‘గ్లోబల్ స్కిల్స్ ఛాలెంజ్ (జీఎస్‌సీ) ఆస్ట్రేలియా-2026’లో అద్భుత ప్రదర్శన కనబరిచిన భారత జట్టు... 3 స్వర్ణాలు, 1 రజతం, 1 కాంస్యం సహా మొత్తం 5 పతకాలను గెలుచుకుంది. ఈ ఏడాది చివర్లో షాంఘైలో జరగనున్న 48వ వరల్డ్‌స్కిల్స్ పోటీల కోసం భారత సన్నాహక ప్రయాణంలో ఇది మరో కీలక మైలురాయిగా నిలిచింది. జూన్ 23 నుంచి 29 వరకు జరిగిన ఈ అంతర్జాతీయ పోటీలో... భారత్, ఆస్ట్రేలియా, ఆస్ట్రియా, చైనా, అమెరికా, జపాన్, ఫ్రాన్స్, కొరియా సహా 16 వరల్డ్‌స్కిల్స్ సభ్య దేశాలకు ప్రాతినిధ్యం వహిస్తున్న దాదాపు 600 మంది పోటీదారులు, నిపుణులు, అనువాదకులు, అధికారులు పాల్గొన్నారు.

భారత జట్టులో అత్యుత్తమ ప్రదర్శన చేసినవారు:

• పవన్ భద్రావతి సురేష (కర్ణాటక): యాడిటివ్ మ్యానుఫ్యాక్చరింగ్‌లో స్వర్ణ పతకం

o (జపాన్‌ - రజతం)

• మౌసమ్ కుమార్ గిరి (బీహార్): క్లౌడ్ కంప్యూటింగ్‌లో స్వర్ణ పతకం

o (జపాన్‌-రజతం, సింగపూర్‌-కాంస్యం)

• విష్ణుప్రియ సునీల్ (ఢిల్లీ): ఆరోగ్యం, సామాజిక సంరక్షణలో స్వర్ణ పతకం

o (ఆస్ట్రేలియా-రజతం)

• హర్ష్ రమేష్ పవార్ (మహారాష్ట్ర): 3డి డిజిటల్ గేమ్ ఆర్ట్‌లో రజత పతకం

• ముస్కాన్ (హర్యానా): పెయింటింగ్, డెకరేటింగ్‌లో కాంస్య పతకం

అధునాతన తయారీ, డిజిటల్ సాంకేతికతలు, సృజనాత్మక రంగాలు, సేవా రంగ నైపుణ్యాల్లో అత్యుత్తమ నైపుణ్యం కలిగిన యువతతో పెరుగుతున్న భారత ప్రపంచస్థాయి సామర్థ్యాలను ఈ విజయాలు స్పష్టం చేస్తున్నాయి.

ఇతర పోటీదారులూ పలు విభాగాల్లో అద్భుత ప్రదర్శనతో అంతర్జాతీయ స్థాయిలో మంచి గుర్తింపును పొందారు. ప్రపంచంలోని అత్యుత్తమ నైపుణ్యం గల యువ నిపుణులకు గట్టిపోటీనిచ్చారు.

భారత ప్రభుత్వ నైపుణ్యాభివృద్ధి, వ్యవస్థాపన శాఖ సహాయ మంత్రి (స్వతంత్ర బాధ్యత), విద్యా శాఖ సహాయ మంత్రి శ్రీ జయంత్ చౌదరి భారత జట్టు ప్రదర్శనను అభినందించారు. "గ్లోబల్ స్కిల్స్ ఛాలెంజ్-2026లో భారత జట్టు 3 స్వర్ణాలు, 1 రజతం, 1 కాంస్య పతకాలను సాధించడం దేశానికి గర్వకారణం. ఇది మన స్కిల్ ఛాంపియన్లు, నిపుణులు, మార్గదర్శకులు, పారిశ్రామిక భాగస్వాముల ప్రతిభ, పట్టుదల, కృషికి నిదర్శనం. ఈ అద్భుత విజయాలతో పాటు, ప్రపంచస్థాయి ప్రమాణాలపై ఈ పోటీ అమూల్యమైన అవగాహనను కల్పించింది. షాంఘైలో జరగబోయే వరల్డ్ స్కిల్స్ పోటీకి మన సన్నాహాలను మరింత బలోపేతం చేసింది. భారత శ్రేష్ఠతను ప్రదర్శించి, నైపుణ్యం గల యువతరానికి స్ఫూర్తినిచ్చిన టీమ్ ఇండియాలోని ప్రతి సభ్యుడినీ నేను అభినందిస్తున్నాను" అని కేంద్ర మంత్రి వ్యాఖ్యానించారు.

