مرکزی وزارتِ سیاحت نے آج گوگل انڈیا پرائیویٹ لمیٹڈ کے ساتھ بھارت کے سیاحتی مقامات کے ڈیجیٹل فروغ کو مستحکم بنانے کے لیے ایک مفاہمت نامے پر دستخط کیے۔ اس مفاہمت نامے کا مقصد ڈیجیٹل ٹیکنالوجی، مصنوعی ذہانت، اعداد و شمار پر مبنی تجزیے اور صلاحیت سازی کے ذریعے بھارتی سیاحت کو فروغ دینا ہے۔ نئی دہلی میں منعقدہ تقریب میں مرکزی وزیر برائے سیاحت و ثقافت جناب گجیندر سنگھ شیخاوت کی موجودگی میں مفاہمت نامے کا تبادلہ کیا گیا۔

یہ مفاہمت نامہ وزارتِ سیاحت اور گوگل انڈیا کے درمیان ڈیجیٹل سیاحت کے فروغ، معلومات اور تجربات کے تبادلے، صلاحیت سازی اور ابھرتی ہوئی ٹیکنالوجیز کے استعمال کے ذریعے سیاحوں کی شمولیت کو بہتر بنانے جیسے اہم شعبوں میں تعاون کا فریم ورک فراہم کرتا ہے۔ اس شراکت داری کے تحت گوگل اپنے ڈیجیٹل نظام میں موجود مہارت سے فائدہ اٹھاتے ہوئے ملکی اور غیر ملکی سیاحوں کے درمیان بھارت کے سیاحتی مقامات، سیاحتی تجربات اور ثقافتی ورثے کی عالمی سطح پر تشہیر کو مزید مضبوط بنائے گا۔ یہ تعاون مکمل طور پر غیر تجارتی، غیر پابند اور غیر خصوصی نوعیت کا ہوگا، جبکہ اس کے نتیجے میں کسی بھی فریق پر کوئی مالی ذمہ داری عائد نہیں ہوگی۔

اس موقع پر وزارتِ سیاحت کے سکریٹری جناب بھونیش کمار، ایڈیشنل سکریٹری اور ڈائریکٹر جنرل (سیاحت) جناب سمن بلا، وزارت کے سینئر افسران، گوگل انڈیا کی کنٹری منیجر اور نائب صدر محترمہ پریتی لوبانا سمیت گوگل انڈیا کے نمائندے بھی موجود تھے۔

اس موقع پر خطاب کرتے ہوئے مرکزی وزیر برائے سیاحت و ثقافت جناب گجیندر سنگھ شیخاوت نے کہا، "ڈیجیٹل ٹیکنالوجیز میں ایسی مؤثر اور حقیقت سے قریب تر تجربات تخلیق کرنے کی صلاحیت موجود ہے، جن کے ذریعے بھارت کے ثقافتی ورثے کی عظمت اور شاندار تاریخ کو دنیا بھر کے لوگوں کے سامنے پیش کیا جا سکتا ہے۔ جدید ترین ڈیجیٹل ٹیکنالوجیز سے استفادہ کرتے ہوئے ہم اس انداز کو بدل سکتے ہیں، جس کے تحت سیاح بھارت کے بھرپور ثقافتی اور قدرتی ورثے کو دریافت کرتے ہیں، اس کا تجربہ حاصل کرتے ہیں اور اس سے وابستہ ہوتے ہیں۔"

جناب شیخاوت نے کہا کہ یہ شراکت داری انکریڈیبل انڈیا مہم کے تحت سیاحت کے فروغ کے لیے جدید اور ٹیکنالوجی پر مبنی طریقۂ کار اختیار کرنے کے وزارت کے عزم کی عکاسی کرتی ہے۔ انہوں نے یقین ظاہر کیا کہ اس اشتراک سے عالمی سطح پر بھارت کی سیاحتی شناخت مزید مستحکم ہوگی، ڈیجیٹل رسائی میں اضافہ ہوگا اور بھارت کو ایک جدید، آسان رسائی رکھنے والی اور عالمی سطح پر مسابقتی سیاحتی مقام کے طور پر فروغ ملے گا۔

اس شراکت داری کے تحت عالمی سفری رجحانات، سیاحوں کے رویّوں اور ڈیجیٹل شمولیت کے انداز سے متعلق گوگل کے تجزیاتی اعداد و شمار سے استفادہ کیا جائے گا، تاکہ شواہد پر مبنی سیاحت کے فروغ کی حکمت عملی تیار کی جا سکے۔ اس کے علاوہ وزارت کے افسران کے لیے ڈیجیٹل مارکیٹنگ کے جدید ذرائع، مہمات کی مؤثر منصوبہ بندی، مواد کی تیاری اور مصنوعی ذہانت سمیت ابھرتی ہوئی ٹیکنالوجیز کے استعمال سے متعلق تربیتی اور صلاحیت سازی کے پروگرام بھی منعقد کیے جائیں گے، تاکہ سیاحت کے فروغ کی مہمات کو زیادہ ہدف پر مبنی، مؤثر اور قابلِ پیمائش بنایا جا سکے۔

وزارتِ سیاحت اور گوگل انڈیا نے ٹیکنالوجی اور اختراع سے بھرپور استفادہ کرتے ہوئے بھارت کے سیاحتی نظام کو مزید مضبوط بنانے اور ملک کو عالمی سطح پر پسندیدہ سیاحتی منزل کے طور پر فروغ دینے کے اپنے مشترکہ عزم کا اعادہ کیا

************

ش ح ۔   م  د ۔  م  ص

(U : 9363 )