ਬਿਹਾਰ ਵਿੱਚ ਰੇਲ ਬੁਨਿਆਦੀ ਢਾਂਚੇ ਨੂੰ ਮਹੱਤਵਪੂਰਨ ਹੁਲਾਰਾ ਦਿੰਦੇ ਹੋਏ ਭਾਰਤੀ ਰੇਲਵੇ ਨੇ ਪੂਰਬੀ ਮੱਧ ਰੇਲਵੇ ਦੇ 44.40 ਕਿੱਲੋਮੀਟਰ ਲੰਬੇ ਮਾਨਸੀ-ਸਹਰਸਾ ਸੈਕਸ਼ਨ ਦੇ ₹499 ਕਰੋੜ ਦੀ ਲਾਗਤ ਨਾਲ ਡਬਲਿੰਗ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਹ ਪ੍ਰੋਜੈਕਟ ਲਾਈਨ ਦੀ ਸਮਰੱਥਾ ਨੂੰ ਵਧਾਏਗਾ, ਸੰਚਾਲਨ ਕੁਸ਼ਲਤਾ ਵਿੱਚ ਸੁਧਾਰ ਕਰੇਗਾ ਅਤੇ ਇਸ ਮਹੱਤਵਪੂਰਨ ਰੂਟ 'ਤੇ ਯਾਤਰੀਆਂ ਅਤੇ ਮਾਲ ਢੋਆ-ਢੁਆਈ ਦੀ ਵਧਦੀ ਮੰਗ ਨੂੰ ਪੂਰਾ ਕਰੇਗਾ।

ਵਿਅਸਤ ਰੇਲ ਕਾਰੀਡੋਰ 'ਤੇ ਸਮਰੱਥਾ ਵਿੱਚ ਵਾਧਾ

ਮਾਨਸੀ-ਸਹਰਸਾ ਸੈਕਸ਼ਨ ਵਰਤਮਾਨ ਵਿੱਚ ਮਾਨਸੀ-ਸਾਰਾਗੜ੍ਹ ਰੂਟ 'ਤੇ ਇੱਕ ਸਿੰਗਲ-ਲਾਈਨ ਕਾਰੀਡੋਰ ਹੈ, ਜਿੱਥੇ ਯਾਤਰੀਆਂ ਅਤੇ ਮਾਲ ਦੀ ਭਾਰੀ ਆਵਾਜਾਈ ਹੁੰਦੀ ਹੈ। ਇਸ ਸੈਕਸ਼ਨ 'ਤੇ ਹਰੇਕ ਦਿਸ਼ਾ ਵਿੱਚ 24 ਜੋੜੀ ਯਾਤਰੀ ਟ੍ਰੇਨਾਂ ਚੱਲਦੀਆਂ ਹਨ ਅਤੇ ਨਾਲ ਹੀ ਕਣਕ, ਮੱਕੀ, ਗਿੱਟੀ , ਉਬਲੇ ਚਾਵਲ, ਸੀਮੈਂਟ, ਖਾਦ, ਚਾਵਲ, ਨਮਕ, ਰੇਤ, ਪੱਥਰ ਅਤੇ ਖੰਡ ਵਰਗੀਆਂ ਜ਼ਰੂਰੀ ਚੀਜ਼ਾਂ ਦੀ ਢੋਆ-ਢੁਆਈ ਵੀ ਹੁੰਦੀ ਹੈ।

ਵਰਤਮਾਨ ਵਿੱਚ ਰੇਲ ਲਾਈਨ ਦੀ ਸਮਰੱਥਾ ਦੀ ਵਰਤੋਂ ਪਹਿਲਾਂ ਹੀ 108.11% ਤੱਕ ਪਹੁੰਚ ਚੁੱਕੀ ਹੈ ਅਤੇ 2028-29 ਤੱਕ ਇਸ ਦੇ ਵਧ ਕੇ 119.34% ਹੋਣ ਦਾ ਅਨੁਮਾਨ ਹੈ, ਜੋ ਵਾਧੂ ਰੇਲ ਸਮਰੱਥਾ ਦੀ ਤੁਰੰਤ ਲੋੜ ਨੂੰ ਦਰਸਾਉਂਦਾ ਹੈ।

