నోటరీ నియామకాల కోసం, నోటరీ పోర్టల్‌లో ఆన్‌లైన్‌ నూతన దరఖాస్తు విధానాన్ని కేంద్ర న్యాయ శాఖ మంత్రి అర్జున్ రామ్ మేఘవాల్ ఇవాళ ప్రారంభించారు. నోటరీల చట్టం-1952, నోటరీల నియమాలు-1956 నిబంధనల ప్రకారం పబ్లిక్ నోటరీల నియామకానికి ఈ విధానాన్ని రూపొందించారు.

అర్హులైన వృత్తిలో ఉన్న న్యాయవాదులు, అడ్వొకేట్లు నోటరీ పోర్టల్ ద్వారా ఆన్‌లైన్‌లో దరఖాస్తులను సమర్పించటానికి ఈ నూతన విధానం ఉపయోగపడుతుంది. నేషనల్ ఇన్ఫర్మేటిక్స్ సెంటర్ (ఎన్ఐసీ) సహకారంతో న్యాయ వ్యవహారాల శాఖ అభివృద్ధి చేసిన ఈ విధానం.. దరఖాస్తు ప్రక్రియను మరింత పారదర్శకంగా, సమర్థవంతంగా, పౌరులకు సులభంగా అర్థమయ్యేలా ఉంటుంది.

నోటరీ పోర్టల్‌లోని ముఖ్యమైన అంశాలను వివరిస్తూ.. న్యాయ వ్యవహారాలు, శాసన విభాగం కార్యదర్శి డాక్టర్ రాజీవ్ మణి కీలక వ్యాఖ్యలు చేశారు. నోటరీల నియామకానికి సంబంధించి ఇప్పటికే పలు ఆన్‌లైన్ సేవలను అందిస్తున్న ప్రస్తుత పోర్టల్‌తో నూతన దరఖాస్తు విధానాన్ని విజయవంతంగా అనుసంధానించినట్లు చెప్పారు. ఈ దరఖాస్తుల ప్రక్రియకు సజావుగా, వేగంగా సాగేందుకు వీలుగా ఈ మాడ్యూల్‌లో ఆటోమేటెడ్ పని విధానాలను, వినియోగదారులకు సులభంగా అర్థమయ్యే ఇంటర్ ఫేస్‌ను పొందుపరచినట్లు తెలిపారు.

ఈ సందర్భంగా గౌరవ మంత్రి మాట్లాడుతూ.. కాగిత రహిత, పారదర్శకమైన, పౌర కేంద్రీకృత పాలన వ్యవస్థను ప్రోత్సహించేలా గౌరవ ప్రధానమంత్రి కలలుగన్న డిజిటల్ ఇండియా విజన్ సాకారం దిశగా ఈ మాడ్యూల్ ప్రారంభం కీలక ముందడుగని అన్నారు. వినియోగదారులకు సులభంగా అర్థమయ్యేలా రూపొందించిన ఈ విధానం.. దరఖాస్తు ప్రక్రియను సరళంగా మారుస్తుందని, నోటరీలుగా మారాలనుకునే వారికి సులభంగా సేవలను అందిస్తుందని చెప్పారు.

నోటరీల చట్టం-1952, నోటరీల నిబంధనలు-1956 ప్రకారం.. న్యాయ వ్యవహారాల శాఖ ఎప్పటికప్పుడు ఈ విధానం ద్వారా దరఖాస్తులను ఆహ్వానిస్తుంది. దరఖాస్తులు సమర్పించేందుకు సంబంధించిన సూచనలు, మార్గదర్శకాలు నోటరీ పోర్టల్‌లో అందుబాటులో ఉంటాయి.

నోటరీల నియామకానికి దరఖాస్తుల పరిశీలనకు క్రమబద్ధమైన, పారదర్శకమైన, సమర్థవంతమైన విధానాన్ని అందించటం ద్వారా డిజిటల్ పాలనను బలోపేతం చేయటంలో నూతన దరఖాస్తు విధానాన్ని ప్రారంభించటం కీలక ఘట్టాన్ని సూచిస్తుంది.

***