19મા મુંબઈ ઇન્ટરનેશનલ ફિલ્મ ફેસ્ટિવલમાં ઇન્ડિયન ડોક્યુમેન્ટ્રી પ્રોડ્યુસર્સ એસોસિએશન ઓપન ફોરમના ભાગરૂપે, “સ્ટ્રીમિંગ રેવલ્યુશન: ડોક્યુમેન્ટિંગ ઇન ધ એજ ઓફ ઓટીટી” વિષય પર યોજાયેલા એક સત્રમાં ઓટીટી, મીડિયા અને ડોક્યુમેન્ટ્રી ક્ષેત્રના નિષ્ણાતો એકસાથે આવ્યા હતા, જેમાં સ્ટ્રીમિંગ પ્લેટફોર્મ્સ કેવી રીતે ડોક્યુમેન્ટ્રી ફિલ્મ નિર્માણમાં પરિવર્તન લાવી રહ્યા છે અને ફિલ્મ નિર્માતાઓ માટે નવી તકો ઊભી કરી રહ્યા છે તે અંગે ચર્ચા કરવામાં આવી હતી.

આ પેનલમાં શેમારુના બિઝનેસ હેડ કિન્નરી દવે; વોર્નર બ્રધર્સ ડિસ્કવરી સાઉથ એશિયાના કન્ટેન્ટ હેડ સાઈ અભિષેક; વરિષ્ઠ પત્રકાર, લેખક અને પદ્મશ્રી પુરસ્કાર વિજેતા રમેશ પતંગે; અને અનુભવી સિનેમેટોગ્રાફર અને ફિલ્મ નિર્માતા ધરમ ગુલાટી સામેલ હતા. આ સત્રનું સંચાલન ફિલ્મ નિર્માતા લલિત વાચાની દ્વારા કરવામાં આવ્યું હતું.

ચર્ચામાં એ બાબત પર ધ્યાન કેન્દ્રિત કરવામાં આવ્યું હતું કે કેવી રીતે ઓટીટી પ્લેટફોર્મ્સે ફિલ્મોને ફેસ્ટિવલો, ફિલ્મ સોસાયટીઓ અને પબ્લિક બ્રોડકાસ્ટર્સથી આગળ લઈ જઈને ભારત અને સમગ્ર વિશ્વમાં વ્યાપક દર્શકો સુધી પહોંચાડીને ડોક્યુમેન્ટ્રી વિતરણમાં પરિવર્તન આવ્યું છે. પેનલના સભ્યો એ વાત પર સહમત થયા હતા કે સ્ટ્રીમિંગ પ્લેટફોર્મ્સે ફિલ્મ નિર્માતાઓ માટે તેમની કૃતિઓ પ્રદર્શિત કરવા અને દર્શકો સાથે સીધા જોડાવા માટે નવી તકો ઊભી કરી છે.

સાઈ અભિષેકે જણાવ્યું હતું કે ડોક્યુમેન્ટ્રીઝ વોર્નર બ્રધર્સ ડિસ્કવરીની કન્ટેન્ટ વ્યૂહરચનાનો એક મહત્વપૂર્ણ ભાગ બની રહી છે. તેમણે નોંધ્યું હતું કે ઇતિહાસ, પૌરાણિક કથાઓ, સાહસ, જીવનચરિત્ર અને સાચી ગુનાહિત ઘટનાઓ જેવી શૈલીઓ દર્શકોમાં મજબૂત રસ જગાવી રહ્યા છે. તેમણે ઉમેર્યું હતું કે પ્લેટફોર્મ્સ મૂળ વાર્તાઓ, અનન્ય પહોંચ અને તાજા પરિપ્રેક્ષ્યો શોધી રહ્યા છે, ખાસ કરીને ભારતની એવી વાર્તાઓ જે વૈશ્વિક દર્શકોને આકર્ષિત કરી શકે.

કિન્નરી શાહે બદલાતી દર્શકોની પસંદગીઓને સમજવાના મહત્વ પર પ્રકાશ પાડ્યો હતો. તેમણે જણાવ્યું હતું કે દર્શકો આજે આકર્ષક વાર્તા કહેવાની શૈલી (સ્ટોરીટેલિંગ) ની અપેક્ષા રાખે છે અને ફિલ્મ નિર્માતાઓએ તેમની વાર્તાઓની પ્રમાણિકતા જાળવી રાખીને બદલાતી જોવાની આદતોને અનુરૂપ થવું જોઈએ. તેમણે ડોક્યુમેન્ટ્રી નિર્માતાઓને નવીન વિચારો સાથે ઓટીટી પ્લેટફોર્મ્સનો સક્રિયપણે સંપર્ક કરવા માટે પણ પ્રોત્સાહિત કર્યા હતા.

ધરમ ગુલાટીએ ડોક્યુમેન્ટ્રીઝ માટે વધુ દૃશ્યતાની જરૂરિયાત પર ભાર મૂક્યો હતો. તેમણે અવલોકન કર્યું કે ઘણી પ્રશંસાપાત્ર ડોક્યુમેન્ટ્રી ફિલ્મોને આંતરરાષ્ટ્રીય ફેસ્ટિવલોમાં માન્યતા મળે છે પરંતુ તેઓ અવારનવાર ભારતમાં વ્યાપક વિતરણ અને દર્શકો મેળવવા માટે સંઘર્ષ કરે છે.

ડોક્યુમેન્ટ્રીઝની સામાજિક ભૂમિકા વિશે વાત કરતા રમેશ પતંગેએ જણાવ્યું હતું કે તેઓ મહાન વિભૂતિઓના જીવન અને યોગદાન વિશે લોકોને શિક્ષિત કરવા માટેનું એક મહત્વપૂર્ણ માધ્યમ છે. તેમણે નોંધ્યું હતું કે ડોક્યુમેન્ટ્રીઝ ઇતિહાસને સાચવવામાં, સામાજિક જાગૃતિને પ્રોત્સાહન આપવામાં અને યુવા પેઢીને ભારતની સાંસ્કૃતિક વિરાસત અને રાષ્ટ્રીય મૂલ્યોથી પરિચિત કરાવવામાં મદદ કરે છે.

આ સત્ર સ્ટોરીટેલિંગ, વિતરણ, દર્શકોની ભાગીદારી અને ઓટીટી યુગમાં ડોક્યુમેન્ટ્રી ફિલ્મ નિર્માણના ભવિષ્ય પર એક ઇન્ટરેક્ટિવ ચર્ચા સાથે સમાપ્ત થયું હતું.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com