પંચાયતી રાજ મંત્રાલય દ્વારા 3 જુલાઈ 2026ના રોજ નવી દિલ્હી ખાતે સોળમાં નાણાં પંચની ભલામણો પર વિચાર-વિમર્શ કરવા માટે રાજ્યના પંચાયતી રાજ મંત્રીઓની એક રાષ્ટ્રીય કાર્યશાળાનું આયોજન કરવામાં આવશે. આ કાર્યશાળાની અધ્યક્ષતા કેન્દ્રીય પંચાયતી રાજ અને મત્સ્યોદ્યોગ, પશુપાલન અને ડેરી મંત્રી શ્રી રાજીવ રંજન સિંહ ઉર્ફે લલન સિંહ, કેન્દ્રીય પંચાયતી રાજ રાજ્ય મંત્રી પ્રો. એસ. પી. સિંહ બઘેલની ગરિમામય ઉપસ્થિતિમાં કરશે. આ કાર્યશાળામાં રાજ્યોના પંચાયતી રાજ મંત્રીઓ તેમજ રાજ્ય સરકારોના વરિષ્ઠ અધિકારીઓ ભાગ લેશે.

આ કાર્યશાળામાં સોળમાં નાણાં પંચ દ્વારા ભલામણ કરાયેલ પુરસ્કાર અવધિ 2026-31 માટેની ભલામણો પર વિચાર-વિમર્શ કરવામાં આવશે, જેમાં પંચાયતી રાજ સંસ્થાઓ (PRIs)ને ₹4.35 લાખ કરોડના હસ્તાંતરણની ભલામણ કરવામાં આવી છે. આ ચર્ચાઓ નાણાં મંત્રાલયના ખર્ચ વિભાગ દ્વારા બહાર પાડવામાં આવેલી, સોળમાં નાણાં પંચના ગ્રામીણ સ્થાનિક સંસ્થાઓ (RLB)ના અનુદાનના અમલીકરણ માટેની ઓપરેશનલ માર્ગદર્શિકા પર કેન્દ્રિત રહેશે. આ વિચાર-વિમર્શ નાણાં પંચના અનુદાનની મુક્તિ અને ઉપયોગ, પાલનની આવશ્યકતાઓ, અનુદાન મુક્ત કરવાની પ્રક્રિયાઓ, સંસ્થાકીય સજ્જતા અને દેશભરમાં નાણાંકીય વિકેન્દ્રીકરણને મજબૂત કરવા માટે પંચાયતી રાજ સંસ્થાઓ દ્વારા ભંડોળનો સમયસર અને અસરકારક ઉપયોગ સુનિશ્ચિત કરવા માટેની મિકેનિઝમ્સને સંચાલિત કરતી ઓપરેશનલ માર્ગદર્શિકાની જોગવાઈઓ પર કેન્દ્રિત રહેશે.

સોળમા નાણાં પંચની ભલામણોને અનુરૂપ, આ કાર્યશાળા પોતાના સ્ત્રોતની આવક (OSR) એકત્રીકરણમાં વધારો કરીને પંચાયતી રાજ સંસ્થાઓની નાણાંકીય સ્થિરતાને મજબૂત કરવા પર વિશેષ ભાર મૂકશે. તે રાજ્યો અને કેન્દ્રશાસિત પ્રદેશોને શ્રેષ્ઠ પ્રથાઓ વહેંચવા, અમલીકરણના પડકારોની ચર્ચા કરવા અને નાણાં પંચના અનુદાનના અસરકારક ઉપયોગ માટે વ્યવહારુ વ્યૂહરચનાઓનું આદાન-પ્રદાન કરવા માટે એક પ્લેટફોર્મ પણ પૂરું પાડશે. આ વિચાર-વિમર્શ કેન્દ્ર-રાજ્ય સહયોગને મજબૂત કરશે અને વિકસિત ભારત@2047ના વિઝન અનુસાર બહેતર શાસન, ઇન્ફ્રાસ્ટ્રક્ચર, જાહેર સેવાઓ અને સર્વસમાવેશક ગ્રામીણ વિકાસ પ્રદાન કરવા માટે પંચાયતોને સશક્ત બનાવવા માટેના એક મજબૂત અમલીકરણ માળખાના વિકાસને સહયોગ આપશે તેવી અપેક્ષા છે.

SM/DK/JD