ભારતના બ્રિક્સ (BRICS) અધ્યક્ષપદ 2026 હેઠળ આજે નાગપુર ખાતે ત્રીજી બ્રિક્સ ટ્રાન્સપોર્ટ વર્કિંગ ગ્રુપ (TWG) ની બેઠક શરૂ થઈ છે, જેમાં બ્રિક્સ સભ્ય દેશોના વરિષ્ઠ અધિકારીઓ ટકાઉ, સ્થિતિસ્થાપક અને ભવિષ્ય માટે સજ્જ પરિવહન પ્રણાલીઓ પર સહયોગ વધારવા માટે એકત્રિત થયા છે.

આગામી બે દિવસ દરમિયાન, પ્રતિનિધિઓ ઉભરતા વૈશ્વિક પરિવહન પડકારોને પહોંચી વળવા માટે સંસ્થાકીય સહયોગને મજબૂત કરવાની સાથે સાથે ટકાઉ પરિવહન ઇન્ફ્રાસ્ટ્રક્ચર, સ્વચ્છ ગતિશીલતા (ક્લીન મોબિલિટી), લોજિસ્ટિક્સ સ્થિતિસ્થાપકતા અને મલ્ટિમોડલ કનેક્ટિવિટીને આવરી લેતી મુખ્ય નીતિગત પ્રાથમિકતાઓ પર ચર્ચા-વિચારણા કરશે.

પ્રતિનિધિઓનું સ્વાગત કરતા, માર્ગ પરિવહન અને રાજમાર્ગ મંત્રાલયના સચિવ શ્રી વી. ઉમાશંકરે 'વસુધૈવ કુટુંબકમ' — સમગ્ર વિશ્વ એક પરિવાર છે — ના શાશ્વત સિદ્ધાંત દ્વારા માર્ગદર્શિત સહયોગી અને સમાવેશી વિકાસ માટે ભારતની પ્રતિબદ્ધતાનો પુનરોચ્ચાર કર્યો હતો.

તેમણે જણાવ્યું હતું કે ભારતની બ્રિક્સ અધ્યક્ષતાની થીમ, "સ્થિતિસ્થાપકતા, ઇનોવેશન, સહયોગ અને ટકાઉપણું માટે નિર્માણ" એક માનવ-કેન્દ્રીય વિઝનને મૂર્ત સ્વરૂપ આપે છે જે કાર્યક્ષમ, ટકાઉ અને સ્થિતિસ્થાપક પરિવહન ઇકોસિસ્ટમ બનાવવા માટે વ્યવહારુ ભાગીદારી ઈચ્છે છે.

ભારતના અધ્યક્ષપદની પ્રાથમિકતાઓ પર પ્રકાશ પાડતા સચિવે જણાવ્યું હતું કે પરિવહન એજન્ડાને છ ફ્લેગશિપ પહેલોની આસપાસ તૈયાર કરવામાં આવ્યો છે, જે ઇન્ફ્રાસ્ટ્રક્ચરમાં ટકાઉપણું, ટકાઉ એવિએશન ફ્યુઅલ (SAF), પરિવહન ડીકાર્બોનાઇઝેશન, શહેરી ગતિશીલતા (અર્બન મોબિલિટી), સ્થિતિસ્થાપક લોજિસ્ટિક્સ અને રેલવે સંશોધન સહયોગ પર ધ્યાન કેન્દ્રિત કરે છે. આ પહેલોનો ઉદ્દેશ્ય જ્ઞાનની વહેંચણીને ઊંડી બનાવવાનો, તકનીકી સહયોગને પ્રોત્સાહિત કરવાનો, સંસ્થાકીય ભાગીદારીને મજબૂત કરવાનો અને બ્રિક્સ સભ્ય દેશોમાં ક્ષમતા નિર્માણને ટેકો આપવાનો છે.

