وزیرِ مملکت برائے امورِ نوجوانان و کھیل، محترمہ رکشا کھڈسے نے متحرک گاؤں پروگرام کے تحت 11 سے 13 جون 2026 تک لداخ کے تزویراتی اہمیت کے حامل سرحدی علاقوں کے سہ روزہ دورے کو کامیابی کے ساتھ مکمل کیا۔ اس دورے نے سرحدی دیہات کو نوجوانوں کی شمولیت، عوامی شرکت اور آخری فرد تک ترقیاتی فوائد پہنچانے کے ذریعے مضبوط بنانے کے لیے حکومتِ ہند کے عزم کو اجاگر کیا۔ ساتھ ہی سرحدی علاقوں میں تعینات سکیورٹی فورسز کے ساتھ باہمی رابطے اور تعاون کو مزید مستحکم بنانے پر بھی زور دیا گیا۔

اس دورے نے مائی بھارت کے بڑھتے ہوئے کردار کو بھی نمایاں کیا، جو نوجوانوں کو قومی سرگرمیوں میں شامل کرنے، ان میں قائدانہ صلاحیتوں کو فروغ دینے اور دور افتادہ سرحدی علاقوں کے نوجوانوں کو قوم کی تعمیر و ترقی میں فعال کردار ادا کرنے کے مواقع فراہم کرنے کے لیے کام کر رہا ہے۔

دورے کے دوران وزیرِ مملکت کے ہمراہ محترمہ تزمل آرا، ریاستی ڈائریکٹر، مائی بھارت؛ جناب نتیش راجورا (آئی اے ایس)، ڈپٹی کمشنر چانگ تھانگ؛ جناب تاشی نامگیال ڈپٹی انسپکٹر جنرل، ہند-تبتی سرحدی پولیس (آئی ٹی بی پی)؛ جناب پریانجن، ڈپٹی کمانڈنٹ، آئی ٹی بی پی اور دیگر سینئر افسران و معزز شخصیات بھی موجود تھیں۔

ہال آف فیم میں وطن کے جانباز شہیدوں کو خراجِ عقیدت

دورے کا آغاز 11 جون کو لیہ میں واقع معروف ہال آف فیم کے دورے سے ہوا۔ محترمہ رکشا کھڈسے نے مادرِ وطن کے دفاع میں اپنی جانوں کا نذرانہ پیش کرنے والے بہادر فوجیوں کو خراجِ عقیدت پیش کیا۔

انہوں نے کہا کہ بھارتی مسلح افواج کی جانب سے مظاہرہ کی جانے والی جرأت، نظم و ضبط اور حب الوطنی کا جذبہ ہر شہری کے لیے باعثِ تحریک ہے اور قوم کے عزم و حوصلے کو مزید مضبوط بناتا ہے۔

وزیرِ مملکت نے ہال آف فیم میں اُن نمائشوں کا بھی مشاہدہ کیا جن میں بھارت کی سرحدوں کے تحفظ کے لیے انتہائی دشوار حالات میں مسلح افواج کی بہادری، قربانیوں اور آپریشنل کامیابیوں کو پیش کیا گیا تھا۔

ہیمیا گاؤں میں نوجوانوں کی شمولیت اور عوامی شرکت

12 جون کو محترمہ رکشا کھڈسے نے سرحدی گاؤں ہیمیا کا دورہ کیا، جہاں مائی بھارت کے زیرِ اہتمام ان کا روایتی انداز میں استقبال کیا گیا۔ اس موقع پر مقامی فنکاروں اور اسکولی طلبہ نے رنگا رنگ ثقافتی پروگرام پیش کیے، جن میں لداخ کی شاندار ثقافتی روایات اور تہذیبی ورثے کی جھلک نمایاں تھی۔

متحرک گاؤں اقدام سے وابستہ نوجوانوں نے اپنے تجربات، امنگوں اور سرحدی دیہات میں ترقی کے مزید مواقع پیدا کرنے سے متعلق اپنے خیالات کا اظہار کیا۔ یہ تبادلۂ خیال مقامی نقطۂ نظر کو سمجھنے اور نوجوانوں کو سماجی ترقی اور قومی تعمیر کے عمل میں زیادہ فعال کردار ادا کرنے کی ترغیب دینے کے لیے ایک اہم پلیٹ فارم ثابت ہوا۔

اس موقع پر محترمہ رکشا کھڈسے نے آئی ٹی بی پی کے ڈپٹی انسپکٹر جنرل جناب تاشی نامگیال، ڈپٹی کمانڈنٹ جناب پریانجن، گاؤں کے سرپنچ اور مقامی فنکاروں کو سماجی ترقی، نوجوانوں کی شمولیت اور قومی یکجہتی کے فروغ میں ان کی گراں قدر خدمات کے اعتراف میں اعزاز سے نوازا۔

وزیرِ مملکت نے گاؤں کے سرپنچ کی رہائش گاہ پر مائی بھارت کے رضاکاروں، نوجوان شرکاء اور مقامی برادری کے افراد سے غیر رسمی ملاقات بھی کی۔ اس دوران نوجوانوں کو بااختیار بنانے، ہنر مندی کے فروغ، کھیلوں میں شرکت اور عوامی شراکت پر مبنی ترقی کے مواقع پر تفصیلی تبادلۂ خیال کیا گیا۔

