২০২৬ চনৰ দ্বাদশ আন্তঃৰাষ্ট্ৰীয় যোগ দিৱস উদযাপনৰ অৰ্থে আজি নতুন দিল্লীৰ নেচনেল মিডিয়া চেণ্টাৰত এক যোগ সন্মিলনৰ আয়োজন কৰা হয়। তথ্য আৰু সম্প্ৰচাৰ মন্ত্ৰালয়ৰ সচিব শ্ৰী চঞ্চল কুমাৰে এই উদযাপনৰ নেতৃত্ব দিয়ে। অনুষ্ঠানত তথ্য আৰু সম্প্ৰচাৰ মন্ত্ৰালয় তথা প্ৰেছ ইনফৰমেচন ব্যুৰ’ৰ অন্যান্য বিষয়া আৰু কৰ্মচাৰীসকলে অংশগ্ৰহণ কৰে। দ্বাদশ আন্তঃৰাষ্ট্ৰীয় যোগ দিৱসৰ মূল বিষয়বস্তু “সুস্থ বাৰ্ধক্যৰ বাবে যোগ” ৰ সৈতে সংগতি ৰাখি এই অনুষ্ঠানটোৰ আয়োজন কৰা হয়।

এই উপলক্ষে ভাষণ প্ৰদান কৰি তথ্য আৰু সম্প্ৰচাৰ মন্ত্ৰালয়ৰ সচিব শ্ৰী চঞ্চল কুমাৰে গুৰুত্ব আৰোপ কৰে যে যোগাভ্যাস কেৱল এক বাৰ্ষিক উদযাপনৰ মাজতে সীমাবদ্ধ থাকিব নালাগে, বৰঞ্চ ইয়াক দৈনন্দিন জীৱনৰ এক অবিচ্ছেদ্য অংগ হিচাপে গ্ৰহণ কৰা উচিত। তেওঁ উল্লেখ কৰে যে শৰীৰৰ সৰ্বাংগীণ বিকাশৰ বাবে নিয়মিতভাৱে কৰা যোগাভ্যাস অপৰিহাৰ্য আৰু ই ব্যক্তিগত তথা বৃত্তিগত দুয়োটা ক্ষেত্ৰৰ কল্যাণতে গুৰুত্বপূৰ্ণ অৱদান যোগায়। যোগ সকলো বৃত্তি আৰু বয়সৰ লোকৰ বাবে প্ৰাসংগিক বুলি উল্লেখ কৰি তেওঁ নাগৰিকসকলক ইয়াৰ মূল্যবোধসমূহ গ্ৰহণ কৰিবলৈ আৰু কেৱল এটা বিশেষ অনুষ্ঠানতে ইয়াক আৱদ্ধ নাৰাখি প্ৰতিদিনে অভ্যাস কৰিবলৈ আহ্বান জনায়।

প্ৰশিক্ষিত যোগ প্ৰশিক্ষকৰ নেতৃত্বত পৰিচালিত এই সন্মিলনখনত বিভিন্ন আসন, প্ৰাণায়াম আৰু ধ্যানৰ প্ৰদৰ্শন অন্তৰ্ভুক্ত আছিল। অংশগ্ৰহণকাৰীসকলে অত্যন্ত উৎসাহেৰে ‘কমন য়োগ প্ৰট’কল’ অনুসৰি পৰিচালিত কাৰ্যসূচীসমূহত অংশগ্ৰহণ কৰে আৰু স্বাস্থ্য তথা সুস্থতাৰ প্ৰতি তেওঁলোকৰ দায়বদ্ধতা পুনৰ প্ৰকাশ কৰে।

২০১৪ চনত প্ৰধানমন্ত্ৰী শ্ৰী নৰেন্দ্ৰ মোদীয়ে আগবঢ়োৱা এটা প্ৰস্তাৱৰ ভিত্তিত ৰাষ্ট্ৰসংঘৰ সাধাৰণ সভাই ইয়াক গ্ৰহণ কৰাৰ পিছৰে পৰা প্ৰতি বছৰে ২১ জুন দিনটো আন্তঃৰাষ্ট্ৰীয় যোগ দিৱস হিচাপে পালন কৰি অহা হৈছে। বিগত বৰ্ষসমূহত এই উদযাপন এক গোলকীয় আন্দোলনলৈ ৰূপান্তৰিত হৈছে, যিয়ে শাৰীৰিক সুস্থতা, মানসিক দৃঢ়তা আৰু সামগ্ৰিক স্বাস্থ্য ৰক্ষাত যোগৰ গুৰুত্বক আলোকপাত কৰে।

****

Mahesh Kumar/ Vivek Vishwash/DB