وزیر دفاع جناب راج ناتھ سنگھ نے 04 جولائی 2026 کو نئی دہلی میں ایک میڈیا تنظیم کے زیر اہتمام ایک تقریب سے خطاب کرتے ہوئے کہا ، ’’پچھلے 12 سال میں ہندوستان کا سفر قلت سے لے کر  خود انحصاری کی طرف ، خود انحصاری سے خود اعتمادی کی طرف اور خود اعتمادی سے وکست  بھارت کی تعمیر کی طرف ایک پیش رفت رہا ہے ۔ انہوں نے زور دے کر کہا کہ اپنی پہلی میعاد میں ، وزیر اعظم جناب نریندر مودی کی قیادت والی حکومت نے کمی کو دور کیا ، موقعوں میں  اضافہ کیا ، اور ورک کلچر کو تبدیل کیا ؛ دوسری میعاد میں ، اس نے امنگوں کو کامیابیوں میں تبدیل کیا اور ملک کو مضبوطی سے آتم نربھرتا کی راہ پر گامزن کیا ۔ انہوں نے مزید کہا کہ اپنی تیسری مدت میں ، حکومت ’’اصلاح ، کارکردگی ، تبدیلی‘‘ کی پالیسی کے ذریعے وکست  بھارت کے لیے ایک مضبوط بنیاد رکھ رہی ہے ، اس اعتماد کا اظہار کرتے ہوئے کہ دنیا چوتھی مدت میں ایک ترقی یافتہ ہندوستان کے عروج کا مشاہدہ کرے گی ۔

گزشتہ 12 سال میں ملک کی تبدیلی کے کلیدی پہلوؤں پر روشنی ڈالتے ہوئے ، وزیر دفاع نے کہا کہ جب 2014 میں ’میک ان انڈیا‘ کا آغاز کیا گیا تھا ، تو کچھ حلقوں نے اسے ناکامی قرار دیا تھا ، لیکن اس اسکیم نے کامیابی کے نئے معیارات قائم کیے اور جو آج بھی جاری ہیں۔ انہوں نے کہا کہ ہندوستان کے عالمی قد میں تبدیلی آئی ہے ۔ اگرچہ دنیا پہلے ہماری آواز پر بہت کم توجہ دیتی تھی ، لیکن آج وہ عالمی مسائل پر ہندوستان کے نقطہ نظر کو توجہ سے سنتی ہے ۔ انہوں نے مزید کہا کہ 2021 میں شروع کیے گئے انڈیا سیمی کنڈکٹر مشن پر ابتدائی شکوک و شبہات کے باوجود ، ’پلگ اینڈ پلے‘ انفراسٹرکچر ماڈل پر مبنی سیمی کنڈکٹر پارکس کے قیام کی وجہ سے ملک نے گزشتہ سال اپنی سیمی کنڈکٹر چپس تیار کیں ۔

جناب راج ناتھ سنگھ نے مزید کہا کہ مالی سال 26-2025میں سالانہ دفاعی پیداوار 1.78 لاکھ کروڑ روپے تک پہنچ گئی ، جو مالی سال15-2014کے اعداد و شمار سے تین گنا زیادہ ہے ۔ انہوں نے کہا کہ دفاعی برآمدات مالی سال 14-2013 میں 686 کروڑ روپے سے بڑھ کر آج 38000 کروڑ روپے سے زیادہ کے ریکارڈ پر پہنچ گئیں ، جس سے تقریبا 57 گنا اضافے  کا پتہ چلتا ہے اور میک ان انڈیا پلیٹ فارمز پر عالمی اعتماد کو اجاگر کرتی ہیں ۔

وزیر دفاع نے میک ان انڈیا کے تحت موبائل مینوفیکچرنگ ، آٹوموبائل کی برآمدات ، مقامی انجنوں کی پیداوار اور ڈیجیٹل بنیادی ڈھانچے کی توسیع کا حوالہ دیتے ہوئے مینوفیکچرنگ اور ٹیکنالوجی میں ہندوستان کی نمایاں ترقی پر بھی روشنی ڈالی ۔ انہوں نے ہندوستان کے ڈیجیٹل انقلاب کا خاص طور پر ذکر کرتے ہوئے کہا کہ اپریل میں 22.35 ارب  یو پی آئی ٹرانزیکشن کیے گئے جن کی کل مالیت 29 لاکھ کروڑ روپے ہے اور اس سہولت کا بین الاقوامی اثر بڑھ رہا ہے ۔ انہوں نے مقامی طور پر تیار کردہ میک ان انڈیا 5 جی ٹیکنالوجی کے تیزی سے ملک گیر رول آؤٹ کے بارے میں بھی بات کی ، اس بات پر زور دیتے ہوئے کہ 6 جی پر ترقی کے لیے کوششیں کی جا رہی ہیں ۔

