سائنس اور تکنالوجی، ارضیاتی سائنس کے مرکزی وزیر مملکت (آزادانہ چارج)، اور وزیر اعظم کے دفتر، عملہ، عوامی شکایات، پنشن، ایٹمی توانائی اور خلاء کے وزیر مملکت، ڈاکٹر جتیندر سنگھ نے آج عالمی نمو کے آئندہ محاذ کے طور پر ’’برکس خلائی معیشت‘‘ پر زور دیا اور اختراع، سرمایہ کاری، صنعت کاری اور پائیدار ترقی میں نئے مواقع واشگاف کرنے کے لیے رکن ممالک کے درمیان اجتماعی کارروائی کی اپیل کی۔

برکس کی ہیڈس آف اسپیس ایجنسیز (ایچ او ایس اے) کی میٹنگ  کے اختتامی اجلاس سے خطاب کرتے ہوئے، ڈاکٹر جتیندر سنگھ نے کہا کہ برکس ممالک کے پاس تیزی سے پھیلتی ہوئی عالمی خلائی معیشت میں ایک بڑی طاقت کے طور پر ابھرنے کے لیے درکار پیمانے، سائنسی صلاحیتیں، تکنیکی طاقت اور صنعتی صلاحیت موجود ہے۔

ڈاکٹر جتیندر سنگھ نے کہا، ’’ خلائی معیشت کا مستقبل تنہائی میں کام کرنے والی قوموں کے ذریعہ تشکیل نہیں دیا جائے گا۔ اس کی تشکیل شراکت داری، مشترکہ جدت اور اجتماعی عزائم سے ہوگی۔ برکس ممالک اس ابھرتے ہوئے عالمی خلائی ماحولیاتی نظام کے مضبوط ترین ستونوں میں سے ایک بننے کی صلاحیت رکھتے ہیں۔‘‘

وزیر موصوف نے بھارتی خلائی صنعت کا تعارفی کتابچہ بھی جاری کیا، میٹنگ میں شریک خلائی ایجنسیوں کے سربراہان کے ساتھ یادگاریں ساجھا کیں اور  بھارت کے تیز ترین رفتار سے نمو پزیر نیو اسپیس شعبے کے نمائندوں سے بات چیت کی۔ اس بات چیت سے مہمان برکس وفود کے سامنے بھارت کے خلائی اسٹارٹ اپس اور نجی صنعتوں کی افزوں صلاحیتوں کی نمائش ہوئی۔

بھارت کی برکس صدارت 2026 کے تحت انڈین اسپیس ریسرچ آرگنائزیشن (اسرو) کی میزبانی میں منعقدہ اس دو روزہ اجلاس میں برازیل، چین، مصر، ایتھوپیا، انڈونیشیا، ایران، روس، جنوبی افریقہ اور متحدہ عرب امارات کی خلائی ایجنسیوں کے سربراہان اور اعلیٰ حکام نے شرکت کی۔ اسرو کے چیئرمین اور محکمۂ خلائی امور کے سیکریٹری ڈاکٹر وی نارائنن، ان اسپیس کے چیئرمین ڈاکٹر پون گوئنکا، محکمۂ خلائی امور کے سینئر حکام، بھارتی خلائی صنعتوں کے نمائندوں اور نیو اسپیس  اسٹارٹ اپس نے بھی اختتامی سیشن میں حصہ لیا۔

میٹنگ میں برکس خلائی تعاون میں پیشرفت کا جائزہ لیا گیا اور خلائی استحکام، ملبے سے مبرا مشن، برکس ریموٹ سینسنگ سیٹلائٹ نکشتر (آر ایس ایس سی) کو مضبوط بنانے، موجودہ تعاون کے طریقہ کار میں نئے برکس اراکین کی شرکت کو بڑھانے اور مجوزہ برکس اسپیس کونسل پر بات چیت کو آگے بڑھانے سمیت اہم امور پر غور کیا گیا۔ بات چیت میں ڈیزاسٹر مینجمنٹ، زمین کے مشاہدے، صلاحیت کی تعمیر اور علم کے اشتراک میں مستقبل کے تعاون کا بھی احاطہ کیا گیا۔

ڈاکٹر جتیندر سنگھ نے کہا کہ خلائی ٹیکنالوجی اقتصادی تبدیلی اور سماجی ترقی کے سب سے طاقتور محرکوں میں سے ایک کے طور پر ابھری ہے، جس نے ممالک کو مواصلاتی نیٹ ورکس، نیوی گیشن سسٹم، آفات سے نمٹنے، زراعت، حفظانِ صحت، تعلیم اور ماحولیاتی نگرانی کو مضبوط بنانے کے قابل بنایا ہے۔ انہوں نے کہا کہ موسمیاتی تبدیلی، قدرتی آفات، خوراک اور پانی کی حفاظت، ماحولیاتی انحطاط اور پائیدار اربنائزیشن جیسی چنوتیوں کو تیزی سے جدید خلائی تکنالوجیوں کے تعاون سے اجتماعی حل کی ضرورت ہے۔

