امور نوجوانان و کھیل کو کے مرکزی وزیر جناب ڈاکٹر منسکھ مانڈویہ نے آج نئی دہلی کے جواہر لال نہرو اسٹیڈیم سے ملک گیر ’’فٹ انڈیا سنڈیز آن سائیکل‘‘ کے 80ویں ایڈیشن کی قیادت کی۔

یہ ایڈیشن جناب ستیہ سائی سیوا آرگنائزیشنز کے اشتراک سے منعقد کیا گیا، جس کا مقصد روحانی پیشوا شری ستیہ سائی کی پیدائش کے سو سال مکمل ہونے کی تقریبات منانا تھا۔

قومی دارالحکومت نئی دہلی میں 9 ہزار سے زائد افراد نے اجتماعی دوڑ اور سائیکل ریلی میں حصہ لیا، جبکہ زُمبا اور یوگا کے خصوصی سیشن بھی منعقد کیے گئے۔ ملک کے دیگر مقامات پر یہ سائیکل مہم آرٹ آف لیونگ، ہارٹ فلنیس اور ایشا فاؤنڈیشن کے تعاون سے منعقد کی گئی۔

بچوں کی دلچسپی اور سرگرم شرکت کو فروغ دینے کے لیے ایک خصوصی گیم زون بھی قائم کیا گیا، جہاں بڑے سائز کی شطرنج اور لُڈو کے علاوہ کیرم، ٹیبل ٹینس، فُٹسال اور بیڈمنٹن جیسی کھیلوں کی سہولیات فراہم کی گئیں۔

وزیرِ اعظم جناب نریندر مودی کے وکست بھارت 2047 کے ویژن کو دہراتے ہوئے ڈاکٹر منسکھ مانڈویہ نے کہا: ’’کسی بھی ملک کے ترقی یافتہ ممالک کی صف میں شامل ہونے کے لیے اس کے شہریوں کی صحت بنیادی اہمیت رکھتی ہے۔ میں تمام بھارتیوں سے اپیل کرتا ہوں کہ وہ روزانہ کم از کم ایک گھنٹہ موبائل اسکرین سے دور رہیں اور اس وقت کو کھیل کود اور جسمانی سرگرمیوں کے ذریعے اپنی صحت کے لیے وقف کریں۔‘‘

اجتماع سے خطاب کرتے ہوئے مرکزی وزیر ڈاکٹر منسکھ مانڈویہ نے مزید کہا: ’’بھارت میں ہر چار میں سے ایک شخص زائد وزن کا شکار ہے، اس لیے ہر شہری کے لیے جسمانی تندرستی ناگزیر ہے۔‘‘

اجتماعی فٹنس سائیکل ریلی کا آغاز ویدک منتر پڑھنے اور چراغ روشن کرنے کی تقریب سے ہوا، جس میں ڈاکٹر منسکھ مانڈویہ کے ساتھ شری ستیہ سائی سیوا آرگنائزیشن کے کل ہند صدر نمیش گلاب رائے پانڈیا، سکریٹری (کھیل) جناب ہری رنجن راؤ، سکریٹری (کارپوریٹ امور) دیپتی مکھرجی اور دیگر معزز شخصیات نے شرکت کی۔ اس کے بعد سائیکل ریلی کے آغاز سے قبل حاضرین نے نشہ مکت بھارت کا عوامی عہد بھی دہرایا۔

اس موقع پر خطاب کرتے ہوئے نمیش گلاب رائے پانڈیا نے کہا: ’’فٹ انڈیا کا مقصد ہر بھارتی شہری کو صحت مند اور جسمانی طور پر تندرست بنانا ہے، جبکہ جناب ستیہ سائی سیوا آرگنائزیشن کا نصب العین ’سب سے محبت کرو، سب کی خدمت کرو‘ ہے۔ ان دونوں اداروں کا یہ اشتراک ایک بہترین امتزاج کی مثال ہے۔‘‘ معروف اداکار نصیر عبداللہ نے بھی تقریب میں شرکت کی اور اس پہل کو سراہا۔

ڈاکٹر منسکھ مانڈویہ کی جانب سے دسمبر 2024 میں شروع کی گئی ’’فٹ انڈیا سنڈیز آن سائیکل‘‘ مہم اب ایک عوامی تحریک کی صورت اختیار کر چکی ہے، جو ہر عمر کے شہریوں کو ’’فٹنس کی ڈوز، آدھا گھنٹہ روز‘‘ کے پیغام کے تحت روزانہ کم از کم تیس منٹ جسمانی سرگرمیوں کے لیے وقف کرنے کی ترغیب دیتی ہے۔ اب تک ملک بھر میں ہزاروں مقامات پر منعقد ہونے والی اس مہم میں 30 لاکھ سے زائد افراد حصہ لے چکے ہیں۔

یہ پروگرام نوجوانوں کے امور اور کھیلوں کی وزارت (ایم وائی اے ایس) کے زیرِ اہتمام سائیکلنگ فیڈریشن آف انڈیا (سی ایف آئی)، یوگ آسن بھارت، راہگیری فاؤنڈیشن اور مائی بھارت کے اشتراک سے منعقد کیا جاتا ہے۔

یہ سائیکل مہم ملک کی تمام ریاستوں اور مرکز کے زیرِ انتظام علاقوں میں بیک وقت منعقد کی جاتی ہے، جس میں اسپورٹس اتھارٹی آف انڈیا (سائی) کے علاقائی مراکز، قومی مراکزِ امتیاز (این سی او ایز)، سائی تربیتی مراکز (ایس ٹی سیز)، کھیلو انڈیا ریاستی مراکزِ امتیاز (کے آئی ایس سی ایز) اور کھیلو انڈیا مراکز (کے آئی سیز) بھی فعال طور پر جنابک ہوتے ہیں۔

****

ش ح۔ ش ا ر۔ ول

Uno-9576­