جناب راج ناتھ سنگھ نے مزید کہا کہ 2014 سے پہلے ، فلاح و بہبود کی فراہمی میں بدعنوانی اور  چوری کو بڑے پیمانے پر ناگزیر سمجھا جاتا تھا ، جس سے مستفیدین تک فوائد نہیں پہنچ پاتے تھے ۔ انہوں نے کہا کہ حکومت نے ’جے اے ایم ٹرنیٹی‘کے ذریعے اس چیلنج سے نمٹا، جس میں براہ راست فوائد کی منتقلی ، جن دھن ، آدھار اور موبائل ٹرنیٹی شامل ہیں ، جس سے مستفیدین کے بینک کھاتوں میں 51 لاکھ کروڑ روپے کی براہ راست منتقلی ممکن ہوئی جبکہ تقریبا 4.3 لاکھ کروڑ روپے کی چوری  کو روکا گیا ۔ انہوں نے گڈز اینڈ سروسز ٹیکس (جی ایس ٹی) کے کامیاب نفاذ پر بھی روشنی ڈالی اور کہا کہ ابتدائی خدشات کے باوجود یہ مرکز اور ریاستوں/ مرکز کے زیر انتظام علاقوں کے درمیان تال میل کو مضبوط بنا کر  امداد باہمی پر مبنی وفاقیت کے ایک ماڈل کے طور پر تیار ہوا ہے ۔

وزیر دفاع نے نشاندہی کی کہ جموں و کشمیر میں آرٹیکل 370 کی منسوخی اور نکسل ازم کے خاتمے کی مسلسل کوششیں حکومت کے ان مسائل کو حل کرنے کے عزم کی درخشاں مثالیں ہیں جو کبھی حل سے بالاتر تصور کیا جاتا تھا ۔ انہوں نے یہ بھی کہا کہ حکومت کاروباریوں کو روزگار پیدا کرنے والے اور دولت پیدا کرنے والے کے طور پر تسلیم کرتی ہے ، اور جن وشواس اصلاحات جیسے اقدامات سے کاروبار کرنے میں آسانی میں بہتری آئی ، اور دنیا کی تیسری سب سے بڑی معیشت بننے کی سمت میں ہندوستان کی ترقی میں اہم کردار ادا کیا ۔ ’’ہندوستان دنیا کا تیسرا سب سے بڑا اسٹارٹ اپ ایکو سسٹم بن گیا ہے ۔ انہوں نے مزید کہا کہ پچھلے 12 سال میں اسٹارٹ اپس کی تعداد 500 سے بڑھ کر 2 لاکھ سے زیادہ ہو گئی ہے ، جس میں یونیکورن چار سے بڑھ کر 125 ہو گئے ہیں ۔

جناب راج ناتھ سنگھ نے زور دے کر کہا کہ ہندوستان کی ثقافت اس کی شناخت ، اتحاد اور قومی شعور کی بنیاد بناتی ہے اور تہذیب ، ثقافت اور ورثے کے تحفظ کے ساتھ ساتھ مجموعی ترقی کو آگے بڑھایا گیا ہے ۔ انہوں نے کہا کہ کاشی وشوناتھ دھام کوریڈور ، مہاکال لوک ، اور ماں کامکھیا دیویا لوک پریوجنا جیسے اقدامات کے ذریعے ہندوستان کی ثقافتی شناخت کو بحال کرنے اور اس کے کھوئے ہوئے ورثے کو بحال کرنے کی کوششیں کی جا رہی ہیں ۔

’مواصلاتی کثرت‘ کے موجودہ دور میں میڈیا کے کردار کو پہلے سے کہیں زیادہ اہم قرار دیتے ہوئے ، رکشا وزیر موصوف نے کہا کہ آج کا چیلنج معلومات کی کمی نہیں بلکہ اس کی درستی اور یقین دہانی ہے ۔ انہوں نے بتایا کہ’صحافت‘ بھی مصنوعی ذہانت (اے آئی) جیسی تکنیکی ترقی سے متاثر ہوئی ہے لیکن وہ انسانی تخلیقی صلاحیتوں اور ذہانت کو پیچھے نہیں چھوڑ سکیں گی ۔ انہوں نے کہا کہ صحافت کی مستقبل کی کامیابی اس بات پر منحصر ہوگی کہ یہ مصنوعی ذہانت اور انسانی ہمدردی کی صلاحیتوں کے درمیان کتنی اچھی طرح سے توازن اور ہم آہنگی قائم کرتی ہے ۔ جہاں مصنوعی ذہانت صحافت کو تیز تر اور زیادہ درست بنائے گی ، وہیں جذباتی ذہانت اس بات کو یقینی بنائے گی کہ یہ انسانی اور قابل اعتماد رہے ۔

جناب راج ناتھ سنگھ نے زور دے کر کہا کہ صحافت کی حقیقی طاقت صرف معلومات کے پھیلاؤ میں نہیں ہے ، بلکہ معاشرے کو صحیح سمت میں رہنمائی کرنے ، سچائی کو روشنی میں لانے اور جمہوریت کو مضبوط کرنے میں ہے ۔ انہوں نے کہا کہ غلط معلومات معاشرے اور دفاعی افواج کے حوصلے کو بری طرح متاثر کرتی ہیں ، انہوں نے مزید کہا کہ اگرچہ سب سے پہلے رپورٹنگ کرنا صحافت میں اہم ہو سکتا ہے ، لیکن صحیح خبروں کو پھیلانا اس سے بھی زیادہ اہم ہے ۔ خاص طور پر جب موضوع دفاعی افواج ، قومی سلامتی ، یا قوم کی خدمت میں سب سے بڑی قربانی دینے والوں کی عزت سے متعلق ہو ، تو ہر لفظ قومی ذمہ داری کا معاملہ بن جاتا ہے ۔ میڈیا کو ہمیشہ درستی ، معروضیت اور غیر جانبداری کی اقدار کو برقرار رکھنا چاہیے ۔

۔۔۔۔

ش ح۔ا س۔ ت ح ۔     

U 9549–