عالمی خلائی منظر نامے میں برکس کے بڑھتے ہوئے کردار کا حوالہ دیتے ہوئے، وزیر نے کہا کہ یہ گروپنگ دنیا کی آبادی، اقتصادی پیداوار، سائنسی مہارت اور تکنیکی صلاحیتوں کے ایک اہم حصہ کی نمائندگی کرتی ہے۔ انہوں نے کہا کہ برکس ممالک کے درمیان گہرا تعاون مشترکہ ترقیاتی ترجیحات کو حل کرتے ہوئے اختراعات، صنعتی شراکت داری، تکنالوجی کی منتقلی، سرمایہ کاری اور اقتصادی ترقی کے نئے مواقع پیدا کر سکتا ہے۔

ڈاکٹر جتیندر سنگھ نے کہا کہ برکس ریموٹ سینسنگ سیٹلائٹ نکشتر پہلے ہی ممبر ممالک کے درمیان سیٹلائٹ ڈیٹا شیئرنگ کے ذریعے باہمی خلائی ایپلی کیشنز کی قدر کا مظاہرہ کر چکا ہے۔ انہوں نے اس اعتماد کا اظہار کیا کہ مجوزہ برکس اسپیس کونسل سمیت ادارہ جاتی میکانزم پر جاری بات چیت، خلائی شعبے میں مستقبل کے تعاون کو مزید رفتار اور تسلسل فراہم کرے گی۔

محترم وزیر نے کہا کہ ہندوستان کے خلائی پروگرام نے مسلسل اس بات کو یقینی بنانے پر توجہ مرکوز کی ہے کہ خلائی تکنالوجی کے فوائد عام شہریوں تک پہنچیں۔ وزیر اعظم جناب نریندر مودی کے وژن کی رہنمائی میں، ہندوستان کے خلائی شعبے نے تبدیلی کی اصلاحات کی ہیں جنہوں نے نجی صنعت، اسٹارٹ اپس، اکیڈمی اور عالمی شراکت داری کے لیے بے مثال مواقع کھولے ہیں، جس کے نتیجے میں دنیا کے سب سے زیادہ متحرک اور تیزی سے پھیلتے ہوئے خلائی ماحولیاتی نظام میں سے ایک ہے۔

ڈاکٹر جتیندر سنگھ نے کہا کہ ہندوستان کی کامیابیوں جیسے چندریان-3، آدتیہ-ایل1 اور گگنیان مشن کی مسلسل پیشرفت نے نہ صرف سائنس اور ٹیکنالوجی کی سرحدوں کو وسعت دی ہے بلکہ جدید خلائی تحقیق اور ایپلی کیشنوں میں بین الاقوامی تعاون کے لیے نئی راہیں بھی پیدا کی ہیں۔

پائیداری کی اہمیت پر زور دیتے ہوئے ڈاکٹر جتیندر سنگھ نے کہا کہ خلائی سرگرمیوں کا طویل مدتی مستقبل بیرونی خلا کو محفوظ، محفوظ اور پائیدار ڈومین کے طور پر محفوظ کرنے پر منحصر ہے۔ انہوں نے بڑھتی ہوئی خلائی ٹریفک اور مداری ملبے سے پیدا ہونے والی چنوتیوں سے نمٹنے کے لیے وسیع تر بین الاقوامی تعاون، شفافیت، ذمہ دارانہ رویے اور صلاحیت کی تعمیر پر زور دیا۔ انہوں نے ملاقات کے دوران ملبے سے مبرا مشن اور پائیدار خلائی آپریشنز پر ہونے والی بات چیت کا خیرمقدم کیا جو آئندہ نسلوں کے لیے خلائی ماحول کے تحفظ کی جانب اہم اقدامات ہیں۔

تعاون کی مزید اولوالعزم تصوریت پر زور دیتے ہوئے، ڈاکٹر جتیندر سنگھ نے کہا کہ بھارت برکس خلائی مصروفیت کا تصور کرتا ہے جو کوآرڈینیشن سے مل کر تخلیق تک پہنچتا ہے۔

انہوں نے کہا، ’’برکس ممالک کو مشاورت سے آگے بڑھ کر مشترکہ ترقی، مشترکہ اختراع اور مشترکہ تخلیق کی جانب کام کرنا چاہیے۔ اپنے سائنسدانوں، انجینئرز، صنعتوں، اسٹارٹ اپس اور نوجوان اختراع کاروں کو اکٹھا کر کے، ہم عالمی چنوتیوں کے لیے حل تیار کر سکتے ہیں، نئے اقتصادی مواقع پیدا کر سکتے ہیں اور سائنسی ترقی اور مشترکہ خوشحالی کے لیے ایک مضبوط فریم ورک بنا سکتے ہیں۔‘‘

محترم وزیر نے ساجھا امنگوں کو ٹھوس نتائج میں تبدیل کرنے کے لیےاور اس امر کو یقینی بنانے کے لیے کہ خلاء کا شعبہ  ترقی، مضبوطی، اختراع، پائیداری اور بین الاقوامی تعاون کے لیے ایک مضبوط وسیلہ  بنا رہے، تمام تر برکس شراکت داروں کے ساتھ قریبی تال میل بناکر کام کرنے کی بھارت کی عہدبستگی کا اعادہ کیا۔

***

 (ش ح –ا ب ن)

U.No:9143