ریلوے کے مرکزی وزیر جناب اشونی ویشنو نے کل سینئر ریلوے حکام کے ساتھ ایک جائزہ اجلاس منعقد کیا، جس میں اسٹیشن ماسٹروں کو درپیش مسائل اور چیلنجز پر بات چیت کی گئی اور ایک جامع فریم ورک پر غور کیا گیا جس کا مقصد انہیں بااختیار بنانا ہے تاکہ بھارتی ریلوے کے پورے نیٹ ورک میں محفوظ، زیادہ مؤثر اور مسافروں پر مرکوز ریلوے آپریشنز کو یقینی بنایا جا سکے۔

اسٹیشن ماسٹر محفوظ ٹرین آپریشنز کو یقینی بنانے، متعدد شعبوں کے ساتھ رابطہ قائم رکھنے، مسافروں کی سہولیات کا انتظام کرنے اور ریلوے اسٹیشنوں کے ہموار کام کو برقرار رکھنے میں ایک اہم کردار ادا کرتے ہیں۔ جائزے کے دوران اسٹیشن ماسٹروں کو روزمرہ کے کام میں درپیش عملی اور انتظامی چیلنجز کی نشاندہی اور ان کے مؤثر حل تیار کرنے پر تفصیلی تبادلہ خیال کیا گیا تاکہ ان کی کارکردگی کو مزید مضبوط بنایا جا سکے۔

اجلاس میں اسٹیشن ماسٹروں کے کردار کو مزید مستحکم بنانے پر بھی گفتگو کی گئی۔ اس کے علاوہ انتظامی اور عملی اختیارات میں اضافہ، کیریئر میں ترقی کے بہتر مواقع اور اعلیٰ انتظامی سطح تک پہنچنے کے مزید امکانات سے متعلق تجاویز کا بھی جائزہ لیا گیا۔ ان اقدامات کا مقصد اسٹیشن ماسٹروں کو اس قابل بنانا ہے کہ وہ تیز تر فیصلے کر سکیں، مسافروں کو بہتر خدمات فراہم کریں اور اسٹیشن کے بنیادی ڈھانچے، عملے کے دفاتر، رہائشی کالونیوں اور دیگر متعلقہ سہولیات کی مؤثر نگرانی کر سکیں۔

بڑھتی ہوئی عملی ضروریات کو مدنظر رکھتے ہوئے، ایسے حصوں میں جہاں ٹریک کی تعداد زیادہ ہے اور ٹریفک کی شدت و پیچیدگی میں نمایاں اضافہ ہوا ہے، اضافی اسٹیشن ماسٹروں کی فراہمی پر بھی غور کیا گیا۔ اسٹیشن ماسٹر کیڈر میں خالی آسامیوں کو جلد از جلد پُر کرنے کی ضرورت پر بھی زور دیا گیا اور ان آسامیوں کو ترجیحی بنیادوں پر بھرنے پر اتفاق کیا گیا۔

کارکردگی کو بہتر بنانے میں ٹیکنالوجی کی اہمیت کو تسلیم کرتے ہوئے اسٹیشن ماسٹروں کے لیے موبائل ایپ پر مبنی پیپر لیس ورکنگ سسٹمز متعارف کرانے پر بھی غور کیا گیا۔ اجلاس میں ایک مربوط اسٹیشن مینجمنٹ سسٹم کی تیاری کا بھی جائزہ لیا گیا جو ریلوے کے مختلف شعبوں کے درمیان بہتر رابطہ کاری کو ممکن بنائے گا اور اسٹیشنوں پر مسافروں سے متعلق مسائل کے تیز تر حل میں مدد دے گا۔

ریلوے وزیر نے جدید مہارتوں کی ترقی اور صلاحیت سازی کی اہمیت پر زور دیا۔ حکام نے تربیتی طریقۂ کار کو اپ گریڈ کرنے کے لیے ورچوئل رئیلٹی، سمیولیٹرز اور دیگر جدید تربیتی ٹیکنالوجیز کے استعمال پر بھی گفتگو کی تاکہ اسٹیشن ماسٹروں کو بڑھتی ہوئی پیچیدہ ریلوے آپریشنز اور ہنگامی حالات سے بہتر طور پر نمٹنے کے لیے تیار کیا جا سکے۔

مقامی مسائل کے فوری حل اور مسافروں کی سہولت میں بہتری کے لیے اسٹیشن ماسٹروں کے مالی اختیارات میں اضافے سے متعلق تجاویز کا بھی جائزہ لیا گیا۔ اسٹیشن سطح پر زیادہ بااختیاری سے بروقت دیکھ بھال، مسافروں کی ضروریات پر تیز ردعمل اور اسٹیشن مینجمنٹ میں بہتری متوقع ہے۔

اجلاس میں اسٹیشن ماسٹروں کے لیے کیریئر میں ترقی کے بہتر مواقع بڑھانے کے اقدامات کا بھی جائزہ لیا گیا، تاکہ انہیں بھارتی ریلوے میں اعلیٰ انتظامی اور قائدانہ عہدوں تک زیادہ رسائی حاصل ہو سکے۔ گفتگو کا مرکز یہ تھا کہ اس اہم عملی شعبے میں کام کرنے والے ملازمین کے لیے ایک زیادہ حوصلہ افزا اور ترقی پر مبنی ورکنگ ماحول پیدا کیا جائے۔

حفاظت سے متعلق امور پر بھی تفصیلی غور کیا گیا۔ اسٹیشنوں پر بہتر حفاظتی ساز و سامان اور استعمال میں آسان آلات فراہم کرنے پر بات چیت ہوئی، خاص طور پر ریلوے آپریشنز میں خواتین اسٹیشن ماسٹروں اور خواتین پوائنٹس مین کی بڑھتی ہوئی شمولیت کو مدنظر رکھتے ہوئے۔ اس کا مقصد یہ ہے کہ فرنٹ لائن ریلوے عملے کے لیے زیادہ محفوظ، قابل رسائی اور مؤثر کام کے حالات کو یقینی بنایا جا سکے۔

جائزہ اجلاس میں زیرِ بحث آنے والے اقدامات بھارتی ریلوے کے اس عزم کی عکاسی کرتے ہیں کہ اسٹیشن ماسٹروں کو بہتر افرادی قوت، جدید ٹیکنالوجی، بہتر تربیت اور زیادہ فیصلہ سازی کے اختیارات فراہم کیے جائیں، تاکہ ملک بھر میں لاکھوں مسافروں کے لیے ایک زیادہ مؤثر، ذمہ دار اور مستقبل کے تقاضوں سے ہم آہنگ اسٹیشن مینجمنٹ نظام تشکیل دیا جا سکے۔

***

ش ح۔ ش ت ۔م الف

U. No. 8880