மேம்படுத்தப்பட்ட தகவல் தொழில்நுட்பக் கல்வி நிறுவனங்கள் மூலம் திறன் மற்றும் வேலைவாய்ப்பு மாற்றத்திற்கான பிஎம்- சேது திட்டத்தின் 4-வது தேசிய வழிகாட்டுதல் குழுக் கூட்டம்,  திறன் மேம்பாடு, தொழில்முனைவு அமைச்சகத்தின் செயலாளர் தேபஸ்ரீ முகர்ஜி தலைமையில் இன்று (07.07.2026) நடைபெற்றது.

இக்கூட்டத்தில், பயிற்சிக்கான தலைமை இயக்குநரகத் தலைமை இயக்குநர் திரு திலீப் குமார், இணைச் செயலாளர் திருமதி மானசி சஹாய் தாக்கூர் ஆகியோருடன், மாநில அரசுகளின் மூத்த பிரதிநிதிகள், பலதரப்பு வளர்ச்சி கூட்டாளிகள், தொழில்துறை தலைவர்கள், பிற முக்கிய பங்குதாரர்களும் கலந்துகொண்டனர்.

பிஎம்-சேது திட்டத்தை அதன் முன்னோட்டக் கட்டத்திலிருந்து, அடையாளம் காணப்பட்ட 200 ஐடிஐ  தொகுப்புகளிலும்  நாடு தழுவிய அளவில் செயல்படுத்துவதற்கு இக்குழு ஒப்புதல் அளித்துள்ளது. இதன்மூலம், மாநிலங்களும் யூனியன் பிரதேசங்களும் தங்களின் தொழில்துறை தயார்நிலை, செயல்படுத்தும் திறன் அடிப்படையில் இத்திட்டத்தை நடைமுறைப்படுத்த இயலும். இத்திட்டத்தை எளிமையாக்குவதற்கும், தொழில்துறைப் பங்கேற்பை மேம்படுத்துவதற்கும், பொதுத்துறை நிறுவனங்களின் அதிக ஈடுபாட்டை ஊக்குவிப்பதற்கும், பிஎம்-சேது திட்ட அமலாக்கத்தை ஆதரிக்கும் நிறுவனச் சூழலமைப்பை விரிவுபடுத்துவதற்குமான நடவடிக்கைகளுக்கும் இக்குழு ஒப்புதல் அளித்துள்ளது.

இக்கூட்டத்தின் மிக முக்கிய விளைவாக, ரூ.1,237.58 கோடி ஒருங்கிணைந்த ஒதுக்கீட்டிலான உத்திசார் முதலீட்டுத் திட்டங்களுக்கு  ஒப்புதல் அளிக்கப்பட்டது. இதில், ஒடிசாவின் ஜிண்டால் நவீன் அவ்சர் லிமிடெட், குஜராத்தின் ஆர்செலர் மிட்டல் நிப்பான் ஸ்டீல் இந்தியா ஆகிய முன்னணி தொழில் நிறுவனங்கள், தெலங்கானாவில் உள்ள அப்பல்லோ மெட்ஸ்கில்ஸ் மற்றும் ஒப்புதல் அளிக்கப்பட்ட மற்ற இரண்டு ஐடிஐ தொகுப்புகளுடன் இணைந்து முக்கிய தொழில் கூட்டாளிகளாக இணைந்துள்ளன. அந்தந்த மாநில வழிகாட்டுதல் குழுக்களால் பரிந்துரைக்கப்பட்ட இந்த உத்திசார் முதலீட்டுத் திட்டங்கள், நாடு தழுவிய அளவில் பல ஐடிஐ தொகுப்புகளுக்கு தொழில் துறை தலைமையிலான மேம்பாட்டிற்கு வழிவகுக்கின்றன.

மேலும் விவரங்களுக்கு இந்த ஆங்கிலச் செய்திக்குறிப்பைக் காணவும்:https://www.pib.gov.in/PressReleasePage.aspx?PRID=2281937&reg=3&lang=1

***

SS/SMB/SH