திறம்பட்ட சட்டமன்றச் செயல்பாட்டிற்கு அர்த்தமுள்ள ஜனநாயக உரையாடலே அடித்தளம் என்று மக்களவைத் தலைவர் திரு ஓம் பிர்லா கூறியுள்ளார். தலைமைத்துவம் என்பது கோஷங்கள், இடையூறுகள் அல்லது சட்டமன்ற முட்டுக்கட்டைகள் மூலம் அன்றி,  பகுத்தறிவுள்ள வாதங்கள், உண்மைகள் மற்றும் ஆக்கப்பூர்வமான யோசனைகள் மூலமே கட்டமைக்கப்படுகிறது என்று அவர் குறிப்பிட்டார். சட்டமன்றங்களை விவாதம், கலந்தாலோசனை மற்றும் தீர்வுகளுக்கான மன்றங்கள் என்று குறிப்பிட்ட அவர், நாடாளுமன்ற உரையாடலின் தரத்தை மேம்படுத்தவும், அவையில் நடைபெறும் விவாதங்கள் பொதுமக்களின் கவலைகளை நிவர்த்தி செய்வதற்கும் மாநிலத்தின் வளர்ச்சியை முன்னெடுத்துச் செல்வதற்கும் பங்களிக்க வேண்டும் என்றும் கேட்டுக்கொண்டார். அறிவார்ந்த உரையாடல், பரஸ்பர மரியாதை மற்றும் பொது நலனுக்கான பகிரப்பட்ட அர்ப்பணிப்பு ஆகியவற்றிலிருந்து ஜனநாயக அமைப்புகள் தங்கள் வலிமையைப் பெறுகின்றன என்று அவர் குறிப்பிட்டார்.

மேற்கு வங்கச் சட்டமன்றத்துடன் இணைந்து, மக்களவைச் செயலகத்தின் கீழ் இயங்கும் ஜனநாயகத்திற்கான நாடாளுமன்ற ஆய்வு மற்றும் பயிற்சி நிறுவனம் (PRIDE) ஏற்பாடு செய்திருந்த, 18-வது மேற்கு வங்கச் சட்டமன்ற உறுப்பினர்களுக்கான இரு நாள் அறிமுகப் பயிற்சி முகாமின் நிறைவு விழாவில் உரையாற்றுகையில் அவர் இந்தக் கருத்துகளைத் தெரிவித்தார்.

சட்டமன்ற உறுப்பினர்கள் தங்கள் வாழ்க்கையில் எளிமையையும், நடத்தையில் பணிவையும், பொது விவகாரங்களில் வெளிப்படைத்தன்மையையும் கடைப்பிடிக்குமாறு கேட்டுக்கொண்ட திரு பிர்லா, ஜனநாயக அமைப்புகளின் மிகப்பெரிய பலம் மக்களின் நம்பிக்கைதான்  என்று குறிப்பிட்டார். பொது வாழ்வில் செல்வாக்கும் மரியாதையும் பதவி அல்லது அதிகாரத்தின் மூலம் கிடைப்பதில்லை என்றும், மாறாக நேர்மை, நாணயம், எளிதில் அணுகக்கூடிய தன்மை மற்றும் சேவை ஆகியவற்றின் மூலமே அவை பெறப்படுகின்றன என்பதையும் அவர் சுட்டிக்காட்டினார். அறநெறி சார்ந்த நடத்தை மற்றும் பொறுப்புணர்வுடன் கூடிய பொதுச் சேவையின் மூலம், மக்கள் தங்கள் மீது வைத்துள்ள நம்பிக்கையை மேலும் வலுப்படுத்துமாறு அவர் உறுப்பினர்களுக்குக் கோரிக்கை விடுத்தார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleasePage.aspx?PRID=2281144&reg=3&lang=1  

***

TV/RB/RJ