سائنس اور ٹیکنالوجی ، ارضیاتی علوم کے مرکزی وزیر مملکت (آزادانہ چارج) اور پی ایم او ، عملہ ، عوامی شکایات ، پنشن ، جوہری توانائی اور خلا کے وزیر مملکت ڈاکٹر جتیندر سنگھ نے آج کرتویہ بھون ، نئی دہلی میں آئی اے ایس ای-سول لسٹ 2026 کا اجرا کیا ۔

حکمرانی (گورننس )میں ٹیکنالوجی کے بڑھتے ہوئے کردار پر زور دیتے ہوئے وزیر نے کہا کہ ای-سول لسٹ جیسے ڈیجیٹل پلیٹ فارم انتظامی منصوبہ بندی، صلاحیتوں کی پہچان اور ملک بھر میں انسانی وسائل کے مؤثر استعمال کے لیے اہم ذرائع بن کر ابھرے ہیں۔ انہوں نے کہا کہ افسران کی تعلیمی قابلیت، تجربے، کیڈر اور تقرریوں سے متعلق معلومات تک آسان رسائی حکومتوں اور اداروں کو باخبر فیصلے کرنے میں مدد دیتی ہے اور مجموعی نظامِ حکمرانی کو مزید مضبوط بناتی ہے۔

ڈاکٹر جتیندر سنگھ نے کہا کہ سول لسٹ محض افسران کی فہرست تک محدود نہیں رہی بلکہ آج یہ حکومتوں، اداروں اور متعلقہ فریقوں کے لیے ایک متحرک معلوماتی وسیلہ بن چکی ہے۔ انہوں نے اس کی جدید سرچ اور ہائپر لنکنگ خصوصیات کا حوالہ دیتے ہوئے کہا کہ ڈیجیٹل فارمیٹ صارفین کو افسران کی پیشہ ورانہ پس منظر، شعبہ جاتی مہارت اور تجربے کی بنیاد پر شناخت کرنے کی سہولت فراہم کرتا ہے، جس سے بہتر انتظامی منصوبہ بندی اور پالیسیوں کے مؤثر نفاذ میں مدد ملتی ہے۔

وزیر نے کہا کہ محکمۂ عملہ و تربیت (ڈی او پی ٹی) ریاستی حکومتوں اور مختلف کیڈروں کے اشتراک سے ہر سال ڈیٹا بیس کو اپ ڈیٹ اور برقرار رکھنے کے لیے وسیع پیمانے پر کوششیں کرتا ہے۔ انہوں نے کہا کہ یہ اقدام حکمرانی کے عمل کو بہتر بنانے کے لیے ٹیکنالوجی کے مؤثر استعمال کے تئیں حکومت کے عزم کی عکاسی کرتا ہے، جبکہ اس کے ذریعے کارکردگی، معلومات تک رسائی اور شفافیت کو بھی فروغ ملتا ہے۔

اعداد و شمار پر مبنی حکمرانی کی اہمیت کو اجاگر کرتے ہوئے ڈاکٹر جتیندر سنگھ نے انڈین ایڈمنسٹریٹو سروس (آئی اے ایس) کی کیڈر قوت کی موجودہ صورتحال کا جائزہ لیا اور ریاستوں و مرکز کی بدلتی ہوئی افرادی قوت کی ضروریات پر تبادلۂ خیال کیا۔ انہوں نے کہا کہ مختلف شعبوں اور خطوں میں حکمرانی کی ذمہ داریاں مسلسل بڑھ رہی ہیں، جس کے باعث انسانی وسائل کی مؤثر منصوبہ بندی کی اہمیت بھی بڑھتی جا رہی ہے۔ انہوں نے یقین ظاہر کیا کہ ضروریات کے مسلسل جائزے اور کیڈر کے باقاعدہ معائنے سے ابھرتی ہوئی ضروریات کو پورا کرنے اور انتظامی صلاحیت کو مزید مضبوط بنانے میں مدد ملے گی۔

ڈاکٹر جتیندر سنگھ نے حکمرانی کے نظام وضع کرتے وقت بھارت کے وسیع جغرافیائی اور ترقیاتی تنوع کو مدِنظر رکھنے کی اہمیت پر بھی زور دیا۔ انہوں نے کہا کہ انتظامی ضروریات اکثر مختلف خطوں میں نمایاں طور پر مختلف ہوتی ہیں، خصوصاً پہاڑی، دور دراز اور جغرافیائی طور پر دشوار علاقوں میں، اس لیے حکمرانی کے حل مقامی حالات اور ضروریات کے مطابق لچکدار اور مؤثر ہونے چاہییں۔ انہوں نے مزید کہا کہ ٹیکنالوجی سے تقویت یافتہ ڈیٹا بیس حکومتوں کو مختلف ترقیاتی ضروریات کے لیے موزوں مہارت اور انتظامی تجربے کی حامل افرادی قوت کی شناخت میں اہم کردار ادا کر سکتے ہیں۔

