રાષ્ટ્રીય માનવ અધિકાર આયોગ, ભારત દ્વારા એક મીડિયા અહેવાલ પર સુઓ મોટો (સ્વતઃ) સંજ્ઞાન લેવામાં આવ્યું છે, જે દર્શાવે છે કે હરિયાણાના હિસાર અને રોહતકમાં હોસ્પિટલોમાં આશરે 24 કલાક સુધી વેન્ટિલેટર સપોર્ટ ન મળી શકવાને કારણે એક નવજાત શિશુનું મૃત્યુ થયું છે. અહેવાલો અનુસાર, નવજાત શિશુના પિતાએ તેમના બાળક માટે વેન્ટિલેટર સપોર્ટ મેળવવા માટે ભારે સંઘર્ષ કરવો પડ્યો હતો અને તેઓ હિસાર તથા રોહતક જિલ્લાની એક હોસ્પિટલથી બીજી હોસ્પિટલમાં ભટકતા રહ્યા હતા, પરંતુ તેઓ સફળ થયા નહોતા, જેના પરિણામે શિશુનું મૃત્યુ થયું હતું.

આયોગે અવલોકન કર્યું છે કે સમાચાર અહેવાલોની વિગતો જો સાચી હોય, તો તે માનવ અધિકારોના ઉલ્લંઘનનો ગંભીર મુદ્દો ઉભો કરે છે. તેથી, આયોગ દ્વારા હરિયાણા સરકારના મુખ્ય સચિવને નોટિસ પાઠવીને આ બાબતમાં બે અઠવાડિયાની અંદર વિગતવાર અહેવાલ સબમિટ કરવા માટે જણાવવામાં આવ્યું છે.

3 જુલાઈ 2026 ના રોજ પ્રકાશિત થયેલા મીડિયા અહેવાલ અનુસાર, આ શિશુનો જન્મ 1 જુલાઈ 2026 ના રોજ હિસારની સિવિલ હોસ્પિટલમાં સિઝેરિયન સેક્શન (ઓપરેશન) દ્વારા થયો હતો અને તેને તાત્કાલિક વેન્ટિલેટર સપોર્ટની જરૂર હતી. જ્યારે તેની માતા સિવિલ હોસ્પિટલમાં જ દાખલ હતી, ત્યારે ડોક્ટરોએ શરૂઆતમાં નવજાત શિશુને હિસાર જિલ્લાના અગ્રોહા ખાતેની મેડિકલ કોલેજમાં રીફર કર્યું હતું. જો કે, સિવિલ હોસ્પિટલે કથિત રીતે પુષ્ટિ કરી કે અગ્રોહા ખાતે પણ કોઈ વેન્ટિલેટર ઉપલબ્ધ નથી, ત્યારબાદ બાળકને રોહતક સ્થિત પીજીઆઇએમએસમાં રીફર કરવામાં આવ્યું હતું. PGIMS ખાતે પણ વેન્ટિલેટર મેળવવામાં અસમર્થ રહેતા, બાળકને પાછું હિસાર લાવવામાં આવ્યું અને એક ખાનગી હોસ્પિટલમાં લઈ જવામાં આવ્યું, જ્યાં તેને મૃત જાહેર કરવામાં આવ્યું હતું.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com