તેમણે અવલોકન કર્યું હતું કે સૂચિત પહેલો અગાઉની બ્રિક્સ ટ્રાન્સપોર્ટ વર્કિંગ ગ્રુપની બેઠકો દરમિયાન પ્રાપ્ત થયેલી પ્રગતિ પર આધારિત છે, જ્યારે આ ક્ષેત્રમાં લાંબા ગાળાના સહયોગ માટે વધુ મજબૂત પાયો નાખે છે. સામૂહિક રીતે, તેઓ પરિવહન પ્રણાલીઓ વિકસાવવા માટે બ્રિક્સ રાષ્ટ્રોની સહિયારી પ્રતિબદ્ધતાને પ્રતિબિંબિત કરે છે જે નવીન, પર્યાવરણ પ્રત્યે જવાબદાર અને લોકોની આકાંક્ષાઓને અનુરૂપ હોય.

શ્રી વી. ઉમાશંકરે નોંધ્યું હતું કે નાગપુરની આ બેઠક પાંચ વર્ચ્યુઅલ પ્રારંભિક બેઠકો સહિતની એક વ્યાપક પરામર્શ પ્રક્રિયાની પરાકાષ્ઠા સમાન છે, જે દરમિયાન સભ્ય દેશોએ ભારતના અધ્યક્ષપદ હેઠળ ઓળખવામાં આવેલા પ્રાથમિકતા ધરાવતા વિષયો પર વિગતવાર ચર્ચા કરી હતી. તમામ પ્રતિનિધિમંડળોની રચનાત્મક ભાગીદારીની પ્રશંસા કરતા, તેમણે વિશ્વાસ વ્યક્ત કર્યો હતો કે સહયોગની આ જ ભાવના ચર્ચા-વિચારણાનું માર્ગદર્શન કરશે અને મુખ્ય પરિણામો પર વ્યાપક સર્વસંમતિ સાધવામાં મદદ કરશે.

અધ્યક્ષ તરીકે ભારતની ભૂમિકાનો પુનરોચ્ચાર કરતા, તેમણે સહભાગી પ્રતિનિધિમંડળોને આશ્વાસન આપ્યું હતું કે ચર્ચાઓ પારદર્શક, સમાવેશી અને સર્વસંમતિ આધારિત રહેશે, જેથી પરિણામો તમામ બ્રિક્સ સભ્યોની સામૂહિક પ્રાથમિકતાઓ અને વિકાસના પરિપ્રેક્ષ્યને પ્રતિબિંબિત કરે.

તેમણે વિસ્તૃત બ્રિક્સ જૂથના વધતા મહત્વ પર પણ ભાર મૂક્યો હતો અને નોંધ્યું હતું કે તેના સભ્ય દેશો મળીને વિશ્વની 49.5 ટકા વસ્તી, વૈશ્વિક જીડીપીના 40 ટકા અને વૈશ્વિક વેપારના 26 ટકા હિસ્સો ધરાવે છે. આ સંદર્ભમાં, તેમણે કહ્યું કે પરિવહનમાં ઉન્નત સહયોગ કનેક્ટિવિટી મજબૂત કરવા, સપ્લાય-ચેઈન સ્થિતિસ્થાપકતા સુધારવા અને ટકાઉ આર્થિક વિકાસમાં અર્થપૂર્ણ યોગદાન આપવાની ક્ષમતા ધરાવે છે.

સચિવે વિશ્વાસ વ્યક્ત કર્યો હતો કે આગામી બે દિવસની ચર્ચા-વિચારણા બ્રિક્સ દેશો વચ્ચે ભાગીદારી અને પરસ્પર શિક્ષણની ભાવનાને મજબૂત કરશે અને આગામી મંત્રી સ્તરની બેઠકમાં નક્કર પરિણામો માટે માર્ગ મોકળો કરશે.

વર્કિંગ ગ્રુપની બેઠક બાદ, 11 જુલાઈ 2026ના રોજ નાગપુરમાં ત્રીજી બ્રિક્સ પરિવહન મંત્રીઓની બેઠક યોજાવાની છે.

SM/BS/JD