وزیر نے مزید کہا کہ مطبوعہ اشاعتوں سے ڈیجیٹل پلیٹ فارموں  کی جانب منتقلی مکمل طور پر ڈیجیٹل انڈیا کے وژن سے ہم آہنگ ہے اور عوامی انتظامیہ کو جدید بنانے کے لیے حکومت کی وسیع تر کوششوں کی عکاسی کرتی ہے۔ انہوں نے کہا کہ ڈیجیٹلائزیشن نہ صرف معلومات تک رسائی اور کارکردگی کو بہتر بناتی ہے بلکہ عوامی وسائل کے بہترین اور مؤثر استعمال کو بھی فروغ دیتی ہے۔

آئی اے ایس ای-سول لسٹ 2026 کا اجرا محکمۂ عملہ و تربیت کی سیکریٹری محترمہ رچنا شاہ، اسٹیبلشمنٹ آفیسر و ایڈیشنل سیکریٹری جناب منیش سکسینہ، ایڈیشنل سیکریٹری (سروسز و ویجیلنس) جناب فیض احمد قدوائی، ایڈیشنل سیکریٹری (پرسنل پالیسی) جناب منوج کمار دویدی اور محکمہ کے دیگر سینئر افسران کی موجودگی میں کیا گیا۔

آئی اے ایس ای-سول لسٹ 2026 سول لسٹ کا 71واں ایڈیشن ہے اور پی ڈی ایف فارمیٹ میں ای-بک کے طور پر جاری کیا جانے والا چھٹا ایڈیشن ہے۔ جدید سرچ سہولیات اور ہائپر لنکنگ خصوصیات سے لیس یہ ای-سول لسٹ ایک بٹن کے کلک پر معلومات تک تیز اور آسان رسائی فراہم کرتی ہے۔

اس اشاعت میں آئی اے ایس افسران سے متعلق جامع معلومات شامل ہیں، جن میں ان کا بیچ، کیڈر، موجودہ تقرری، تنخواہ کا درجہ، تعلیمی قابلیت اور تاریخِ سبکدوشی شامل ہیں۔ اس کے علاوہ اس میں کیڈر وار تعداد، آئندہ پانچ برسوں کے دوران ریٹائر ہونے والے افسران کی تعداد، اور 1969 سے سول سروسز امتحان کے ذریعے مقرر کیے گئے آئی اے ایس افسران کی تعداد سے متعلق معلومات بھی فراہم کی گئی ہیں۔

ای-بک کی اشاعت نے محکمۂ عملہ و تربیت کو سول لسٹ کی ضخیم مطبوعہ نقول شائع کرنے کے روایتی طریقۂ کار سے ہٹنے کا موقع فراہم کیا ہے۔ یہ اقدام حکومت کے ڈیجیٹل انڈیا مشن کو تقویت دیتا ہے، جبکہ مطبوعہ اشاعت پر ہونے والے اخراجات میں کمی لانے اور عوامی وسائل کے زیادہ مؤثر استعمال کو یقینی بنانے میں بھی معاون ثابت ہوتا ہے۔

محکمۂ عملہ و تربیت، جو انڈین ایڈمنسٹریٹو سروس (آئی اے ایس) کے لیے کیڈر کنٹرولنگ اتھارٹی ہے، ریاستی کیڈروں سے موصول ہونے والی معلومات اور مرکز میں دستیاب اعداد و شمار کی بنیاد پر سول لسٹ تیار کرتا ہے۔ یکم جنوری 2026 تک 7,026 کی منظور شدہ کیڈر قوت کے مقابلے میں 25 کیڈروں میں مجموعی طور پر 5,755 آئی اے ایس افسران خدمات انجام دے رہے تھے۔

ای-آئی اے ایس سول لسٹ 2026 محکمہ عملہ اور تربیت کی ویب سائٹ https://dopt.gov.in پر دستیاب ہے ۔

تصویر: مرکزی وزیر ڈاکٹر جتیندر سنگھ پیر کے روز نئی دہلی کے کرتویہ بھون-3 میں آئی اے ایس ای-سول لسٹ 2026 کا اجرا کرنے کے بعد خطاب کر رہے ہیں۔

********

) ش ح ۔ ش آ۔ن ع)

U.No. 9051

 

(रिलीज़ आईडी: 2276771) आगंतुक पटल : 11