برکس چیمبر آف کامرس اینڈ انڈسٹری (برکس سی سی آئی) کے ایک وفد نے آج سائنس و ٹیکنالوجی اور ارضیاتی علوم کے مرکزی وزیرِ مملکت (آزادانہ چارج)، وزیرِ اعظم کے دفتر، عملہ، عوامی شکایات و پنشن، محکمۂ جوہری توانائی اور محکمۂ خلاء کے وزیرِ مملکت ڈاکٹر جتیندر سنگھ سے ملاقات کی۔ ملاقات کے دوران برکس اور برکس پلس کے دائرۂ کار میں اختراع، اسٹارٹ اپس، ابھرتی ہوئی ٹیکنالوجیز، تحقیقی تعاون اور صنعت کاری کے ذریعے صنعت کی قیادت میں عالمی روابط اور باہمی تعاون کو مزید مضبوط بنانے کے مختلف طریقوں پر تبادلۂ خیال کیا گیا۔

برکس سی سی آئی کے چیئرمین جناب سمیپ شاستری کی قیادت میں آنے والے وفد میں نائب چیئرمین جناب اتل بنسل، نائب چیئرپرسن محترمہ شبانہ نسیم اور چیمبر کے دیگر عہدیداران بھی شامل تھے۔ وفد کے ارکان نے وزیر کو گزشتہ ایک دہائی کے دوران تجارت میں سہولت کاری، کاروبار سے کاروبار (بی ٹو بی) روابط، خواتین کی صنعت کاری، اسٹارٹ اپ نیٹ ورکنگ، مصنوعی ذہانت، تحقیقی شراکت داری اور برکس و برکس پلس ممالک کے درمیان مختلف شعبوں میں تعاون کے فروغ کے لیے چیمبر کی جانب سے کی گئی مختلف پہلوں سے آگاہ کیا۔

ڈاکٹر جتیندر سنگھ نے کہا کہ عالمی اختراعات کے مرکز کے طور پر بھارت کی بڑھتی ہوئی شناخت اور ابھرتی ہوئی جدید ٹیکنالوجیز میں اس کی قیادت، صنعتی تنظیموں کے لیے مضبوط بین الاقوامی شراکت داریاں قائم کرنے کا ایک مثالی موقع فراہم کرتی ہے، جو قومی ترقی کے ساتھ ساتھ عالمی پیش رفت میں بھی مؤثر کردار ادا کر سکتی ہیں۔ انہوں نے کہا کہ برکس کے دائرۂ کار میں کام کرنے والے اداروں کو چاہیے کہ وہ خود کو صرف روایتی نیٹ ورکنگ پلیٹ فارمز تک محدود رکھنے کے بجائے علم، اختراع اور بامعنی شراکت داری کے ذریعے اپنی منفرد شناخت اور قدر پیدا کریں۔

بھارت کے فروغ پاتے اختراعی نظام کا ذکر کرتے ہوئے ڈاکٹر جتیندر سنگھ نے کہا کہ ملک نے خلائی سائنس، بایوٹیکنالوجی، مصنوعی ذہانت، جوہری توانائی اور گہری ٹیکنالوجی (ڈیپ ٹیک) جیسے شعبوں میں نمایاں پیش رفت کی ہے، جس سے عالمی تعاون کے نئے مواقع پیدا ہوئے ہیں۔ انہوں نے کہا کہ گزشتہ ایک دہائی کے دوران متعارف کرائی گئی اصلاحات نے ان شعبوں کو اقتصادی ترقی اور صنعت کاری کے مؤثر محرکات میں تبدیل کر دیا ہے، جس کے نتیجے میں حکومت، صنعت، تعلیمی اداروں اور اختراع کاروں کے درمیان شراکت داری کے وسیع امکانات پیدا ہوئے ہیں۔

وزیر نے کہا کہ برکس چیمبر آف کامرس اینڈ انڈسٹری (برکس سی سی آئی) جیسے صنعتی پلیٹ فارمز، بھارتی اسٹارٹ اپس اور برکس و برکس پلس ممالک کے اختراعی نظاموں کے درمیان تعاون کو فروغ دینے کے ساتھ ساتھ ٹیکنالوجی پر مبنی اقتصادی روابط کو بھی مضبوط بنانے میں اہم کردار ادا کر سکتے ہیں۔

ڈاکٹر جتیندر سنگھ نے چیمبر پر زور دیا کہ وہ شعبہ وار اجلاسوں، اختراعی فورموں اور موضوعاتی تبادلۂ خیال کے ذریعے برکس کے وسیع تر نظام کے ساتھ اپنے روابط کو مزید مستحکم کرے۔ انہوں نے کہا کہ مسلسل مؤثر موجودگی، بامعنی شمولیت اور علم پر مبنی تعمیری خدمات، برکس کے توسیع پذیر نظام کے ساتھ بھارت کے روابط کو فروغ دینے میں چیمبر کے کردار کو مزید مضبوط بنائیں گی۔

وزیر نے چیمبر کو یہ بھی دعوت دی کہ وہ بھارت کی سائنسی اور تکنیکی ترجیحات سے ہم آہنگ تعاون کے مخصوص شعبوں کی نشاندہی کرے اور ہر شعبے سے متعلق ٹھوس تجاویز تیار کرے، تاکہ متعلقہ سرکاری محکموں اور اداروں کے ساتھ مؤثر اور نتیجہ خیز تعاون کو فروغ دیا جا سکے۔ انہوں نے کہا کہ اسٹارٹ اپس، بایوٹیکنالوجی، خلائی ٹیکنالوجیز، اختراعی نظام اور سرکاری و نجی شعبوں کی شراکت داری جیسے شعبے باہمی مفاد پر مبنی تعاون کے بے شمار مواقع فراہم کرتے ہیں۔

برکس چیمبر آف کامرس اینڈ انڈسٹری (برکس سی سی آئی) نے برکس اور برکس پلس کے دائرۂ کار میں صنعت کاری، اختراع، تجارت میں سہولت کاری، خواتین کی قیادت میں قائم کاروباری اداروں، تحقیقی تعاون اور کاروباری روابط کے فروغ کے لیے اپنی جاری سرگرمیوں سے بھی آگاہ کیا۔ ایک دہائی سے زائد عرصہ قبل قائم ہونے والے اس چیمبر نے بین الاقوامی تجارتی فورموں، شعبہ جاتی مکالموں اور رکن و شراکت دار ممالک کے کاروباری اداروں، تعلیمی و تحقیقی اداروں اور دیگر متعلقہ فریقوں پر مشتمل اشتراکی پلیٹ فارموں کے ذریعے اپنے روابط اور سرگرمیوں کو نمایاں طور پر وسعت دی ہے۔

******

(ش ح ۔ م م۔م ا(

UR.No-9308