প্রধান মন্ত্রী, শ্রী নরেন্দ্র মোদীগী লমজিং-লমতাক মখাদা, কেন্দ্রগী লৌউ-শিংউ অমসুং লৌমীশিংগী য়াইফ-থৌরাং অমসুং খুঙ্গং চাউখৎ-থৌরাংগী মন্ত্রী, শ্রী শিবরাজ সিং চৌহাননা অৱাং-নোংপোক লমদমদা নুমিৎ নিনিগী ওইবা খোঙচৎ চৎকনি। শ্রী চৌহাননা জুন 30দা নই দিল্লীদগী চৎখিগনি অমসুং নুমিৎ অদুদা অসামগী গুৱাহাতিদা অৱাংবা থাক্কী মীফম অমা পাংথোক্কনি। জুলাই 1দা, মহাক্না অরুনাচল প্রদেশকী ঈশিং-ঈচাউনা শোকহল্লবা মফমশিংদা চত্তুনা মফম অদুগী ফিভম য়েংশিনগনি।

প্রধান মন্ত্রী, শ্রী নরেন্দ্র মোদীগী লমজিং মখাদা, কেন্দ্র সরকারনা শোকহল্লবা মফমশিংদা ওইরিবা ঈশিং-ঈচাউগী ফিভম অদু কুপ্না য়েংশিল্লি অমসুং মফম অদুদা হকথেংননা য়েংশিন্দুনা অমসুং অথুবা মতমদা ৱারেপ লৌদুনা  রিলীফ অমসুং রিহেবিলিতেসনগী থবকশিং অথুবা মতমদা পাংথোক্নবা হোৎনরি। অসাম অমসুং অরুনাচল প্রদেশতা ওইরক্লিবা ঈশিং-ঈচাউগী ফিভম অসি য়াম্না লুনা লৌরদুনা, প্রধান মন্ত্রীনা কেন্দ্রগী মন্ত্রী, শ্রী শিবরাজ সিং চৌহানবু ফিভম অসি মশানা চত্তুনা য়েংশিন্নবা অথুবা মতমদা লমদম অসিদা চৎনবা খঙহনখ্রে।

লেপখিবা প্রোগ্রামগী মতমগী মতুং ইন্না, শ্রী চৌহাননা জুন 30দা নই দিল্লী থাদোক্লগনি অমসুং গুৱাহাতিদা থুংলগনি। মফম অদুদা মহাক্না অসাম সরকারগী মকোক থোংবা ওফিসিয়েলশিংগা লোয়ননা অৱাংবা থাক্কী মীফম অমা পাংথোক্কনি। মীফম অসিদা অসাম অমসুং মনাক নকপা মফমশিংদা মহৈ-মরোংশিং, খুঙ্গংশিং অমসুং মরুওইবা ইনফ্রাস্ত্রকচরদা ঈশিং-ঈচাউগী শাফু য়েংশিনগনি, হৌজিক চত্থরিবা রিলীফ ওপরেসনশিংগী খোংজেল য়েংশিনগনি অমসুং মখাতানা তেংবাং অমসুং ইন্তরভেন্সনগী মথৌ তাবশিংগী মতাংদা খন্নগনি।

অসামদা য়েংশিনবগী মতুংদা, শ্রী চৌহাননা জুলাই 1দা অরুনাচল প্রদেশকী ঈশিং-ঈচাউনা শোকহল্লবা মফমশিংদসু চৎকনি। মহাক্না ঈশিং-ঈচাউনা শোকহল্লবা খুঙ্গংশিং, লৌউ-শিংউগী লমশিং অমসুং রিলীফ কেম্পশিংগী ফিভম য়েংশিন্নবা এরিয়ল অমসুং গ্রাউন্দ সর্ভে অনিমক পাংথোক্কনি। খোঙচৎ অদুগী মনুংদা, কেন্দ্রগী মন্ত্রীনা হৌজিক ফাওবদা লৌখৎলিবা রিলীফকী খোঙথাংশিং অদু কয়া য়াম্না শাফবগে অমসুং কান্নরিবগে হায়বদু খঙদোক্নবা অমসুং মথৌ তাবা অহেনবা মতেং অদু খঙদোক্নবা শোকহল্লবা লৌমীশিং, মফম অদুগী মীওইশিং, নুপী কাংলুপশিং অমসুং নহারোলশিংগা হকথেংননা ৱারী শানগনি।

নুমিৎ অদুগী মতুং তারকপদা, শ্রী চৌহাননা অরুনাচল প্রদেশ সরকারগী মন্ত্রীশিং, সেনিয়র ওফিসিয়েলশিং অমসুং অতোপ্পা মীয়ামগী মীহুৎশিংগসু উনগনি। খন্ন-নৈনবদা মহৈ-মরোং মাংখিবা, শোকহল্লবা লৌমীশিংগীদমক কম্পেন্সেসন অমসুং মহৈ-মরোংগী ইন্সুরেন্স পেমেন্তশিং, ঈশিং-ঈচাউনা মাং-তাকহনখিবা লম্বীশিং, থোংশিং, অমসুং ‌এম্বেঙ্কমেন্তশিং অদু অমুক হন্না শেমজিনবা অমসুং খুঙ্গংগী ইনফ্রাস্ত্রকচর অমুক হন্না শেমগৎনবা লৌখৎকদবা থৌরাংশিংগী মতাংদা খন্নরগনি।

*****