بھارت کے اناج ذخیرہ کرنے کے نظام کو جدید بنانے کی سمت میں ایک بڑا قدم اٹھاتے ہوئے، ڈیپارٹمنٹ آف فوڈ اینڈ پبلک ڈسٹری بیوشن (ڈی ایف پی ڈی)، صارفین، خوراک اور عوامی نظام تقسیم کے وزیر نے آج بھارت منڈپم، نئی دہلی میں منعقدہ ایک تقریب میں اناج ذخیرہ کرنے کے لیے 'اسمارٹ ویئر ہاؤسنگ سسٹم' کا آغاز کیا۔ یہ نظام سرکاری شعبے کے اناج کے گوداموں میں آرٹیفیشل انٹیلیجنس اور انٹرنیٹ آف تھنگز پر مبنی تکنالوجیوں کی دنیا کی سب سے بڑی تنصیب کی نمائندگی کرتا ہے۔

اسمارٹ ویئر ہاؤسنگ سسٹم کا آغاز امور صارفین، خوراک اور عوامی نظام تقسیم اور نئی و قابل تجدید توانائی کے عزت مآب مرکزی وزیر جناب پرہلاد جوشی کے ذریعہ کیا گیا۔ اس موقع پر امورِ صارفین، خوراک اور عوامی نظام تقسیم کی عزت مآب وزیر مملکت محترمہ نیمو بین جینتی بھائی بمبھانیا بھی موجود تھیں۔

اس پہل قدمی کو سنٹرل ویئر ہاؤسنگ کارپوریشن کے بوریوں والے اناج کے 215 گوداموں میں لاگو کیا گیا ہے، جبکہ فوڈ کارپوریشن آف انڈیا (ایف سی آئی) اس نظام کو مزید 150 گوداموں میں لاگو کر رہا ہے۔

یہ اسمارٹ ویئر ہاؤسنگ سسٹم جدید ترین تکنالوجیوں کو یکجا کرتا ہے جیسے کہ فاسٹ ٹیگ اور اے این پی آر پر مبنی گیٹ آٹومیشن، جیو ٹیگ والے اسمارٹ لاکس کے ذریعے ذہین رسائی کا کنٹرول (انٹیلیجنٹ ایکسیس کنٹرول)، اے آئی  سے آراستہ بوریوں کی گنتی، چہرے کی شناخت کا نظام، اشیاء کی شناخت، ماحولیاتی پیرامیٹرز کی آئی او ٹی پر مبنی نگرانی، اور آگ، دھوئیں اور چوہوں کا پتہ لگانے کے لیے اے آئی سے چلنے والی نگرانی۔ یہ پلیٹ فارم گودام کے کاموں کے لیے ای آر پی  انٹیگریشن، خودکار ریکارڈ بنانے اور جدید تجزیات کو بھی سپورٹ کرتا ہے۔

توقع ہے کہ یہ تکنالوجی پر مبنی نظام گاڑیوں کے ٹرن اراؤنڈ ٹائم (ٹی اے ٹی) کو کم کرکے، شفافیت کو بڑھا کر، ضوابط کی تعمیل کی نگرانی کو مضبوط بنا کر، افرادی قوت کی پیداواری صلاحیت میں اضافہ کر کے، خطرات کا بروقت پتا لگانے کے قابل بنا کر اور گودام کے کاموں کی ریئل ٹائم مانیٹرنگ فراہم کر کے آپریشنل کارکردگی کو نمایاں طور پر بہتر بنائے گا۔

حاضرین سے خطاب کرتے ہوئے، امورِ صارفین، خوراک اور عوامی نظام تقسیم کے معزز وزیر، جناب پرہلاد جوشی نے اس بات پر روشنی ڈالی کہ حکومت ٹیکنالوجی پر مبنی اصلاحات کے ذریعے ہندوستان کے غذائی تحفظ کے ڈھانچے کو مضبوط بنانے کے لیے پرعزم ہے۔ انہوں نے کہا کہ اسمارٹ ویئر ہاؤسنگ سسٹم اناج کے سائنسی ذخیرے اور بہتر تحفظ کو یقینی بنائے گا، جس سے کسانوں، گودام آپریٹرز اور پبلک ڈسٹری بیوشن سسٹم کے تحت آنے والے 80 کروڑ سے زائد مستفیدین کو فائدہ پہنچے گا۔

وزیر موصوف نے اس بات پر بھی زور دیا کہ حکومت کے ڈیجیٹلائزیشن کے اقدامات کا مقصد یہ یقینی بنانا ہے کہ غذائی سبسڈیز اصل مستفیدین تک پہنچیں۔ مختلف اصلاحات اور ڈیجیٹل مداخلتوں کے ذریعے، 2.43 کروڑ سے زیادہ نااہل راشن کارڈز کی نشاندہی کر کے انہیں ختم کر دیا گیا ہے، جس سے شفافیت میں بہتری آئی ہے اور فوائد کی ہدف شدہ فراہمی کو یقینی بنایا گیا ہے۔

پچھلے چند برسوں کے دوران، ڈی ایف پی ڈی نے کئی انقلابی ڈیجیٹل اقدامات متعارف کرائے ہیں، جن میں اسمارٹ پی ڈی ایس، اَن چکر، ڈپو درپن، آشا، اسکین، ان درپن اور دیگر ٹیکنالوجی پر مبنی پلیٹ فارمز شامل ہیں، جنہوں نے ملک بھر میں اناج کی خریداری، ذخیرہ اندوزی، لاجسٹکس اور تقسیم کے نظام کو مضبوط بنانے کے لیے اے آئی اور ایم ایل کا فائدہ اٹھایا ہے۔

تقریب کے دوران، محکمے نے 'ڈپو درپن' تشخیصی نظام کے تحت نشان دہی کیے گئے سی ڈبلیو سی اور ایف سی آئی کے بہترین کارکردگی کا مظاہرہ کرنے والے 20 گوداموں کو اعزاز سے نوازا۔

اس موقع پر متعدد معلوماتی اور عوامی آگاہی کی اشاعتوں کی رونمائی بھی کی گئی، جن میں "منڈیوں/خریداری کے مراکز پر اناج کے محفوظ ذخیرے کے لیے عملی گائیڈ"، "ایف پی ایس (ایف پی ایس) ڈیلروں کے لیے پاکٹ ہینڈ بک"، "غذائی تحفظ کو یقینی بنانے کے 12 سال"، "اَن اور الگورتھم: پی ڈی ایس میں اگلی نسل کے گورننس کی طرف پیش قدمی (2024–2026)"، اور آئی او ٹی سے لیس نظاموں کو چلانے کے معیاری آپریٹنگ طریقہ کار پر مشتمل اسمارٹ ویئر ہاؤسنگ مینوئل شامل ہیں۔

اسمارٹ ویئر ہاؤسنگ سسٹم کا آغاز حکومت کی جانب سے ایک جدید، کارآمد اور ٹیکنالوجی پر مبنی اناج کے انتظام کا نظام بنانے کی کوششوں میں ایک اور اہم سنگِ میل ہے۔ یہ اقدام ڈیجیٹل انڈیا، انڈیا اے آئی مشن، پی ایم گتی شکتی اور آتم نربھر بھارت کے قومی وژن کے عین مطابق ہے، اور توقع ہے کہ یہ ملک میں طویل مدتی غذائی تحفظ کو مضبوط بنانے میں نمایاں کردار ادا کرے گا۔

**********

 (ش ح –ا ب ن)

U.No:8855