કેન્દ્રીય કૃષિ અને ખેડૂત કલ્યાણ તેમજ ગ્રામીણ વિકાસ મંત્રી શ્રી શિવરાજ સિંહ ચૌહાણે ગુરુવારે વિડિયો કોન્ફરન્સિંગ દ્વારા ચાર રાજ્યો માટે લઘુત્તમ ટેકાના ભાવ (એમએસપી) પર કઠોળ અને તેલીબિયાંની મોટા પાયે ખરીદીને મંજૂરી આપી છે. આ ખરીદી તમિલનાડુ, ગુજરાત, ઉત્તર પ્રદેશ અને હરિયાણામાં પ્રાઇસ સપોર્ટ સ્કીમ (પીએસએસ) હેઠળ કરવામાં આવશે, જે ખેડૂતો માટે લાભદાયક ભાવ સુનિશ્ચિત કરશે અને તેમને મજબૂરીમાં થતા વેચાણ (ડિસ્ટ્રેસ સેલ) થી બચાવશે.

કેન્દ્રીય કૃષિ મંત્રી શ્રી શિવરાજ સિંહ ચૌહાણ દ્વારા લેવાયેલા નિર્ણય હેઠળ ઉત્તર પ્રદેશ સૌથી મોટો લાભાર્થી બનીને ઉભરી આવ્યું છે. ઉનાળુ 2026ની સીઝન માટે, રાજ્ય માટે 48,298 મેટ્રિક ટન (એમટી) મગ, 97,970 એમટી અડદ અને 41,718 એમટી મગફળીની ખરીદીને મંજૂરી આપવામાં આવી છે. આ મંજૂરીઓનું કુલ એમએસપી મૂલ્ય 1,490 કરોડ રૂપિયાથી વધુ છે. આ નિર્ણયથી રાજ્યમાં કઠોળ અને તેલીબિયાં ઉત્પાદકોને નોંધપાત્ર ટેકો મળવાની અપેક્ષા છે.

શ્રી શિવરાજ સિંહ ચૌહાણે ઉનાળુ 2026ની સીઝન માટે ગુજરાતમાં 18,250 એમટી મગની ખરીદીને પણ મંજૂરી આપી છે. આ ખરીદી પીએસએસ હેઠળ કરવામાં આવશે અને તેનું કુલ એમએસપી મૂલ્ય 160 કરોડ રૂપિયાથી વધુ હશે. આ નિર્ણય રાજ્યના મગ પકવતા ખેડૂતોને બજારમાં વધુ સારા ભાવ મેળવવામાં મદદ કરશે.

તમિલનાડુના કિસ્સામાં, કેન્દ્રીય મંત્રીએ રબી માર્કેટિંગ સીઝન (આરએમએસ) 2025-26 માટે મગની ખરીદીની મર્યાદા 885 એમટીથી વધારીને 990 એમટી કરી છે. તે મુજબ, વધારાના 105 એમટી મગની ખરીદી કરવામાં આવશે. મંજૂર કરાયેલી ખરીદીનું કુલ એમએસપી મૂલ્ય 8.68 કરોડ રૂપિયા થાય છે, જેનો સીધો લાભ રાજ્યના ખેડૂતોને મળશે.

તે જ પ્રકારે, હરિયાણા માટે ઉનાળુ 2026ની સીઝન દરમિયાન 2,115 એમટી મગની ખરીદી માટે મંજૂરી આપવામાં આવી છે. ખરીદીનું કુલ એમએસપી મૂલ્ય 18 કરોડ રૂપિયાથી વધુ હશે. આ પગલું રાજ્યના ખેડૂતોને ભાવ સહાય પૂરી પાડવામાં મહત્વની ભૂમિકા ભજવશે તેવી અપેક્ષા છે.

કેન્દ્રના આ નિર્ણયને કઠોળ અને તેલીબિયાં પકવતા ખેડૂતોના હિતમાં એક મહત્વપૂર્ણ પગલું ગણવામાં આવી રહ્યું છે, કારણ કે તે એમએસપીના લાભો સુનિશ્ચિત કરશે અને બજારના ભાવોના દબાણમાંથી રાહત આપશે.

SM/DK/JD

(रिलीज़ आईडी: 2274940) आगंतुक पटल : 22