داخلہ اور امداد باہمی کے مرکزی وزیر  جناب امت شاہ، نے آج نئی دہلی میں لینڈ بارڈر ڈسٹرکٹس سپرنٹنڈنٹس آف پولیس کانفرنس–2026 سے خطاب کیا۔اس موقع پر داخلی امور کے مرکزی وزیرِ مملکت  جناب نتیانند رائے اور مرکزی داخلہ سیکریٹری جناب بندی سنجے کمار،  انٹیلی جنس بیورو (آئی بی) کے ڈائریکٹر، سرحدی ریاستوں کے ڈائریکٹر جنرلز آف پولیس (ڈی جی پیز) اور متعدد سینئر حکام بھی موجود تھے۔

اس موقع پر داخلہ اور امداد باہمی کے مرکزی وزیر  جناب امت شاہ نے کہا کہ اس کانفرنس نے سرحدی سلامتی کے حوالے سے جامع حکمتِ عملی کو ایک باقاعدہ ادارہ جاتی شکل دی ہے۔انہوں نے کہا کہ آنے والے وقت میں ساحلی سرحدوں کی سلامتی کو یقینی بنانے کے لیے بھی اسی طرح جامع انداز میں آگے بڑھا جائے گا۔انہوں نے مزید کہا کہ اس کانفرنس میں سرحدی سلامتی سے متعلق مسائل پر غور، ان کے حل سے متعلق  خدشات کا جائزہ اور اس سلسلے میں مناسب پالیسی اقدامات مرتب کرنے پر توجہ دی جائے گی۔

جناب امت شاہ نے کہا کہ اسمارٹ بارڈر کے وژن کی بنیاد پر قائم بھارت کا سرحدی سلامتی کا نظام آئندہ برسوں میں دنیا کا جدید ترین نظام بن جائے گا۔ انہوں نے کہا کہ مودی حکومت، سرحدی حفاظتی دستوں، ریاستی اور ضلعی انتظامیہ، حکومتِ ہند کے متعلقہ اداروں اور مقامی شہریوں کے باہمی اشتراک سے ایک مضبوط چار رُخی حفاظتی نظام تشکیل دے رہی ہے۔ جناب شاہ نے زور دے کر کہا کہ محفوظ سرحد، خوشحال سرحدی علاقہ اور باخبر معاشرہ مل کر ہی ملک کو مکمل طور پر محفوظ بنا سکتے ہیں۔

مرکزی  وزیرِ داخلہ نے کہا کہ وزیرِ اعظم جناب نریندر مودی کی قیادت میں ملک کو نکسل ازم، جموں و کشمیر میں دہشت گردی اور شمال مشرق میں دہشت گردی سے نجات ملی ہے، جو ہماری اجتماعی کامیابی کی علامت ہے۔ انہوں نے کہا کہ آئندہ تین برسوں میں منشیات کے ناسور کو بھی سخت نقصان پہنچا کر اس پر مکمل قابو پالیا جائے گا۔ انہوں نے مزید کہا کہ ملک کو دراندازی سے مکمل طور پر پاک بنانے اور دراندازی کو ہر صورت روکنے کے لیے ایک مضبوط نظام تشکیل دیا جا رہا ہے۔ جناب شاہ نے کہا کہ ماضی میں مسائل مستقل ہوتے تھے جبکہ ان کے حل عارضی ہوتے تھے، لیکن مودی حکومت مسائل کی جڑ پر ضرب لگا کر ان کے مستقل حل کو یقینی بنا رہی ہے۔

جناب امت شاہ نے کہا کہ مودی حکومت نے سرحدی بنیادی ڈھانچے پر سرمایہ کاری میں 400 فیصد اضافہ کیا ہے اور سرحدی سلامتی کو مضبوط بنانے کے لیے سائنسی طرزِ عمل اختیار کیا ہے۔ انہوں نے کہا کہ وائبرنٹ ولیجز پروگرام کے تحت وزیرِ اعظم جناب نریندر مودی نے ملک کے آخری گاؤں کو ‘‘پہلا گاؤں’’ قرار دیا ہے۔ اس پروگرام کے تحت نقل مکانی کی روک تھام، روزگار کے مواقع پیدا کرنے اور حکومتی فلاحی منصوبوں پر سو فیصد عمل درآمد کو یقینی بنانے کی کوششیں کی جا رہی ہیں۔جناب شاہ نے کہا کہ وزیرِ اعظم نریندر مودی نے آبادی میں تبدیلیوں کا مطالعہ کرنے، آبادی میں غیر معمولی اضافے کے اسباب کی نشاندہی کرنے اور مستقبل میں ایسی تبدیلیوں کی روک تھام کے لیے سفارشات مرتب کرنے کے مقصد سے ڈیموگرافی مشن کا آغاز کیا ہے۔ انہوں نے کہا کہ مودی حکومت غیر فطری عوامل کے باعث ہونے والے غیر معمولی آبادیاتی اضافے کو سخت اقدامات کے ذریعے روکنے کے لیے پُرعزم ہے۔ وزیرِ داخلہ نے کہا کہ سرحدی علاقوں میں آبادیاتی تبدیلیوں کی بنیادی وجہ غیر قانونی دراندازی ہے۔

وزیرِ داخلہ نے کہا کہ سرحدی سلامتی کو ناقابلِ تسخیر بنانے کے لیے مودی حکومت نے ایک مضبوط چار رُخی حفاظتی نظام قائم کیا ہے، جس کے ذریعے بھارت کی سرحدی حکمتِ عملی کو ردِعمل پر مبنی طرزِ عمل سے تبدیل کرکے پیشگی اور فعال حکمتِ عملی میں ڈھالا جا رہا ہے۔ انہوں نے کہا کہ مودی حکومت سرحدی چوکیوں کے الگ تھلگ نظام سے آگے بڑھتے ہوئے ایک مربوط اور جامع حفاظتی گرڈ تشکیل دے رہی ہے۔ جناب امت شاہ  نے اس بات پر بھی زور دیا کہ سرحدی علاقوں میں غیر معمولی عوامل کے باعث ہونے والی آبادیاتی تبدیلیوں سے متعلق معلومات کو نچلی سطح سے لے کر اعلیٰ ترین سطح تک بروقت پہنچانا نہایت ضروری ہے۔

جناب امت شاہ نے کہا کہ مودی حکومت 31,000 کروڑ روپے کی لاگت سے بھارت–میانمار کی 1,610 کلومیٹر طویل سرحد پر باڑ لگا رہی ہے۔ انہوں نے کہا کہ حکومت کے مقاصد میں پراکسی جنگ، غیر قانونی دراندازی، انتہا پسندی کے پھیلاؤ، منشیات کی اسمگلنگ، غیر قانونی تجارت، ڈرون سے متعلق خطرات، سائبر جرائم، منظم جرائم اور آبادیاتی تبدیلیوں کی روک تھام شامل ہے۔ اس کے ساتھ ساتھ سرحدی علاقوں کو زیادہ قابلِ رہائش بنانا، وہاں سے نقل مکانی کو روکنا اور ان علاقوں کی سلامتی کو یقینی بنانا بھی حکومت کی ترجیحات میں شامل ہے۔

********

ش ح۔ع ح۔م ش

Uno.9783