15 మంది పోటీదారులు, 15 మంది నిపుణులతో కూడిన 30 మంది సభ్యుల భారత బృందం... అధునాతన తయారీ, డిజిటల్ సాంకేతికతలు, నిర్మాణ వ్యాపారాలు, సృజనాత్మక రంగాలు, సేవా రంగ నైపుణ్యాలను విస్తరించి 15 నైపుణ్య విభాగాల్లో దేశానికి ప్రాతినిధ్యం వహించింది. వరల్డ్ స్కిల్స్ కాంపిటీషన్ కోసం పూర్తి స్థాయి అనుకరణగా రూపొందించిన గ్లోబల్ స్కిల్స్ ఛాలెంజ్ అంతర్జాతీయ పోటీ ప్రమాణాలు, మూల్యాంకన వ్యవస్థలు, వాస్తవ-ప్రపంచ పరిస్థితుల్లో ప్రపంచంలోని అత్యుత్తమ యువ నైపుణ్యం కలిగిన నిపుణులతో పోటీపడే అవకాశాన్ని టీమ్ ఇండియాకు అందించింది. ఈ అనుభవం విలువైన ప్రపంచస్థాయి పోటీతత్వాన్ని గురించి భారత బృందానికి చక్కని అవగాహన కల్పించడం సహా, సాంకేతిక సంసిద్ధతను బలోపేతం చేసింది. ఈ ఏడాది చివర్లో షాంఘైలో జరిగే 48వ ప్రపంచ నైపుణ్యాల పోటీకి భారత్ సంసిద్ధతను మరింత పదును పెట్టింది.

పోటీ అంతటా, వరల్డ్‌స్కిల్స్ పోటీల్లో ఉపయోగించే మూల్యాంకన విధానాన్ని అనుకరిస్తూ... అంతర్జాతీయంగా గుర్తింపు పొందిన కాంపిటీషన్ ఇన్ఫర్మేషన్ సిస్టమ్‌ను ఉపయోగించి పోటీదారుల సామర్థ్యాలను అంచనా వేశారు. ఈ కార్యక్రమం భారతీయ పోటీదారులకు పోటీల ఒత్తిడిని నిర్వహించడం, అంతర్జాతీయ సాధనాలకు అనుగుణంగా మారడం, ప్రపంచస్థాయి నాణ్యత, పనితీరు ప్రమాణాలను అందుకోవడం వంటి విషయాలను గురించి ప్రత్యక్ష అనుభవాన్ని అందించింది.

3డి డిజిటల్ గేమ్ ఆర్ట్, అడిటివ్ మాన్యుఫ్యాక్చరింగ్, ఆటోమొబైల్ టెక్నాలజీ, బ్యూటీ థెరపీ, బ్రిక్‌లేయింగ్, క్లౌడ్ కంప్యూటింగ్, ఫ్లోరిస్ట్రీ, గ్రాఫిక్ డిజైన్ టెక్నాలజీ, హెయిర్‌డ్రెస్సింగ్, ఆరోగ్యం-సామాజిక సంరక్షణ, ఇండస్ట్రియల్ మెకానిక్స్, పెయింటింగ్-డెకొరేటింగ్, రెస్టారెంట్ సర్వీస్, వాల్-ఫ్లోర్ టైలింగ్, వెబ్ టెక్నాలజీస్ వంటి నైపుణ్య విభాగాల్లో భారత్ పోటీపడింది.

గ్లోబల్ స్కిల్స్ ఛాలెంజ్-2026 ఆస్ట్రేలియా వంటి నైపుణ్య పోటీల్లో సాధించిన విజయాలు... యువ భారత్ నైపుణ్యాలను ఆకాంక్షనీయంగా మార్చడంలో శక్తిమంతమైన పాత్ర పోషిస్తాయి. వాణిజ్యం, సాంకేతికత, రూపకల్పన, సేవా రంగ నైపుణ్యాల్లో రాణించడం జాతీయ గుర్తింపు, ప్రపంచవ్యాప్త అనుభవం, భవిష్యత్తుకు సిద్ధంగా ఉండే ఉద్యోగాలకు మార్గాలను సుగమం చేస్తుందని ఇది స్పష్టం చేస్తుంది.

గ్లోబల్ స్కిల్స్ ఛాలెంజ్‌లో భారత్ పాల్గొనడం ద్వారా భవిష్యత్తుకు సిద్ధంగా ఉండే శ్రామిక శక్తిని అభివృద్ధి చేయడం... భారత యువతను ప్రపంచంలోని అత్యుత్తమ నైపుణ్యం గల నిపుణుల సరసన నిలపడం అనే స్కిల్ ఇండియా మిషన్ విస్తృత దార్శనికతలో ఒక భాగం. శిక్షణా మౌలిక సదుపాయాల్లో నిరంతర పెట్టుబడులు, నిపుణుల మార్గదర్శనం, పరిశ్రమ భాగస్వామ్యాలు, అంతర్జాతీయ అనుభవం ద్వారా... ప్రపంచ వేదికపై భారత్ తన సామర్థ్యాన్ని బలోపేతం చేసుకుంటూనే ఉంది.

***