ਯਾਤਰੀ ਸੇਵਾਵਾਂ ਅਤੇ ਮਾਲ ਢੋਆ-ਢੁਆਈ ਨੂੰ ਹੁਲਾਰਾ

ਡਬਲਿੰਗ ਪ੍ਰਾਜੈਕਟ ਨਾਲ ਵਾਧੂ ਲਾਈਨ ਸਮਰੱਥਾ ਪੈਦਾ ਹੋਵੇਗੀ, ਜਿਸ ਨਾਲ ਯਾਤਰੀ ਅਤੇ ਮਾਲ ਗੱਡੀਆਂ ਦੀ ਸੁਚਾਰੂ ਆਵਾਜਾਈ ਯਕੀਨੀ ਹੋਵੇਗੀ ਅਤੇ ਸੰਚਾਲਨ ਸਬੰਧੀ ਰੁਕਾਵਟਾਂ ਘੱਟ ਹੋਣਗੀਆਂ। ਉੱਨਤ ਬੁਨਿਆਦੀ ਢਾਂਚਾ ਸਮੇਂ ਦੀ ਪਾਬੰਦੀ ਵਿੱਚ ਸੁਧਾਰ ਕਰੇਗਾ, ਸੰਚਾਲਨ ਲਚਕਤਾ ਨੂੰ ਵਧਾਏਗਾ ਅਤੇ ਪੂਰੇ ਖੇਤਰ ਵਿੱਚ ਰੇਲ ਆਵਾਜਾਈ ਦੇ ਭਵਿੱਖ ਦੇ ਵਾਧੇ ਵਿੱਚ ਮਦਦ ਕਰੇਗਾ।

ਪ੍ਰਾਜੈਕਟ ਦੇ ਸ਼ੁਰੂ ਹੋਣ 'ਤੇ, ਇਸ ਨਾਲ ਹਰ ਸਾਲ ਵਾਧੂ 1.764 ਮਿਲੀਅਨ ਟਨ (ਐੱਮਟੀਪੀਏ) ਮਾਲ ਢੋਆ-ਢੁਆਈ ਨੂੰ ਸੰਭਾਲਣ ਵਿੱਚ ਸਹੂਲਤ ਮਿਲਣ ਦੀ ਉਮੀਦ ਹੈ, ਜਿਸ ਨਾਲ ਖੇਤੀਬਾੜੀ, ਨਿਰਮਾਣ ਅਤੇ ਖੇਤਰੀ ਅਰਥਚਾਰੇ ਦੇ ਹੋਰ ਪ੍ਰਮੁੱਖ ਖੇਤਰਾਂ ਲਈ ਲੌਜਿਸਟਿਕਸ ਨੂੰ ਮਜ਼ਬੂਤੀ ਮਿਲੇਗੀ।

ਇਹ ਪ੍ਰਾਜੈਕਟ ਭਾਰਤੀ ਰੇਲਵੇ ਦੇ ਉਨ੍ਹਾਂ ਨਿਰੰਤਰ ਯਤਨਾਂ ਦਾ ਹਿੱਸਾ ਹੈ, ਜਿਨ੍ਹਾਂ ਦਾ ਉਦੇਸ਼ ਉੱਚ-ਮੰਗ ਵਾਲੇ ਰੂਟਾਂ 'ਤੇ ਸਮਰੱਥਾ ਦਾ ਵਿਸਤਾਰ ਕਰਨਾ, ਸੇਵਾ ਦੀ ਭਰੋਸੇਯੋਗਤਾ ਵਿੱਚ ਸੁਧਾਰ ਕਰਨਾ ਅਤੇ ਦੇਸ਼ ਭਰ ਵਿੱਚ ਯਾਤਰੀਆਂ ਤੇ ਮਾਲ ਢੋਆ-ਢੁਆਈ ਲਈ ਤੇਜ਼, ਸੁਰੱਖਿਅਤ ਅਤੇ ਵਧੇਰੇ ਕੁਸ਼ਲ ਆਵਾਜਾਈ ਨੂੰ ਉਤਸ਼ਾਹਿਤ ਕਰਨਾ ਹੈ।

****

ਧਰਮਿੰਦਰ ਤਿਵਾੜੀ/ਡਾ. ਨਯਨ ਸੋਲੰਕੀ/ਰਿਤੂ ਰਾਜ/ਮਾਨਿਕ ਸ਼ਰਮਾ