آئی ٹی بی پی کے اہلکاروں سے خصوصی ملاقات

گاؤں کے پروگرام کے بعد محترمہ رکشا کھڈسے نے ہند-تبتی سرحدی پولیس (آئی ٹی بی پی) کے کیمپ کا دورہ کیا اور وہاں تعینات افسران و اہلکاروں سے ملاقات کی۔ انہوں نے اہلکاروں سے خطاب کرتے ہوئے انتہائی دشوار اور چیلنجنگ حالات میں انجام دی جانے والی ان کی غیر معمولی خدمات، ثابت قدمی اور فرض شناسی کو سراہا۔

انہوں نے کہا کہ ملک کے مشکل ترین سرحدی علاقوں میں آئی ٹی بی پی کے جوان جس عزم، جرأت اور لگن کے ساتھ اپنی ذمہ داریاں نبھا رہے ہیں، وہ پوری قوم کے لیے باعثِ فخر اور قابلِ تقلید ہے۔

انہوں نے کہا کہ آئی ٹی بی پی کا کردار صرف سرحدوں کے تحفظ تک محدود نہیں ہے، بلکہ یہ فورس ترقیاتی منصوبوں کو آگے بڑھانے، رابطے کے ذرائع کو بہتر بنانے اور سرحدی آبادیوں میں اعتماد کو مضبوط کرنے میں بھی اہم کردار ادا کرتی ہے۔ وزیرِ مملکت نے متحرک گاؤں پروگرام اور دور افتادہ سرحدی علاقوں میں جاری دیگر ترقیاتی سرگرمیوں کے کامیاب نفاذ میں آئی ٹی بی پی کے فعال تعاون کو بھی سراہا۔

تھکسے خانقاہ کا دورہ

دورے کے آخری روز 13 جون کو محترمہ رکشا کھڈسے نے معروف تھکسے خانقاہ کا دورہ کیا اور صبح کی دعائیہ تقریب میں شرکت کی۔ انہوں نے خانقاہی برادری کے ارکان سے ملاقات کی اور ملک میں امن، خوشحالی اور مسلسل ترقی کے لیے دعا کی۔

وزیرِ مملکت کا پیغام

دورے کے اختتام پر خطاب کرتے ہوئے محترمہ رکشا کھڈسے نے کہا: ’’معزز وزیر اعظم جناب نریندر مودی جی کی دور اندیش قیادت میں بھارت کے سرحدی دیہات اب ملک کے اولین دیہات اور ترقی کے دروازوں کے طور پر ابھر رہے ہیں۔ کھیلوں، ہنر مندی کی تربیت، سماجی شمولیت اور قوم سازی کی سرگرمیوں کے ذریعے ان سرحدی علاقوں کے نوجوانوں کو بااختیار بنانا حکومت کی اہم ترجیحات میں شامل ہے۔ ہمارے نوجوانوں کی توانائی اور ہماری سکیورٹی فورسز کی لگن و فرض شناسی، وکست بھارت 2047 کے ویژن کو حقیقت کا روپ دینے میں نہایت اہم کردار ادا کرے گی۔‘‘

انہوں نے مزید کہا: ’’سرحدی دیہات کے نوجوان محض ترقی کے ثمرات حاصل کرنے والے نہیں ہیں، بلکہ ایک مضبوط، خود انحصار اور ترقی یافتہ بھارت کی تعمیر میں فعال شراکت دار ہیں۔ مائی بھارت اور متحرک گاؤں پروگرام جیسے اقدامات کے ذریعے ہم ایسے مواقع پیدا کر رہے ہیں جو انہیں ملک کی ترقی میں بامعنی اور مؤثر کردار ادا کرنے کے قابل بناتے ہیں۔‘‘

متحرک گاؤں پروگرام کے بارے میں

متحرک گاؤں پروگرام حکومتِ ہند کا ایک اہم اور نمایاں اقدام ہے، جس کا مقصد شمالی سرحد کے ساتھ واقع دیہات میں بنیادی ڈھانچے، روزگار کے مواقع، رابطہ سہولتوں، عوامی خدمات اور عوامی شمولیت کو فروغ دے کر وہاں کے باشندوں کے معیارِ زندگی کو بہتر بنانا ہے۔ اس پروگرام کا ہدف سرحدی علاقوں کے سماجی اور معاشی ڈھانچے کو مضبوط بناتے ہوئے ہمہ گیر اور متوازن ترقی کو یقینی بنانا ہے۔

یہ سہ روزہ دورہ سرحدی علاقوں کی ترقی کے لیے حکومت کے جامع اور مربوط نقطۂ نظر کی عکاسی کرتا ہے، جس کے تحت مقامی برادریوں، نوجوان تنظیموں، سول انتظامیہ اور سکیورٹی فورسز کو ایک مشترکہ پلیٹ فارم پر لایا گیا۔ اس دورے نے مائی بھارت  کے کردار کو بھی مزید مضبوطی سے اجاگر کیا، جو دور دراز علاقوں کے نوجوانوں کو قومی ترقیاتی ایجنڈے اور وکست بھارت 2047 کے ویژن سے جوڑنے کے لیے ایک مؤثر اور طاقتور پلیٹ فارم کے طور پر کام کر رہا ہے۔

******

ش ح۔ ش ا ر۔ ول

Uno-8569

(रिलीज़ आईडी: 2272479) आगंतुक पटल : 13