialam bakla ia ki briew, ka jingdie ia ki drok, ka jingdie tuh ia ki mar, ki jingma kiba wan na ki drone, ki kam beain lyngba ki lad cyber, ki kam beain kiba la pynskhem bha bad ki jingkylla ha ka jingdon ki briew; ban pynthikna ba ngi don ki jaka khappud kiba kham suk ka jingim; iada na ka jingphet shnong na kine ki jaka; bad pynthikna ia ka jingshngain jong ki.

****